Jaku-Dalam
4 Anak, terima meh disiplin apai nuan;
Peratika enggau manah ngambika nuan ulih nyadi orang ke bepenemu,
2 Laban aku ngajar nuan utai ti manah;
Anang enda ibuhka utai ke diajar aku.
3 Ba mata apai aku, aku anak ti ngasi,
Lalu aku anak ti pemadu dikesayauka indai aku.
4 Ku apai aku ngajar aku: “Simpan tegut jaku aku ba dalam ati nuan.
Ngasi meh ke pesan aku ngambika nuan ulih mengkang idup.
5 Nuan patut ngulihka penemu-dalam sereta runding ti dalam.
Anang enda ingatka jaku aku, lalu anang nguing ari utai ke disebut aku.
6 Anang ninggalka penemu-dalam, lalu iya deka ngelindung nuan.
Rindu meh ke iya, lalu iya deka nyaga nuan.
7 Penemu-dalam nya utai ti pemadu penting, nya alai nuan patut ngulihka iya.
Ari semua utai ke diulih nuan, tentuka nuan mega ngulihka runding ti dalam.
8 Kemesaika penemu-dalam, lalu iya deka ngeninggika nuan.
Penemu-dalam deka ngasuh nuan dipebasa, laban nuan sayauka iya.
9 Iya baka gelung bungai ti lawa ke diengkah ba pala nuan;
Iya baka makota ti lawa ke ngias pala nuan.”
10 Anak, pendingka lalu peratika utai ke disebut aku.
Enggau nya, nuan deka panjai umur.
11 Aku deka ngajar nuan chara ngena penemu-dalam;
Aku deka ngiring nuan ngagai jalai ti bendar.
12 Lebuh nuan nyingkang bejalai, nadai utai deka mempang nuan;
Lebuh nuan belanda, nuan enda tesangkut.
13 Bepegai meh ba disiplin, lalu anang ngelengkaka iya.
Jaga meh iya, laban iya ngasuh nuan idup.
14 Anang nitihka jalai orang ti jai;
Anang nunda pengawa sida ti jai.
15 Seliahka diri ari jalai sida, anang nengah jalai nya;
Kuingka diri ari jalai nya, pansa aja jalai nya.
16 Orang ke jai enda ulih tinduk seagi-agi sida bedau ngereja utai ti jai;
Sida enda ulih mejamka mata seagi-agi sida bedau ngelabuhka orang.
17 Penyai baka roti ke diempa sida,
Lalu pengawa ti ganas baka wain ke diirup sida.
18 Tang jalai orang ke ngereja utai ti betul baka terang maya pagi hari;
Makin lama, makin terang, nyentukka hari nyau siang.
19 Jalai orang ke jai baka pemetang;
Sida enda nemu nama utai ke ngasuh sida tesangkut.
20 Anak, peratika jaku aku;
Pendingka enggau manah utai ke disebut aku.
21 Seruran ingatka jaku aku;
Simpan nya dalam ati nuan,
22 Laban orang ke nerima jaku nya deka idup,
Lalu tubuh sida deka gerai.
23 Ari semua utai ke patut dijaga nuan, jaga meh ati nuan,
Laban ati nentuka idup mati nuan.
24 Anang nyebut utai ti bula;
Anang ngena jaku ti nipu.
25 Perening terus ke mua;
Anang malik ke kiba tauka ke kanan.
26 Buai utai ke mempang jalai nuan.*
Enggau nya, nuan enda tesangkut.
27 Anang limpang ke kiba tauka ke kanan.
Seliahka utai ti jai.