Mark
7 Orang Parisi enggau sekeda penulis Adat ke datai ari Jerusalem begelumu ngelingi Jesus. 2 Sida meda sekeda murid Jesus makai ngena jari ti kamah, iya nya, jari ti enda dibasu.* 3 (Laban orang Parisi, enggau semua orang Judah, enda makai enti sida bedau masu jari sida nyentuk ngagai siku, laban sida bepegai rat ba adat aki ini sida kelia. 4 Lebuh pulai ari pasar, sida enda makai seagi-agi sida bedau meresi diri. Sida mega bepegai rat ba mayuh adat bukai ari aki ini sida, baka nyepuhka mangkuk, jag* enggau periuk temaga dalam ai.) 5 Nya alai, orang Parisi enggau sida penulis Adat lalu nanya Jesus: “Nama kebuah bala murid nuan ngelanggar adat asal aki ini kitai, lalu makai ngena jari ti kamah?” 6 Ku Jesus nyaut: “Kita tu orang ke pura-pura ngapa. Amat jaku Isaiah lebuh iya benabika pasal kita. Ku iya nulis: ‘Sida bebasaka Aku ngena mulut aja, tang ati sida jauh ari Aku. 7 Nadai reti sida majak nyembah Aku, laban utai ke diajar sida semina adat mensia.’ 8 Kita ngelengkaka pesan Petara, tang bepegai rat ba adat mensia.”
9 Ku Jesus agi: “Kita pintar ngiga chara kena nulak pesan Petara, ngambika kita ulih nitihka adat kita empu. 10 Ambika chunto, Moses madahka, ‘Bebasaka apai enggau indai nuan,’ lalu ‘Orang ke bejai apai indai diri, patut diukum dibunuh.’ 11 Tang ku kita, ‘Enti orang madah ngagai apai tauka indai iya: “Utai ti dikemisi aku, ke beguna ba kita udah diberi aku nyadika korban* (iya nya, pemeri ke Petara).”’ 12 Enggau chara nya, kita enda ngawakka orang nya ngereja nama-nama utai ke apai indai iya. 13 Nya alai, kita ngasuh jaku Petara nadai agi reti ketegal adat asal kita. Kita mega ngereja mayuh utai bukai ti baka nya.” 14 Sekali agi Jesus ngangauka orang mayuh, lalu bejaku: “Semua kita, pendingka aku lalu meretika utai tu. 15 Utai ti tama ngagai nyawa orang nadai ngasuh iya enda tuchi. Tang utai ti pansut ari ati iya, nya meh utai ti ngasuh iya enda tuchi.” 16* ——
17 Lebuh Jesus ninggalka orang mayuh, lalu tama ngagai siti rumah, bala murid iya lalu nanya iya pasal jaku sempama nya. 18 Ku iya bejaku ngagai sida: “Kati kita mega enda ulih mereti baka sida? Kati kita enda nemu, utai ti tama ngagai nyawa, enda ulih ngasuh orang enda tuchi? 19 Laban utai ti tama ngagai nyawa enda tama ngagai ati, tang tama ngagai perut, lalu udah nya pansut ari tubuh.” Enggau nya, iya madahka semua pemakai tuchi magang. 20 Ku iya agi: “Utai ti pansut ari ati, nya meh utai ti ngamahka mensia. 21 Laban ari dalam mensia, iya nya ari ati, pansut runding ti jai ke ngasuh orang ngereja ulah seks ti kamah,* ngenchuri, bebunuh, 22 butang,* amu, ngereja penyai, nipu orang, enda malu ngereja utai ti jai,* kepapas, bejaku ngelaban utai ti tuchi, sumbung, sereta enda nemu berunding enggau manah. 23 Semua utai ti jai nya pansut ari ati. Nya meh utai ti ngamahka mensia.”
24 Jesus angkat ari endur nya, lalu mupuk ngagai endur semak nengeri Tirus enggau Sidon. Iya tama ngagai siti rumah, laban enggai orang nemu iya udah datai. Tang agi meh orang nemu penatai iya. 25 Sepengudah ninga pasal Jesus, siku indu lalu datai nyungkurka diri ba kaki Jesus. Anak indu iya dirasuk melikat ti jai. 26 Indu nya orang bansa Gerika, ke datai ari Finisia ba menua Siria. Lalu iya suah bendar minta Jesus muru melikat ti jai nya ari anak iya. 27 Tang ku Jesus bejaku ngagai iya: “Awakka bala anak mit makai nyentukka sida kenyang dulu, laban aku enda patut ngambi pemakai ari anak mit lalu nikauka iya ngagai anak ukui.” 28 Indu nya lalu nyaut: “Nya endang amat, Tuan. Tang indah anak ukui ke ba baruh mija pan makai teda pemakai ari anak mit!” 29 Jesus bejaku ngagai iya: “Pulai meh nuan. Laban nuan udah nyebut munyi nya, melikat ti jai udah pansut ari anak indu nuan!” 30 Nya alai, indu nya pan pulai ke rumah, lalu meda anak iya gali ba katil. Melikat ti jai udah pansut ari anak iya.
31 Lebuh Jesus mupuk ari Tirus, iya bejalai nengah nengeri Sidon ngagai Danau Galili. Maya iya mansa Dekapolis,* 32 orang ba dia mai siku lelaki ke bengal sereta bisu ngagai iya. Sida minta kasih ngambika iya ngengkahka jari iya atas orang nya. 33 Jesus mai lelaki nya jauh ari orang bukai. Lebuh nadai orang semak dia, Jesus ngachukka tunjuk iya ke dalam pending lelaki nya. Sepengudah ngeludah, iya negu dilah lelaki nya. 34 Udah nya, Jesus engkadah ke langit, narit seput enggau panjai, lalu nyebut ngagai lelaki nya: “Effata,” reti nya, “Tebuka meh!” 35 Tekala nya, lelaki nya ulih ninga. Iya mega enda agi bisu, lalu ulih bejaku. 36 Jesus nagang orang ari nusui utai ke nyadi nya ngagai orang bukai. Tang bendar agi iya nagang sida, bendar agi ga sida nusui utai nya. 37 Semua sida balat alit ati, lalu ku sida: “Semua utai ti digaga iya chukup manah! Iya ngasuh orang ke bengal ulih ninga, lalu ngasuh orang ke bisu ulih bejaku.”