2 Samuel

12 Nyadi, Jehovah ngasuh Natan betemu enggau David. Ku Natan madah: “Ba siti kuta, bisi dua iku lelaki. Siku kaya lalu siku da agi miskin. 2 Lelaki ke kaya nya bisi mayuh amat bedus enggau sapi, 3 tang lelaki ke miskin nya nadai nama-nama utai. Iya semina bisi siku anak bedus indu ke udah dibeli iya. Anak bedus nya idup begulai enggau iya sereta enggau bala anak lelaki iya. Iya nyaga anak bedus nya sampai anak bedus nya besai. Lelaki nya deka bekunsika pemakai enggau bedus nya, taja pan iya nadai mayuh pemakai. Anak bedus nya ngirup ari mangkuk iya, lalu tinduk pan diberap iya. Bedus nya nyau baka anak indu iya empu. 4 Udah nya, bisi siku temuai datai ngagai lelaki ke kaya nya, tang iya enda ngambi bedus tauka sapi iya empu nyadika pemakai ke temuai iya. Iya ngambi bedus orang miskin nya, lalu ngenahka nya nyadika pemakai ke temuai iya.”

5 David pan nyadi balat amat ringat ngagai lelaki nya. Ku iya madah ngagai Natan: “Aku besumpah atas nama Jehovah, Petara ti idup, lelaki nya patut mati! 6 Ketegal iya nadai pengasih, iya patut mayar ganti rugi ke anak bedus nya empat kali lipat.”

7 Udah nya, Natan pan madah ngagai David: “Nuan meh lelaki nya! Tu utai ke dipadahka Jehovah, Petara orang Israel: ‘Aku Empu udah nata nuan nyadi raja Israel, lalu Aku udah nyelamatka nuan ari Saul. 8 Aku udah meri ngagai nuan semua utai ke enggi Saul, nyengkaum bala bini iya. Aku mega udah ngasuh nuan nyadi raja Israel enggau Judah. Enti sema nya enda chukup, Aku sanggup meri nuan mayuh agi. 9 Nama kebuah nuan enda bebasaka jaku Aku, lalu ngereja utai ti jai ba mata Aku, Jehovah? Nuan munuh Uriah, orang Het nya, ngena pedang. Udah nya, nuan ngambi bini iya nyadika bini nuan empu pengudah nuan munuh iya ngena pedang orang Amon. 10 Ketegal nuan enda bebasaka Aku, penulah deka seruran ninggang* ruang bilik nuan, laban nuan udah ngambi bini Uriah nyadika bini nuan empu.’ 11 Tu meh utai ke dipadahka Jehovah: ‘Aku deka ngasuh nuan ditinggang penulah ke datai ari ruang bilik nuan empu. Ba depan mata nuan empu, Aku deka meri bala bini nuan ngagai lelaki bukai. Lelaki nya deka tinduk* enggau sida ba depan semua orang. 12 Taja pan nuan udah belalai ngereja utai, tang Aku deka ngereja nya ba depan semua orang Israel, ngambika semua sida meda magang.’”

13 David lalu madah ngagai Natan: “Aku udah bedosa ngagai Jehovah.” Ku Natan nyaut David: “Jehovah ngampunka dosa nuan. Nuan enda mati. 14 Tang, ketegal nuan udah ngereja utai nya ke nunjukka nuan balat enda bebasaka Jehovah, anak lelaki nuan ke baru ada nya deka mati.”

15 Udah nya, Natan pulai ke rumah iya.

Jehovah pan ngasuh penyakit ninggang anak David ke diadaka bini Uriah. 16 David bebendar minta kasih ari Petara ti bendar ngarika anak nya. David bepuasa lalu iya tama ke dalam bilik, lalu gali ba lantai semalam-malam. 17 Nya alai, bala tuai ba istana datai ngagai iya lalu nguji ngasuh iya angkat. Tang iya enggai, lalu iya mega enggai makai enggau sida. 18 Ba hari ti ketujuh, anak nya pan mati. Tang, bala pegawai David enda berani madah ngagai iya pasal nya. Ku sida madah: “Maya anak iya agi idup deh iya enggai ningaka kitai. Nyadi, baka ni ku kitai deka madah ngagai iya anak iya udah mati? Enggaika balat agi ga utai digaga iya.”

19 Lebuh David meda bala pegawai iya betelai enggau pangan diri, iya pan nemu anak iya udah mati. David lalu nanya bala pegawai iya: “Udah mati anak nya?” Ku sida nyaut: “Udah.” 20 Nyadi, David pan angkat, mandi, ngunsut diri ngena minyak, lalu nukar gari iya. Udah nya, iya mansang ngagai rumah Jehovah, lalu nyembah Petara. Pengudah nya, iya pulai ngagai istana iya, lalu ngasuh orang mai pemakai ngagai iya lalu iya pan makai. 21 Bala pegawai iya lalu nanya iya: “Maya anak nuan agi idup, nuan bepuasa lalu enda ngetu nyabak. Tang pengudah anak nuan mati, nuan angkat lalu makai. Nama kebuah nuan baka nya?” 22 Ku iya nyaut: “Lebuh anak nya agi idup, aku bepuasa lalu enda ngetu nyabak, laban aku ngumbai Jehovah deka kasihka aku lalu nejuka anak nya idup. 23 Tang diatu, iya udah mati. Nyadi, aku nadai agi kebuah bepuasa. Ulih aku mai iya pulai baru? Aku deka mupuk ngagai iya, tang iya enda pulai ngagai aku.”

24 Udah nya, David ngelantangka ati bini iya, Bat-sheba. Iya datai ngagai bini iya lalu tinduk enggau bini iya. Udah nya, bini iya ngadaka siku anak lelaki, lalu anak nya diberi nama Solomon.* Jehovah rinduka anak nya. 25 Jehovah ngasuh Nabi Natan meri anak nya nama Jedidiah,* laban Iya rinduka anak nya.

26 Joap majak nyerang Rabah, iya nya kuta orang Amon, lalu iya mujur nguasa kuta diraja nya. 27 Nyadi, Joap ngasuh orang ngirumka pesan tu ngagai David: “Aku udah nyerang Rabah, lalu aku udah mujur nguasa kuta ai* nya. 28 Nya alai, gempuruka bala soldadu ke bukai lalu serang kuta nya ngambika ulih nguasa iya. Enti enda, aku ke deka nguasa kuta nya. Nyau aku ga ke bulih nama.”*

29 David pan ngempuruka semua soldadu iya, lalu nyerang Rabah sampai iya mujur nguasa kuta nya. 30 Udah nya, iya ngambi makota Malkam lalu ngena makota nya. Makota nya digaga ari kira-kira 34 kilogram* emas, lalu diias ngena batu ti berega. Kelimpah ari nya, David ngerampas mayuh utai ari kuta nya. 31 Iya mega mai semua orang ba kuta nya pansut, lalu ngasuh sida gawa. Bisi ke diasuh mutung batu, bisi ke gawa ngena perengka besi ti tajam enggau kapak besi, sereta bisi mega diasuh ngaga batu bata. Nya meh utai ke digaga David ngagai orang ke diau ba semua kuta orang Amon. Udah nya, David enggau semua soldadu iya pulai ngagai Jerusalem.