Luke

8 Enda lama udah nya, Jesus nusui Berita Manah pasal Perintah Petara ari nengeri siti ngagai nengeri siti sereta ari genturung pendiau ngagai genturung pendiau. Iya mupuk enggau 12 iku rasul iya 2 enggau beberapa iku indu. Jesus kala ngeraika sekeda ari bala indu nya sereta muru melikat ti jai ari sida. Sida tu nyengkaum Maria ke dikumbai Magdalin, lalu Jesus kala muru tujuh iku melikat ti jai ari iya; 3 Joana, iya nya bini pengurus rumah Herod ke benama Kusa; Susana enggau mayuh agi bala indu ke bukai. Semua sida ngena reta sida nulung Jesus enggau bala rasul iya.

4 Lebuh mayuh amat orang begempuru, lalu orang ari mayuh bengkah nengeri datai ngagai Jesus, iya madahka sida siti jaku sempama: 5 “Orang siku pansut lalu naburka benih. Lebuh iya naburka benih, sekeda leka benih nya labuh ba jalai. Leka benih nya diindik orang lalu diempa burung. 6 Sekeda benih labuh ba batu. Pengudah benih nya berengkah tumbuh,* iya lalu layu laban nadai ai. 7 Leka benih ti bukai labuh ba madang duri. Duri sama tumbuh enggau leka benih nya, lalu ngachau benih nya ari tumbuh. 8 Bisi mega benih ke labuh ba tanah ti ami.* Pengudah benih nya tumbuh, iya mansutka buah 100 kali lipat.” Pengudah Jesus madahka pekara nya, ku iya bejaku: “Awakka orang ke bisi pending, ninga enggau manah.”

9 Tang bala murid nanya iya nama reti jaku sempama nya. 10 Ku iya madah ngagai sida: “Petara udah meri kita penemu bekaul enggau resia ti kudus pasal Perintah Petara. Tang orang bukai semina ninga jaku sempama aja. Nya alai, taja pan sida merening, sida agi enda ulih meda. Taja pan sida mending, tang sida agi enda mereti. 11 Tu reti jaku sempama nya: Leka benih nya jaku Petara. 12 Benih ti labuh ba jalai nya, orang ke ninga jaku Petara. Tang udah nya, Sitan* datai lalu ngerampas jaku ti udah ditanam dalam ati sida, ngambika sida enda arap lalu enda ulih diselamatka. 13 Benih ti labuh ba batu nya, orang ke ninga jaku Petara, lalu nerima iya enggau ati ti gaga. Tang jaku nya enda beurat dalam ati sida. Sida arapka jaku nya enda lama. Tang lebuh bisi penguji, sida lalu mantul.* 14 Benih ti labuh ba madang duri nya, orang ke ninga jaku nya, tang sida dilimpangka pengirau ati, pengaya, sereta pengelantang ba pengidup tu. Ketegal nya, jaku nya alah lalu enda ulih ngasilka buah ti manah. 15 Benih ti labuh ba tanah ti ami nya, orang ke bisi ati ti manah sereta lurus. Pengudah sida ninga jaku nya, sida nyimpan iya dalam ati sereta mansutka buah lebuh sida napi penanggul enggau ati ti liat.

16 “Nadai orang nungkun lampu kelita lalu nangkup iya ngena bakul tauka ngengkahka iya ba baruh katil. Tang lampu kelita nya diengkah ba penuduk iya, ngambika orang ke tama ulih meda penampak iya. 17 Laban semua utai ti ditudung deka dikebakka, lalu semua utai ti dilalaika enggau bebendar deka ditemu. Utai nya enda ulih dilalaika belama iya. 18 Nya alai, peratika utai ti didinga kita. Laban barang sapa ke bisi penemu, deka diberi mayuh agi penemu. Tang barang sapa ke nadai penemu, indah penemu ti mimit ke disangka iya bisi ba iya deh, deka diambi ari iya.”

19 Maya nya, indai enggau sida menyadi lelaki Jesus datai ngiga iya. Tang sida enda ulih datai semak ngagai iya, laban ba dia bisi kelalu mayuh orang. 20 Nya alai, bisi orang madah ngagai iya: “Indai enggau sida menyadi lelaki nuan bisi ba luar. Sida deka betemu enggau nuan.” 21 Tang, ku iya nyaut sida: “Indai aku enggau bala menyadi aku nya orang ke ninga jaku Petara lalu ngereja iya.”

22 Bisi sekali, Jesus enggau bala murid iya nepan perau. Ku iya madah ngagai sida: “Aram kitai ngelayang ke seberai danau.” Sida pan mupuk. 23 Tang lebuh sida benung belayar, Jesus tinduk. Enda mukai-mukai, kabut ti besai mangka ba danau nya. Perau sida tama ai nyentukka sida nyauka karam. 24 Sida pan ngerak iya lalu bejaku: “Pengajar, Pengajar, kitai nyauka parai!” Nya alai, iya angkat lalu ngerara ribut enggau gelumbang ti balat nya. Udah nya, ribut enggau gelumbang lalu badu, lalu semua utai teduh magang. 25 Udah nya, iya bejaku ngagai sida: “Ni pengarap kita?” Tang sida berasai balat takut sereta alit ati. Ku sida bejaku enggau pangan diri: “Sapa iya tu kebendar iya? Indah ribut enggau danau pan ngasika iya.”

