Luke
15 Semua pengumpul chukai enggau orang ke bedosa begelumu ngelingi Jesus, deka ningaka jaku iya. 2 Orang Parisi enggau bala penulis Adat mut-mut lalu madahka: “Orang tu nyambut orang ke bedosa lalu makai enggau sida.” 3 Udah nya, iya madah ngagai sida jaku sempama tu: 4 “Enti sema siku ari bala kita bisi 100 iku bedus lalu siku bedus nya lenyau, endaka iya deka ninggalka 99 iku bedus ti bukai ba menua puang, lalu ngiga bedus ti lenyau nya nyentukka iya tetemuka bedus nya? 5 Lebuh iya tetemuka bedus nya, iya amat gaga ati lalu ngesan bedus nya ba bau iya. 6 Lebuh iya datai ba rumah, iya ngangauka bala kaban enggau orang ke diau beserimbai enggau iya lalu madah ngagai sida, ‘Aram sama gaga ati enggau aku laban aku udah tetemuka bedus aku ke lenyau.’ 7 Aku madah ngagai kita: Baka nya mega, lebuh siku orang ke bedosa nesal ati, nya deka ngasuh semua ke ba serega lebih agi gaga ati enti dibandingka enggau pengaga ati sida ke 99 iku orang ke lurus ke enda ibuh nesal ati.
8 “Tauka enti sema siku indu bisi 10 singkap duit pirak* lalu sesingkap ari duit nya lenyau, endaka iya deka nungkun lampu kelita, nyapu rumah iya lalu bebendar ngiga duit pirak nya nyentukka iya tetemuka duit nya? 9 Lebuh iya tetemuka duit pirak nya, iya ngangauka bala kaban enggau orang ke diau beserimbai enggau iya lalu madah ngagai sida, ‘Aram gaga ati enggau aku laban aku udah tetemuka duit pirak aku ke lenyau.’ 10 Baka nya mega, aku madah ngagai kita: Bala melikat Petara deka balat gaga ati lebuh siku orang ke bedosa nesal ati.”
11 Udah nya iya madahka: “Siku lelaki bisi dua iku anak lelaki. 12 Anak ke biak madah ngagai apai iya, ‘Apai, beri ngagai aku ungkup aku ari reta tengkira nuan.’ Apai nya lalu magi reta tengkira iya ngagai dua iku anak iya. 13 Beberapa hari udah nya, anak ke biak nya ngumpul semua reta iya lalu mupuk ngagai menua ti jauh. Ba din, iya masau reta iya lalu idup ngena chara ti enda menuku. 14 Pengudah semua reta iya abis, lapar pungkang ti balat nyadi ba serata menua nya lalu iya nyadi seranta. 15 Iya indah bekuli ba siku orang ke diau ba menua nya, lalu iya diasuh nyaga raban babi orang nya ba padang. 16 Iya kelalu lapar nyentukka iya deka makai utai ke diempa babi. Tang nadai ga orang meri iya utai diempa.
17 “Lebuh iya sedarka pemeli diri, iya lalu bejaku, ‘Apai aku ngaji mayuh orang lalu semua sida bisi mayuh pemakai.* Tang aku ba ditu nyauka mati lapar! 18 Aku deka mupuk lalu pulai ngagai apai aku. Aku deka madah ngagai iya: “Apai, aku udah bedosa ngagai nuan enggau Petara ke ba serega. 19 Aku enda layak agi dikumbai anak nuan. Awakka aku nyadi orang gaji nuan.”’ 20 Nya alai, iya mupuk lalu pulai ngagai apai iya. Lebuh apai iya meda iya ari jauh, apai iya kasihka iya lalu belanda ngagai iya, merap iya, lalu nyium iya. 21 Udah nya, anak nya madah ngagai apai iya, ‘Apai, aku udah bedosa ngagai nuan enggau Petara ke ba serega. Aku enda layak agi dikumbai anak nuan.’ 22 Tang apai nya madah ngagai bala ulun iya, ‘Jampat, bai baju jubah ke pemadu manah lalu pasukka baju nya ba iya. Rasukka tinchin ba jari iya sereta kasut ba kaki iya. 23 Sayat anak sapi ti gemu. Kitai deka rami makai lalu nyambut anak aku ke udah pulai. 24 Laban anak aku udah mati, tang diatu iya idup baru. Iya udah lenyau, tang diatu iya udah ditemu.’ Sida iya pan rami gaga ati.
25 “Maya nya, anak iya ke tuai benung ba umai. Lebuh iya pulai lalu nyauka datai ba rumah, iya ninga munyi musik enggau munyi orang ke betanda. 26 Nya alai, iya ngangauka siku ari ulun iya lalu nanya nama utai ke benung nyadi. 27 Ulun nya madah ngagai iya, ‘Menyadi nuan udah pulai. Apai nuan udah nyayat anak sapi ti gemu laban menyadi nuan udah pulai enggau selamat.’ 28 Tang lebuh iya ninga nya, iya ringat lalu enggai tama ke rumah. Apai iya pansut lalu ngumbuk iya tama ke rumah. 29 Ku iya madah ngagai apai iya, ‘Dinga nuan. Betaun-taun aku udah gawa ke nuan baka ulun lalu aku nadai kala enda ngasika nuan. Taja pia, sekali pan enda meh nuan meri aku anak kambin kena aku rami makai enggau bala kaban aku. 30 Tang lebuh anak nuan nya pulai, anak nuan nya ke masau reta nuan enggau bala indu sundal, nuan indah nyayat anak sapi ti gemu ke iya.’ 31 Apai nya madah ngagai iya, ‘Anak, nuan endang seruran enggau aku, lalu semua utai ti dikemisi aku endang enggi nuan magang. 32 Tang kitai patut rami gaga ati, laban menyadi nuan udah mati, tang diatu iya idup baru. Iya udah lenyau, tang diatu iya udah ditemu.’”