Pengajar
8 Sapa ke baka orang ti bepenemu-dalam? Sapa ke ulih mutarka penanggul?* Penemu-dalam ngasuh mua sesiku orang terang, lalu ngasuh mua iya ti tegas berupai gaga ati.
2 Aku madah: “Titihka utai ke diasuh raja laban nuan udah besumpah ngagai Petara. 3 Anang beguai mupuk nguingka diri ari raja. Anang nyukung utai ti jai. Raja ulih ngereja utai sepeneka ati iya, 4 laban nadai orang ulih mantah jaku iya. Nadai orang ulih nyebut munyi tu ngagai raja: ‘Nama kebuah tuan raja ngereja nya?’”
5 Orang ke ngasika pesan raja enda ditinggang penusah. Orang ke bepenemu-dalam nemu maya ti ngena sereta chara iya patut ngereja utai. 6 Bisi maya ti ngena sereta chara ti betul lebuh napi sesiti utai, laban penanggul mensia mayuh amat. 7 Ketegal nadai orang ulih nemu utai ke deka nyadi, nya alai sapa ke ulih nerangka baka ni utai nya deka nyadi?
8 Sama baka mensia ke enda ulih nguasa tauka ngawal seput pengidup, mensia mega enda ulih nagang hari iya deka mati. Sama baka siku soldadu ke enda dikemendarka pulai lebuh beperang, penyai mega enda ngemendarka orang ke ngereja utai ti jai ngelepaska diri.*
9 Aku udah meda semua utai tu, lalu ati aku belematika semua pengawa ke dikereja ba dunya tu. Sepemanjai timpuh nya, mensia nguasa mensia nyentukka sida empu merinsa. 10 Suba, aku meda orang ke jai tama pansut ari endur ti kudus, tang diatu aku meda sida dikuburka. Enda lama da agi, nadai orang deka ingatka sida ba kuta alai sida ngereja penyai. Semua utai nya mega nadai guna.
11 Mensia majak berani ngereja penyai, laban orang ke jai enda lengkas diukum. 12 Taja pan orang ke bedosa engka ngereja 100 iti penyalah, sida agi ulih idup lama. Tang aku sedar, orang ke nangika Petara ti bendar deka bulih utai ti manah, laban sida nangika Iya. 13 Orang ke jai nadai bulih utai ti manah, lalu sida enda ulih ngemanjaika umur sida empu. Pengidup sida baka bayang-bayang, laban sida enda nangika Petara.
14 Bisi utai ke nadai guna nyadi ba dunya tu: Orang ke lurus digaga baka orang ke jai, lalu orang ke jai digaga baka orang ke lurus. Nya mega nadai guna.
15 Ba runding aku manah agi ngelantangka diri, laban utai ti pemadu manah ke ulih dikereja mensia ba dunya tu, iya nya makai, ngirup, gaga ati, sereta ngelantangka diri ngena asil sida ti bebendar gawa sepemanjai pengidup. Nya meh pemeri ari Petara ti bendar ngagai orang ke idup ba dunya tu.
16 Aku mutuska ba dalam ati deka ngulihka penemu-dalam lalu beratika semua pengawa ke dikereja ba dunya tu, nyentukka aku enda tinduk siang enggau malam.* 17 Udah nya, aku beratika semua utai ke dikereja Petara ti bendar, lalu aku sedar mensia enda ulih meretika utai ke nyadi ba dunya tu enda ngira ni pemendar sida deka meretika utai nya. Taja pan sida ngumbai diri bepenemu-dalam lalu ulih meretika utai nya, tang sida bedau agi ulih amat-amat meretika utai nya.