26 Udah nya, sida sangkai ba menua Gerasa ke bisi ba seberai Galili. 27 Lebuh Jesus niki ke tebing, siku lelaki ke dirasuk melikat ti jai datai ari nengeri ngagai Jesus. Iya lama udah enda bebaju, lalu iya enda diau ba rumah tang ba sebelah pendam. 28 Lebuh iya tepedaka Jesus, iya nyerauh lalu besugang ba mua Jesus. Udah nya, iya manjung enggau inggar: “Jesus, Anak Petara ti Pemadu Tinggi, nama kebuah nuan kitu? Aku minta nuan anang merinsaka aku.” 29 (Tu ketegal Jesus udah ngasuh bala melikat ti jai nya pansut ari lelaki nya. Bala melikat ti jai udah mayuh kali* ngerasuk lelaki nya. Orang suah ngerantai jari enggau kaki iya, lalu nyaga iya ngambika enda ngerarika diri. Tang iya ulih mutuska rantai nya, lalu bala melikat ti jai mai iya rari ngagai endur ti sunyi.) 30 Jesus nanya iya: “Sapa nama nuan?” Ku iya: “Nama aku Legiun.”* Laban iya dirasuk mayuh melikat ti jai. 31 Bala melikat ti jai nya bebendar minta Jesus ngambika enda muru sida ngagai lubang ti amat dalam.* 32 Maya nya, mayuh babi benung makai ba sebelah bukit. Nya alai, bala melikat ti jai minta Jesus ngambika sida ulih tama ngagai raban babi nya. Jesus lalu ngemendarka sida ngereja nya. 33 Nya alai, melikat ti jai nya pansut ari lelaki nya lalu tama ngagai babi. Raban babi nya lalu belanda terejun nurun tingkah ngagai danau lalu lemas. 34 Lebuh orang ke ngibun raban babi nya meda nya, sida rari lalu nusui pasal utai ke nyadi nya ba nengeri enggau ba menua pesisir.

35 Nya alai, orang mayuh pan datai deka meda utai ke udah nyadi nya. Sida datai ngagai Jesus lalu meda lelaki nya nadai agi dirasuk melikat ti jai. Semua sida takut meda iya udah begari sereta enda agi gila, lalu iya duduk ba semak kaki Jesus. 36 Orang ke udah meda utai ke nyadi nya, madah ngagai sida pasal baka ni lelaki ke dirasuk melikat ti jai nya digeraika. 37 Ketegal orang mayuh ke diau ba menua Gerasa berasai balat takut, sida ngasuh Jesus mupuk ari endur nya. Nya alai, Jesus nepan perau lalu mupuk. 38 Tang lelaki ke nadai agi dirasuk melikat ti jai nya bebendar deka nitihka Jesus. Taja pia, Jesus ngasuh lelaki nya pulai. Ku iya: 39 “Pulai nuan ke rumah, lalu padahka ngagai orang, semua utai ti udah dikereja Petara ke nuan.” Nya alai, iya mupuk ngagai serata nengeri, lalu madah ngagai orang pasal utai ke udah dikereja Jesus ke iya.

40 Lebuh Jesus pulai baru ngagai Galili, orang mayuh ke nganti iya nyambut penatai iya. 41 Tang maya nya, siku lelaki ke benama Jairus datai. Iya siku tuai balai gempuru. Iya nyungkurka diri ba kaki Jesus, lalu bebendar minta Jesus datai ngagai rumah iya, 42 laban anak tunggal iya ke indu ke beumur urung 12 taun benung raya.*

Lebuh Jesus bejalai kia, mayuh orang ngempit iya. 43 Nyadi ba dia, bisi siku indu ke balat datai kain* pengelama 12 taun, lalu nadai orang ke ulih ngeraika iya. 44 Iya mansang ngagai Jesus ari belakang, lalu negu buchai* gari luar Jesus. Tekala nya, iya lalu ngetu datai kain. 45 Nya alai, Jesus nanya: “Sapa negu aku?” Ketegal nadai orang ngaku, Peter lalu bejaku: “Pengajar, peda nuan pemayuh orang ngempit nuan.” 46 Tang ku Jesus bejaku: “Bisi orang negu aku, laban aku ngasaika kuasa udah pansut ari aku.” 47 Lebuh indu nya nemu utai ke digaga iya ditemu Jesus, iya takut lalu besugang ba mua Jesus. Ba mua orang mayuh, iya madahka kebuah iya negu Jesus, lalu baka ni iya ulih gerai tekala nya. 48 Tang ku Jesus bejaku ngagai iya: “Anak, pengarap nuan udah ngeraika nuan. Mupuk meh, anang irau.”*

49 Lebuh Jesus agi benung bejaku, siku orang ari rumah Jairus datai lalu bejaku: “Anak indu nuan udah mati. Anang ngiruh Pengajar nya agi.” 50 Lebuh Jesus ninga nya, iya bejaku ngagai Jairus: “Anang irau, tang ayanka pengarap lalu anak nuan deka selamat.” 51 Lebuh Jesus datai ba rumah nya, iya enda ngasuh sapa-sapa tama enggau iya kelimpah ari Peter, John, James, enggau apai indai anak mit nya. 52 Tang semua orang nyabak sereta mandam dada diri ketegal tusah ati. Lalu Jesus pan bejaku: “Badu agi nyabak laban iya enda mati tang iya semina tinduk aja.” 53 Sida pan ketawa ngeleseka iya laban sida nemu anak mit nya udah mati. 54 Iya megai jari anak mit nya lalu bejaku: “Anak, angkat nuan!” 55 Anak mit nya pan idup baru* lalu angkat tekala nya. Udah nya, Jesus ngasuh orang meri pemakai ngagai anak mit nya. 56 Apai indai anak mit nya enda ulih nagang asai ati diri laban kelalu balat gaga. Tang Jesus enda ngasuh sida madahka utai ke nyadi nya ngagai orang.