Hebrew

4 Nya alai, ketegal Petara besemaya kitai agi ulih tama ngagai endur Iya belelak, kitai patut bejimat ngambika nadai siku ari bala kitai dikumbai enda layak tama. 2 Berita Manah ke ditusui ngagai kitai mega udah ditusui ngagai aki ini kitai. Tang, jaku ke didinga sida nadai mai penguntung ngagai sida laban sida enda arap baka orang ke ngasi. 3 Ba kitai ke arap, kitai deka tama ngagai endur Iya belelak. Tang pasal sida, Petara kala madahka: “Aku ringat lalu besumpah, ‘Sida enda ulih tama ngagai endur Aku belelak.’” Petara nyebut munyi nya taja pan pengawa Iya udah tembu kenyau ari penumbuh dunya.* 4 Ba ayat siti, Iya bejaku pasal hari ketujuh. Ku Iya: “Ba hari ketujuh, Petara belelak ari semua pengawa Iya.” 5 Ku Iya agi: “Sida enda ulih tama ngagai endur Aku belelak.”

6 Sida ke dulu ninga Berita Manah enda ulih tama ngagai endur Petara belelak laban sida enda ngasi. Taja pia, sekeda orang agi ulih tama. 7 Ketegal nya, nyau kelama, Petara bejaku dalam masmur David, baka ke udah dipadah ba surat tu, “Seharitu, enti kita ningaka nyawa Aku, anang ngasuh ati kita kieh.”* Enggau nya, sekali agi Iya netapka siti hari ke dikumbai, “Seharitu.” 8 Enti sema Josua udah mai sida ngagai siti endur belelak, tentu Petara enda ibuh agi nyebut pasal siti hari ke bukai. 9 Nya alai, nembiak Petara agi bisi peluang belelak baka maya Hari Sabat. 10 Orang ke udah tama ngagai endur Petara belelak udah belelak ari pengawa diri, sama baka Petara ke udah belelak ari pengawa Diri.

11 Nya alai, aram meh kitai bebendar tama ngagai endur belelak nya ngambika nadai siku pan ke nyadi enda ngasi baka sida. 12 Jaku Petara idup sereta bekuasa, lalu tajam agi ari pedang ke bemata dua. Jaku Petara ulih ngachuk* lalu nyeraraka gamal* sesiku orang ari utai ke bisi ba dalam ati* iya. Jaku Petara mega ulih ngachuk* lalu nyeraraka buku tulang ari sumsum tulang,* lalu ulih mandangka runding enggau pengingin ati orang. 13 Nadai siti pan utai ke udah ditempa* ke dilalaika ari Petara. Semua utai ayan lalu ulih dipeda Iya enggau terang, lalu kitai deka diakim Iya.

14 Ketegal kitai bisi imam besai ti bemulia ke udah ngagai serega, iya nya Jesus Anak Petara, nya alai aram meh kitai terus madahka diri arapka iya ba mua orang mayuh. 15 Imam besai kitai ukai imam besai ke enda ulih meretika* pengelemi kitai. Iya udah diuji ba semua pekara baka kitai, tang iya nadai dosa. 16 Nya alai, aram meh kitai datai ngagai kerusi diraja Petara ke ngayanka pemanah ati ti besai, lalu besampi enggau berani,* ngambika kitai bulih pengasih enggau pemanah ati ti besai ke nulung kitai ba maya ti ngena.