2 Samuel
5 Pengudah sesiti timpuh, semua raban bansa Israel datai ngagai David ba Hebron lalu madahka: “Kami tu darah getah nuan.* 2 Suba, lebuh Saul agi nyadi raja kami, nuan meh ke ngulu orang Israel beperang. Jehovah bisi madah ngagai nuan: ‘Baka siku pengibun bedus, nuan deka ngibun bala nembiak Aku, Israel, lalu nuan deka nyadi tuai orang Israel.’” 3 Nya alai, semua tuai orang Israel datai ngagai raja ba Hebron, lalu Raja David ngaga siti sempekat enggau sida ba depan Jehovah. Udah nya, sida nata David nyadi raja Israel.
4 David beumur 30 taun lebuh iya nyadi raja, lalu iya merintah pengelama 40 taun. 5 Ba Hebron, iya merintah Judah pengelama 7 taun setengah, lalu ba Jerusalem, iya merintah serata Israel enggau Judah pengelama 33 taun. 6 Raja enggau raban iya mupuk ngagai Jerusalem, laban deka ngelaban orang Jebus ke diau ba dia. Sida ngeleseka David: “Nadai nuan ulih datai kitu! Indah orang buta enggau orang ke tachat deh deka muru nuan.” Sida ngumbai David tentu enda datai kia. 7 Tang David nguasa kubu Sion, lalu diatu, nya dikumbai Kuta David. 8 Nyadi, ba hari nya, David madahka: “Sida ke nyerang orang Jebus patut mansang nengah terowong ai, lalu nyerang ‘orang ke tachat enggau ke buta,’ ke dipegedika aku.” Ketegal nya meh orang madah: “Orang ke buta enggau tachat enda tau sekali-kali tama ngagai endur tu.” 9 Udah nya, David diau ba kubu nya, lalu kubu nya diberi nama* Kuta David. David berengkah ngaga bengunan enggau dinding ba Bukit* sereta ba endur ke ngelingi kuta nya. 10 David pan nyadi majak bekuasa, lalu Petara Jehovah, ketuai soldadu serega, bisi enggau iya.
11 Raja Hiram ari Tirus ngasuh orang ngirumka pesan ngagai David. Iya mega nganjung kayu sidar, tukang kayu, enggau tukang batu kena ngaga dinding. Sida pan berengkah ngaga istana* ke David. 12 David pan sedar Jehovah udah ngentapka penuduk iya nyadi raja Israel, lalu Iya udah negapka perintah David ke penguntung bala nembiak Iya, Israel.
13 Pengudah David pindah ari Hebron ngagai Jerusalem, iya bisi mayuh agi gundik enggau bini. Iya mega bisi mayuh agi anak lelaki enggau anak indu. 14 Tu meh nama anak iya ke ada ba Jerusalem: Shamua, Sobap, Natan, Solomon, 15 Ibar, Elisua, Nefek, Japia, 16 Elisama, Eliada, enggau Elipelet.
17 Lebuh orang Pilistin ninga pasal David ke udah ditata nyadi raja Israel, semua sida pan datai ngiga David. Lebuh David ninga pasal nya, iya pan mansang ngagai siti endur alai iya belalai. 18 Udah nya, orang Pilistin datai lalu ngemenuhka serata Lebak Repaim. 19 David pan nanya Jehovah: “Patut aku nyerang orang Pilistin? Kati Nuan deka nyerahka sida ngagai aku?” Ku Jehovah nyaut David: “Alai meh. Aku tentu deka nyerahka orang Pilistin ngagai nuan.” 20 Nyadi, David pan mansang ngagai Baal-perasim* lalu ngalahka sida ba dia. Udah nya, iya madah: “Bala munsuh aku punas laban Jehovah, baka dinding ke runtuh laban ai.” Nya meh kebuah endur nya diberi iya nama Baal-perasim. 21 Orang Pilistin ninggalka patung sida ba dia. David enggau raban iya pan ngambi patung nya lalu nganchurka iya.
22 Udah nya, orang Pilistin datai baru lalu ngemenuhka serata Lebak Repaim. 23 David nanya Jehovah, lalu Iya nyaut: “Anang nyerang sida ari depan, tang serang sida ari belakang, semak enggau babas.* 24 Ba atas babas nya, enti nuan bisi ninga bunyi orang bejalai, nuan patut terus nyerang sida enggau jampat, laban Aku, Jehovah, udah mansang dulu ari nuan deka nyerang soldadu Pilistin nya.” 25 David pan ngereja semua utai ke diasuh Jehovah, lalu iya ngalahka orang Pilistin ari Geba sampai ngagai Geser.