Satu Korint

5 Kebendar nya, aku bisi ninga berita pasal orang ke ngereja ulah seks ti kamah* ba bala kita. Aku ninga, siku lelaki ngambi bini apai iya. Indah orang ari bansa bukai deh, enda ngereja ulah seks ti kamah* baka nya. 2 Tang nama kebuah kita temegahka nya? Enti nitihka, kita patut tusah ati, lalu ngeluarka orang ke udah ngereja pengawa ti jai nya ari bala kita. 3 Taja pan aku nadai enggau kita ba dia, tang ati* aku bisi enggau kita, lalu aku udah ngakim orang nya, baka ke aku empu bisi enggau kita. 4 Lebuh kita begempuru, kita nemu ati aku enggau kuasa Tuan kitai, Jesus, mega bisi enggau kita. Nya alai, dalam nama Tuan kitai, Jesus, 5 kita patut nyerahka orang ke baka nya ngagai Sitan, ngambika ulah iya ti jai ke udah ngachau raban gempuru ulih dipunaska. Enggau nya, runding enggau ulah* ti manah bala raban gempuru ulih dijaga maya hari Tuan.

6 Enda manah kita bejaku begah. Kati kita enda nemu, mimit aja ragi ulih ngasuh tekang tepung kembai? 7 Buai ragi ti lama ngambika kita nyadi tekang tepung ti baru, laban kenyau ari Kristus, anak bedus Paska kitai, udah dibunuh, kita endang nadai agi ragi. 8 Nya alai, aram kitai ngintu pengerami nya ngena roti ti nadai ragi, ke ngambarka utai ti bendar enggau utai ti manah, ukai ngena ragi ti lama tauka ragi ti ngambarka dosa enggau penyai.

9 Ba surat ke ditulis aku ngagai kita, aku ngasuh kita badu agi begulai enggau orang ke ngereja ulah seks ti kamah.* 10 Reti ku aku nya, kita ukai enda tau sekali-kali begulai enggau semua orang ba dunya tu ke ngereja ulah seks ti kamah,* ke amu, ke ngerampas utai orang bukai, tauka ke nyembah engkeramba. Laban enti kita amat enda tau sekali-kali begulai enggau sida, reti nya kita patut pansut ari dunya tu. 11 Diatu, aku nulis ngagai kita ngambika kita badu agi begulai enggau menyadi Kristian ke ngereja ulah seks ti kamah,* ke amu, ke nyembah engkeramba, ke udu nyumpah orang,* ke udu mabuk, tauka ke udu ngerampas utai orang bukai. Indah makai enggau sida deh, anang. 12 Ukai pengawa aku ke ngakim orang ba luar, enda pia? Tang kita patut ngakim sida ke ba dalam raban gempuru, 13 seraya Petara ngakim orang ba luar. “Keluarka* meh orang ke jai nya ari bala kita.”