Jaku-Dalam
3 Anak, anang enda ingatka utai ke diajar* aku,
Lalu ngasika pesan aku enggau pengabis ati nuan,
2 Ngambika nuan panjai umur
Sereta idup lantang.
3 Nuan patut seruran ngayanka pengerindu ti setia enggau penetap ati;
Gantungka nya ba rekung nuan;
Tuliska nya ba ati nuan;
4 Nya baru Petara enggau mensia deka rinduka nuan;
Sida deka nemu nuan amat bepenemu-dalam.
5 Panggaika diri ba Jehovah enggau pengabis ati nuan;
Anang manggaika diri ba penemu diri empu.
6 Lebuh nuan ngereja semua utai, perundingka utai ti dikedekaka Iya,
Lalu Iya deka nunjukka jalai ti ngena ngagai nuan.
7 Anang ngumbai diri pintar.
Nangika Jehovah lalu kuingka diri ari penyai.
8 Nya deka ngasuh tubuh nuan gerai,
Lalu ngasuh tulang nuan mengkang kering.
9 Muliaka Jehovah ngena utai ti berega ke dikemisi nuan,
Ngena asil ti pemadu manah* ari semua utai tanam nuan;
10 Enggau nya, setor nuan deka amat-amat penuh,
Lalu wain ti baru deka melumpa ari endur alai nuan nganchurka buah anggur.
11 Anak aku, anang nulak disiplin ari Jehovah;
Anang ringat lebuh Iya ngerara nuan,
12 Laban Jehovah ngerara semua orang ke dikerinduka Iya,
Baka apai ke ngerara anak ti dikesayauka Iya.
13 Gaga ati orang ke bulih penemu-dalam.
Pia mega, orang ke ulih meretika utai.
14 Ngulihka penemu-dalam manah agi ari ngulihka pirak,
Lalu ngembuan penemu-dalam manah agi ari ngembuan emas.
15 Penemu-dalam berega agi ari batu ti berega;*
Nadai utai ti dikinginka nuan ulih dibandingka enggau nya.
16 Umur ti panjai bisi ba jari kanan iya;
Pengaya enggau mulia bisi ba jari kiba iya.
17 Semua jalai iya mai pengaga ati;
Semua jalai iya mai pengelantang.
18 Iya baka pun kayu pengidup ba orang ke bepegai ba iya,
Lalu orang ke bepegai rat ba iya deka gaga ati.
19 Jehovah udah ngaga dunya ngena penemu-dalam.
Iya udah negapka langit ngena penemu.
20 Iya ngena penemu Iya melah ai ti dalam
Sereta ngasuh mua hari nurunka beris ujan.
21 Anak, anang enda ingatka semua utai nya.*
Anang ngelenyauka penemu-dalam, lalu jaga meh runding nuan.
22 Semua nya deka meri nuan pengidup,
Lalu nyadi baka marik ke ngias rekung nuan;
23 Enggau nya, nuan deka likun lebuh bejalai,
Lalu kaki nuan enda sekali-kali tesangkut.*
24 Lebuh nuan gali, nuan enda takut;
Nuan deka gali lalu tinduk jenak.
25 Nuan enda takutka nama-nama bencana ke ngenyit datai;
Nuan enda takutka kabut ti balat ke nuntung orang ti jai;
26 Laban nuan ulih arapka Jehovah;
Iya enda nejuka kaki nuan disintak panjuk.
27 Kereja meh utai ti manah ngagai orang ke begunaka tulung;*
Anang ati dua tiga deka nulung orang nya.
28 Enti nuan ulih nulung iya tekala nya,
Anang madah ngagai iya: “Pulai nuan, pagila kitu baru! Pagila baru aku nulung nuan.”
29 Enti orang ke diau semak enggau nuan arapka nuan,
Anang berunding deka ngereja utai ti jai ngagai iya.
30 Anang bekelikuh enggau orang nadai kebuah,
Enti iya nadai ngereja utai ti jai ngagai nuan.
31 Anang ngining orang ke ganas
Tauka nitihka jalai pengidup iya ti jai;
32 Laban Jehovah begedika orang ke pintar nipu,
Tang Iya bekaban rapat enggau orang ke lurus.
33 Jehovah nyumpah ruang bilik orang ke jai,
Tang Iya merekatka ruang bilik orang ke lurus.
34 Iya ngeleseka orang ke udu ngelese,
Tang Iya rinduka orang ke baruh ati.
35 Orang ke bepenemu-dalam deka dipebasa,
Tang orang ke beli temegahka utai ti enda dipebasa.