Jaku-Dalam
12 Orang ke rinduka disiplin rinduka penemu,
Tang orang ke begedika jaku rara enda nemu berunding.
2 Orang ti manah diterima Jehovah,
Tang orang ke bisi niat ati ti jai dikutuk Iya.
3 Penyai enda ulih ngasuh orang berasai likun,
Tang orang ti lurus baka urat kayu ke enda ulih dichabut.
4 Bini ti landik baka makota ke laki iya,
Tang bini ke ngembuan ulah ti ngemaluka baka penyakit ke makai tulang laki iya.
5 Runding orang ke lurus nya adil,
Tang ajar orang ke jai nya nesatka.
6 Jaku orang ke jai baka panjuk ke ulih munuh,
Tang jaku orang ti lurus ulih nyelamatka sida empu.
7 Lebuh orang ke jai dipunaska, sida deka nadai agi,
Tang rumah orang ke lurus meruan tegap.
8 Orang dipuji ketegal jaku iya ti bepenemu-dalam,
Tang orang ke ngembuan ati ti jai deka dikemaruhka.
9 Manah agi nyadi orang biasa ke semina bisi siku aja ulun,
Ari ke ngemuliaka diri tang nadai pemakai.
11 Orang ke ngintu tanah diri deka berasai puas laban pemakai,
Tang orang ke enda nemu berunding begagaika utai ti nadai guna.
12 Orang ke jai inginka utai ke dirampas orang jai ke bukai,
Tang orang ke lurus baka pun kayu ke beurat sereta mansutka buah.
13 Orang ke jai disintak jaku sida empu ti bedosa,
Tang orang ke lurus bibas ari penusah.
14 Orang ke mansutka jaku ti manah deka bulih asil ti manah,
Lalu iya deka diberekat ketegal iya udah bebendar ngereja pengawa.
15 Orang ke beli ngumbai diri empu betul,
Tang orang ke bepenemu-dalam nerima jaku ajar.*
16 Orang ke beli jampat ringat,
Tang orang ke pintar enda pedulika jaku kelese.
17 Saksi ti setia deka nyebut utai ti bendar,*
Tang saksi ti pelesu nyebut utai ti bula.
18 Jaku ke disebut enggau enda berunding baka achuk pedang,
Tang dilah orang ke bepenemu-dalam ngeraika orang bukai.
19 Mulut ke nyebut utai ti bendar deka tan belama iya,
Tang dilah ke nyebut utai ti bula enda tan lama.
20 Pemula ba ati orang ke bisi niat ti jai,
Tang orang ke bebendar nyaga kaul ti manah, deka gaga ati.
21 Penusah enda ninggang orang ke lurus,
Tang penusah deka seruran ninggang orang ke jai.
22 Jehovah amat begedika orang ke bula,
Tang Iya lantang ati ngagai orang ke setia.
23 Orang ke pintar enda kerah-kerah madahka* penemu diri,
Tang orang ke beli rerauh madahka pemeli diri.
24 Orang ke rajin deka bekuasa,
Tang orang ke buruk gawa deka dipaksa nyadi ulun.
26 Orang ke lurus bejimat milih padang rumput ke iya empu,
Tang orang ke jai nitihka jalai iya empu lalu tesat.
27 Pemuruk ngasuh orang enggai pansut ngasu,
Tang pemagas nya reta ti berega.
28 Jalai pengelurus nuju ngagai pengidup,
Lalu jalai nya sigi nadai nuju ngagai pemati.