Jaku-Dalam

2 O anak aku, enti nuan nerima jaku aku

Lalu nyimpan pesan aku baka nyimpan reta ti berega;

 2 Enti nuan ningaka penemu-dalam enggau manah

Sereta muka ati nuan ngambika bulih runding ti dalam;

 3 Enti nuan ngangau minta penemu

Sereta bebendar minta runding ti dalam;

 4 Enti nuan majak ngiga semua nya baka ke ngiga pirak

Sereta bebendar ngiga iya baka ke ngiga reta ke dilalaika;

 5 Nya baru nuan deka nemu reti nangika Jehovah,

Lalu nuan deka tetemuka penemu pasal Petara.

 6 Jehovah Empu meri penemu-dalam;

Penemu sereta runding ti dalam datai ari mulut Iya.

 7 Iya nyimpan penemu-dalam ke orang ke manah;

Iya nyadi terabai ke orang ti idup enggau chara ti lurus.

 8 Iya ngemataka orang ke nitihka jalai ti adil,

Lalu Iya nyaga jalai bala nembiak Iya ti setia.

 9 Nya baru nuan nemu reti utai ti lurus sereta adil,

Nuan deka nemu jalai pengidup ti betul.

10 Lebuh penemu-dalam tama ngagai ati nuan

Lalu penemu ngasuh nuan lantang,

11 Nuan deka nemu berunding enggau manah, lalu nya deka nulung nuan;

Runding ti dalam deka nyaga nuan,

12 Kena nyelamatka nuan ari jalai ti salah,

Ari orang ke nyebut utai ti ngelimpangka,

13 Ari orang ke ninggalka jalai ti betul,

Ke nitihka jalai pemetang,

14 Ari orang ke rinduka pengawa ti salah,

Ke lantang ati ke utai ti jai,

15 Sereta ari orang ke nengah jalai ti bingkuk,

Ke bisi jalai pengidup ti enda jujur.

16 Penemu-dalam deka nyelamatka nuan ari indu ke kamah ulah,*

Ari mulut manis indu* ke enda bemoral,*

17 Ke ninggalka laki iya ke enggau iya jadi lebuh iya agi biak

Sereta ke enda ingatka semaya iya enggau Petara;

18 Bejalai ngagai rumah iya baka ke bejalai ngagai pemati,

Lalu jalai ngagai rumah iya mai nuan ngagai orang ke nadai daya ketegal pemati.

19 Sida ke tinduk* enggau iya enda ulih pulai agi;

Sida enda ulih pulai agi ngagai jalai ke nuju ngagai pengidup.

20 Nya alai, beteladan meh ba orang ke menyana,

Lalu mengkang nitihka jalai orang ke lurus,

21 Laban semina orang ke menyana aja ke deka diau ba dunya;

Semina sida ke nadai ngereja penyalah* aja ke deka mengkang diau ba dia.

22 Tang orang ke jai deka dipunaska ari dunya,

Lalu orang ke enda setia deka dibuai abis lengis ari dunya.