Matthew

18 Lebuh maya nya, bala murid datai ngagai Jesus, lalu nanya: “Sapa orang ke pemadu besai dalam Perintah serega?” 2 Jesus ngangauka siku anak mit, lalu ngasuh iya bediri ba tengah-tengah sida. 3 Iya lalu bejaku: “Enggau bendar aku madah ngagai kita: Enti kita enda berubah lalu nyadi baka anak mit, kita enda ulih tama ngagai Perintah serega. 4 Nya alai, barang sapa ke ngemaruhka diri baka anak mit tu, iya meh ke pemadu besai dalam Perintah serega. 5 Lalu barang sapa nerima anak mit baka tu dalam nama aku, mega nerima aku. 6 Tang barang sapa ke ngasuh siku ari murid aku ke baka anak mit,* labuh ba pengarap, manah agi enti batu kisar ti besai ke ditarit keledai digantung ba rekung orang nya, lalu iya dibuai ngagai tasik ti dalam.

7 “Tulah meh dunya tu laban ngasuh mensia labuh ba pengarap!* Utai ke ngasuh orang labuh ba pengarap tentu deka bisi, tang tulah meh orang ke ngasuh orang bukai labuh ba pengarap! 8 Enti jari tauka kaki kita mai kita bedosa,* tetak lalu buai iya. Manah agi enti kita nadai jari tauka kaki sepiak tang bulih pengidup, ari ke bisi kedua piak jari tauka kaki tang dibuai ngagai api ti enda nemu padam.* 9 Lalu enti mata kita mai kita bedosa,* keruk lalu buai iya. Manah agi enti kita nadai mata sepiak tang bulih pengidup, ari ke bisi dua igi mata tang dibuai ngagai api Gehena.* 10 Anang sekali-kali kita ngemaruhka bala murid aku ke baka anak mit, laban bala melikat sida ti ba serega seruran merening ngagai mua Apai aku ti ba serega. 11* ——

12 “Nama runding kita? Enti orang siku bisi 100 iku bedus, lalu siku ari bedus nya tesat, endaka iya deka ninggalka 99 iku bedus iya ba bukit, lalu bejalai ngiga siku bedus ti tesat nya? 13 Aku madah ngagai kita: Lebuh iya udah tetemuka bedus nya, iya tentu lebih agi gaga ati ke bedus nya, ari sida ke 99 iku ke enda tesat nya. 14 Pia mega, Apai aku* ti ba serega enggai nejuka indah siku ari sida ke baka anak mit tu tesat.

15 “Enti menyadi* kita bedosa ngelaban kita, mansang kita ngagai iya, lalu padahka penyalah iya ngagai iya. Kereja nya semina entara kita enggau iya aja. Enti iya mendingka kita, reti nya kita udah nulung iya ngereja utai ti betul. 16 Tang enti iya enggai mendingka kita, bai siku tauka dua iku orang enggau kita, laban tiap iti pekara ulih ditentuka betul, enti bisi penerang ari dua tauka tiga iku orang saksi. 17 Enti iya enggai mendingka sida, padahka ngagai raban gempuru.* Lalu enti iya mega enggai mendingka raban gempuru, kita patut ngumbai iya baka orang ari bansa bukai sereta pengumpul chukai.

18 “Enggau bendar aku madah ngagai kita: Sebarang utai ditanchang kita ba dunya tu, udah ditanchang ba serega. Lalu sebarang utai dilepaska kita ba dunya tu, udah dilepaska ba serega. 19 Enggau bendar aku madah ngagai kita baru: Enti dua iku ari kita ba dunya tu, besetuju minta sebarang utai ti beguna,* utai nya deka diberi Apai aku ti ba serega. 20 Laban lebuh dua tauka tiga iku orang begempuru dalam nama aku, aku bisi ba dia enggau sida.”

21 Udah nya, Peter datai lalu nanya iya: “Tuan, enti menyadi* aku bedosa ngelaban aku, berapa kali aku patut ngampun iya? Tujuh kali?” 22 Ku Jesus nyaut: “Aku madah ngagai nuan, ukai 7 kali, tang nyentuk ngagai 77 kali.

23 “Nya alai, Perintah serega tau dibandingka enggau siku raja ke deka ngumpul utang ari bala ulun iya. 24 Lebuh iya berengkah ngereja pengawa nya, siku ulun ke berutang 10,000 talenta* dibai betemu enggau iya. 25 Tang laban iya enda tebayarka utang nya, nya alai raja ngasuh iya dijual, sama enggau bini, bala anak, sereta enggau semua reta tengkira iya, kena mayar utang nya. 26 Ulun nya besugang ba mua raja, lalu minta kasih ari iya. Ku ulun nya: ‘Sabar meh enggau aku. Aku deka mayar semua utang aku.’ 27 Raja berasai kasihka iya, lalu ngelepaska iya sereta muai utang iya. 28 Tang lebuh ulun nya pansut, iya betemu enggau siku ulun ke bukai, ke berutang 100 denari ba iya. Iya nangkap ulun nya, lalu nyekal* iya. Ku iya bejaku: ‘Bayar semua utang nuan.’ 29 Kaban iya nya besugang lalu minta kasih ari iya. Ku iya: ‘Sabar meh enggau aku. Aku deka mayar utang aku.’ 30 Tang iya enggai ninga. Iya lalu mupuk ngasuh orang ngurung kaban iya ba rumah jil, nyentukka kaban iya ulih mayar abis utang nya. 31 Lebuh bala ulun ke bukai meda utai ke nyadi nya, sida balat tusah ati, lalu madahka semua utai nya ngagai raja. 32 Raja lalu ngangauka ulun nya, lalu bejaku: ‘Nuan tu ulun ti jai. Aku udah muai semua utang nuan, lebuh nuan minta kasih ari aku. 33 Endaka nuan patut kasihka kaban nuan, baka aku ke udah kasihka nuan?’ 34 Raja balat amat pedis ati, lalu ngasuh orang ngurung ulun nya dalam rumah jil, datai ke iya mayar semua utang iya. 35 Nya meh utai ke deka dikereja Apai aku ti ba serega ngagai kita, enti genap iku kita enda ngampun menyadi* kita enggau pengabis ati kita.”