Penyampau

11 Orang Israel lalu balat amat mutap ngagai Jehovah. Lebuh Jehovah ninga nya, Iya balat amat ringat. Nya alai, Jehovah ngasuh api nurun lalu api nya nganguska sekeda ari sida ke ba luar kem. 2 Lebuh orang Israel minta tulung ngagai Moses, Moses pan besampi ngagai Jehovah. Udah nya, api nya pan padam. 3 Nya meh kebuah endur nya dikumbai Taberah,* laban Jehovah udah ngasuh api nurun ngagai sida.

4 Bisi sekeda orang asing ke rangka diau enggau orang Israel. Sida ingin amat deka makai pemakai ke kala diempa sida suba, nyentukka orang Israel pan nitihka sida. Ku orang Israel mutap: “Sapa ke ulih meri kami dagin ke diempa kami? 5 Nyamai kitai suba ulih makai ikan ba menua Ejip, udah ga nadai bebayar. Kitai pan ulih makai timun, buah semangka, daun bawang, bawang mirah, enggau bawang putih. 6 Diatu kitai nyau lemi tulang. Nadai utai bukai ke diempa, nyau manna aja-aja.”

7 Manna nya baka leka ketumbar, lalu warna iya baka damar putih. 8 Orang Israel deka ngumpul manna nya. Sida deka ngisar manna nya tauka nutuk manna nya sampai nyadi tepung. Udah nya, sida deka ngerebus manna nya ba dalam periuk, tauka ngaga iya nyadi roti ti segala. Asai roti nya baka roti manis ke dichampur enggau minyak. 9 Maya malam hari, lebuh ambun labuh ba kawasan kem sida, manna mega deka labuh.

10 Moses ninga tiap iti ruang bilik orang Israel mutap ba depan langkau kain sida empu. Nya alai, Jehovah balat amat ringat lalu utai ke nyadi maya nya mega ngasuh Moses enda nyamai ati. 11 Udah nya, ku Moses nanya Jehovah: “Nama kebuah Nuan ngasuh aku tusah baka tu? Nama kebuah Nuan meri aku tanggung pengawa nyaga semua orang tu? 12 Aku ngandungka sida, pia? Kati nya aku ke ngadaka sida sampai Nuan ngasuh aku merap sida baka siku pengibun anak mit, lalu mai sida ngagai endur ke udah disemayaka Nuan ngagai aki ini sida? 13 Dini meh aku ulih tegigaka dagin ke semua sida tu? Sida majak mutap ngagai aku: ‘Kami ka makai dagin!’ 14 Enda aku alah, enti semina aku siku aja ke ngintu semua sida tu. Kelalu berat tu ba aku. 15 Enti Nuan majak ngaga aku baka tu, manah agi Nuan munuh aku diatu. Tang enti Nuan kasihka aku, anang nejuka aku meda penusah tu agi.”

16 Ku Jehovah nyaut Moses: “Pilih 70 iku orang Israel ke layak ari bala tuai sereta ari bala pegawai orang Israel ke bukai. Bai sida ngagai langkau gempuru lalu asuh sida bediri dia enggau nuan. 17 Aku deka nurun lalu bejaku enggau nuan ba dia. Aku deka meri sida sekeda ari kuasa kudus* ke udah diberi Aku ngagai nuan, lalu sida deka nulung nuan ngintu semua bala orang Israel tu, ngambika nuan enda ibuh agi megai tanggung pengawa tu kediri. 18 Padah ngagai orang Israel: ‘Kita patut nguduska diri ke pagila laban kita tentu deka makai dagin. Jehovah udah ninga kita balat mutap. Ku kita: “Sapa ke ulih meri kami dagin ke diempa kami? Nyamai agi pengidup kami ba menua Ejip suba.” Jehovah tentu deka meri kita dagin ke diempa kita. 19 Ukai sehari, ukai 2 hari, ukai 5 hari, ukai 10 hari tauka ukai 20 hari kita makai dagin, 20 tang sebulan kita deka makai dagin sampai kita nyau leju sereta nyau enggai agi makai dagin nya. Kita enggai nerima Jehovah ke bisi enggau kita. Kita balat mutap ngagai Iya. Ku kita: “Nama guna kami pansut ari Ejip?”’”

21 Udah nya, ku Moses madahka: “Bisi 600,000 iku lelaki enggau aku, tang Nuan madah Nuan deka meri sida makai dagin pengelama sebulan. 22 Kati semua sapi enggau bedus chukup diberi ngagai sida? Enti sema semua ikan ba tasik ditangkap, kati semua nya chukup diempa sida?”

23 Ku Jehovah nyaut Moses: “Kati bisi nama-nama utai ke enda ulih dikereja Aku, Jehovah? Nuan deka meda sekalika utai ke disebut Aku deka nyadi tauka enda.”

24 Nya alai, Moses pan pansut lalu madahka jaku Jehovah ngagai orang Israel. Iya ngempuruka 70 iku bala tuai ari semua bala tuai orang Israel, lalu ngasuh sida bediri ngelingi langkau gempuru. 25 Udah nya, Jehovah nurun dalam remang* lalu bejaku enggau Moses. Petara lalu ngambi sekeda ari kuasa kudus ke udah diberi Iya ngagai Moses, lalu meri kuasa kudus nya ngagai 70 iku bala tuai nya. Pengudah bala tuai nya nerima kuasa kudus nya, sida berengkah bejaku baka nabi.* Tang, nya nyadi maya nya aja.

26 Bisi dua iku lelaki, iya nya Eldat enggau Medat, nadai ba langkau gempuru. Seduai iya agi ba kem. Ketegal seduai iya udah dipilih, seduai iya nerima kuasa kudus ari Petara, lalu seduai iya pan bejaku baka nabi. 27 Siku lelaki ke biak belanda lalu madahka nya ngagai Moses. Ku iya: “Eldat enggau Medat bejaku baka nabi ba kem.” 28 Udah nya, Josua anak Nun, ke ari biak nyadi penulung Moses, lalu bejaku ngagai Moses: “Tuan, tagang seduai iya!” 29 Tang ku Moses nyaut iya: “Kati nuan irau utai baka tu deka ngachau penuduk aku? Kebendar iya, enti ulih, aku dekaka semua nembiak Jehovah nyadi nabi, lalu Jehovah meri kuasa kudus Iya ngagai sida.” 30 Udah nya, Moses enggau bala tuai orang Israel pulai ngagai kem.

31 Jehovah lalu ngasuh ribut bepuput ari tasik. Ribut nya mai mayuh burung puyuh ngagai kawasan kem. Enti bisi orang pansut ari kem lalu bejalai pengelama sehari, sida pan agi ulih tetemuka burung puyuh. Penyampau burung nya amat mayuh nyentukka sida nyau betugung ngeninggi kira-kira satu meter* ari tanah. 32 Nya alai, sehari-hari nya, semalam-malam nya, sereta sepemanjai hari siti, orang Israel enda ngetu nangkap burung puyuh. Nadai siku ari sida nangkap burung nya kurang ari 10 homer.* Sida ngengkahka* semua burung ke ditangkap nya ngelingi kawasan kem sida. 33 Lebuh sida agi benung makai dagin nya, Jehovah ngukum sida ngena penyakit ke ngujungka mayuh ari sida mati, laban Jehovah balat ringat ngagai sida.

34 Nya alai, sida meri endur nya nama Kibrot-hataabah,* laban ba dia meh sida nguburka semua orang ke rangka sereta amu. 35 Udah nya, orang Israel mupuk ari Kibrot-hataabah ngagai Haserot, lalu sida iya diau ba Haserot.