Jaku-Dalam
31 Tu meh jaku Raja Lemuel, iya nya pesan ti penting ke diberi indai iya kena ngajar iya:
2 O anak, nama patut dipadahka aku ngagai nuan?
O anak ke diadaka aku, nama patut disebut aku ngagai nuan?
O anak ke diulih aku ketegal semaya aku ngagai Petara, nama patut dipadahka aku?
3 Anang masau pengering nuan ke orang indu
Tauka nitihka jalai ke nganchurka bala raja.
4 O Lemuel,
Bala raja enda patut ngirup wain,
Lalu bala pemerintah enda patut nyebut: “Dini ai bisa aku?”
5 Ngambika sida enda ngirup nyentukka sida enda ingatka atur ke udah ditetapka,
Lalu enda ibuhka hak orang ke baruh pendiau.
6 Beri meh ai bisa ngagai orang ke nyauka mati,
Lalu beri meh wain ngagai orang ke benung tusah ati.
7 Awakka sida ngirup lalu enda ingatka diri miskin,
Ngambika sida enda agi ingatka penusah diri.
8 Bejaku meh ngarika orang ke enda ulih ngarika diri empu;
Jaga meh hak semua orang ke nyauka mati.
9 Bejaku meh ngarika sida lalu akim meh enggau adil;
Jaga meh hak orang ke miskin enggau orang ke baruh pendiau.
א [Alef]*
10 Sapa ulih tetemuka bini ti landik?
Iya jauh berega agi ari batu ti berega.*
ב [Bet]
11 Laki iya pechayaka iya enggau pengabis ati,
Lalu laki iya nadai kurang nama-nama utai.
ג [Gimel]
12 Sepemanjai pengidup iya, iya seruran ngereja utai ti manah ngagai laki iya;
Iya enda kala jai ngagai laki iya.
ד [Dalet]
13 Iya ngumpul bulu bedus enggau kain linin;
Iya rindu ngereja pengawa ngena jari iya.
ה [He]
14 Iya sempama baka kapal ke dikena orang ke bedagang,
Ke mai pemakai ari endur ti jauh.
ו [Waw]
15 Iya dani maya hari agi petang;
Iya nyediaka pemakai ke sida sebilik,
Lalu nyadung pemakai ngagai bala ulun indu iya.
ז [Zayin]
16 Pengudah iya berunding enggau manah, iya meli sebidang tanah;
Iya nanam anggur ba tanah nya ngena asil usaha* iya empu.
ח [Het]
17 Iya ngeringka lengan iya,
Lalu iya sedia deka ngereja pengawa ti berat.
ט [Tet]
18 Iya nemu bisnis iya mai untung;
Lampu kelita iya enda padam maya malam hari.
י [Yod]
19 Jari iya megai kayu pengulung;
Jari iya ngenggam kayu kena mintal.*
כ [Kap]
20 Iya ngulurka jari iya ngagai orang ke baruh pendiau,
Lalu iya gerah jari ngagai orang ke miskin.
ל [Lamed]
21 Iya nadai irauka sida sebilik maya musin chelap,
Laban sida sebilik bisi baju tebal.*
מ [Mem]
22 Iya ngaga cadar peninduk iya,
Lalu gari iya digaga ari kain linin enggau bulu bedus ke bewarna ungu.
נ [Nun]
23 Nadai orang enda ngelala laki iya ba pintu penama kuta,
Endur alai laki iya duduk begulai enggau bala tuai kuta nya.
ס [Samek]
24 Iya begagaka gari* ari kain linin lalu nyual gari nya;
Iya begagaka tali pinggang ke dijual ngagai orang ke bedagang.
ע [Ayin]
25 Iya kering sereta dipebasa orang bukai,
Lalu iya merening ngagai masa depan enggau yakin.
פ [Pe]
צ [Tsade]
27 Iya seruran beratika pengawa ba rumah iya;
Iya enda nemu jenuh.
ק [Qof]
28 Bala anak iya angkat lalu ngemuliaka iya.
Laki iya pan mega angkat lalu muji iya.
ר [Res]
29 Bisi mayuh indu ti landik,
Tang nuan landik agi ari semua sida.
ש [Syin]
30 Pemajik ulih nipu, lalu pemanah gamal ulih lenyau,
Tang indu ke nangika Jehovah deka dipuji.
ת [Taw]
31 Beri meh iya upah ketegal semua utai ti dikereja iya,
Lalu awakka pengawa iya ngasuh iya dipuji ba semua pintu kuta.