Isaiah
13 Tu pemutus pechara pasal Babilon ke dipeda Isaiah anak Amoz nengah bantu kuasa kudus Petara:
2 “Dirika tiang kena meri tanda ba atas gunung batu.
Kangauka sida, kepaika jari,
Ngambika sida datai ngagai pintu penama orang ke tinggi pangkat.
3 Aku udah madahka pesan ngagai bala orang ke dilantik Aku.
Aku udah ngangauka bala soldadu Aku ngambika sida mantaika pengeringat Aku;
Sida gaga ati sereta temegah.
4 Dinga munyi orang chapuh ba gunung;
Baka munyi mayuh orang!
Dinga munyi mayuh perintah begau;
Munyi mayuh bansa begelumu!
Jehovah, ketuai soldadu serega, benung ngatur raban soldadu kena beperang.
5 Sida datai ari menua ti jauh,
Datai ari ujung langit;
Jehovah enggau senyata pengeringat Iya datai,
Deka nganchurka serata dunya.
6 Rauh-rauh meh nyabak laban hari Jehovah nyau semak!
Ba hari nya, Petara ti Pemadu Bekuasa deka ngemunaska utai.
7 Nya meh kebuah jari semua orang deka nyadi lemi,
Lalu ati tiap iku orang deka berasai balat amat takut.
8 Orang deka berasai balat kesal.
Sida deka besintak isi sereta berasai pedis,
Baka indu ke radai deka beranak.
Sida amat takut lebuh meda pangan diri,
Mua sida nyau mirah ketegal pemedis ke diasaika sida.
9 Peda! Hari Jehovah deka datai,
Nya hari ti kejam sereta penuh enggau pengeringat ti mau baka api.
Nya alai, menua nya deka nyadi endur ti ngenakutka,
Lalu orang ke bedosa ba menua nya deka dipunaska.
10 Tiap igi bintang enggau raban bintang*
Enda agi mancharka penampak;
Mata panas ke niki deka nyadi petang,
Lalu bulan enda agi terang.
11 Aku deka ngukum orang ba dunya ketegal penyai sida,
Sereta ngukum orang ke jai ketegal penyalah sida.
Aku deka madamka penyumbung orang ke ngenemuka diri,
Lalu Aku deka ngemaruhka pemerintah ti sumbung sereta kejam.
12 Aku deka ngasuh mensia tusah agi digiga ari emas ti tulin,
Sereta tusah agi digiga ari emas Opir.
13 Ba hari Aku, Jehovah, ketuai soldadu serega, mantaika pengeringat Aku ke mau baka api,
Aku deka ngasuh langit begegar,
Lalu ngasuh dunya begusak nyentukka iya bekinsit ari endur asal.
14 Baka kijang ke rari ari orang ke ngasu sereta baka raban bedus ke nadai orang ngibun,
Tiap iku orang deka pulai baru ngagai bansa iya empu;
Tiap iku orang deka rari ngagai menua iya empu.
15 Barang sapa ke ditemu deka direjang,
Lalu barang sapa ke ditangkap deka dibunuh ngena pedang.
16 Anak sida deka dipalu sampai anchur ba depan mata sida,
Rumah sida deka dirampas,
Lalu bini sida deka dirugul.
17 Aku deka ngasuh orang Media nyerang sida;
Ba orang Media, pirak enda berega
Lalu sida enda rinduka emas.
18 Panah sida deka ngeredakka orang biak;
Sida nadai penyinu ngagai anak mit;
Indah pengasih pan nadai.
19 Babilon, perintah ti pemadu mulia,
Iya nya kuta ti lawa ke dikemegahka orang Kaldea,
Deka nyadi baka Sodom enggau Gomorah ke udah dianchurka Petara.
Nadai orang Arab ke deka nirika langkau kain iya ba dia;
Indah pengibun bedus deh enda mai raban bedus iya gali ba dia.
21 Jelu padang pasir deka gali ba dia;
Rumah ba dia deka penuh laban burung antu.
Burung unta deka diau ba dia,
Lalu kambin ti siga* deka jengkak-jengkak ba dia.
22 Bunyi nyawa jelu meraung deka didinga ba menara iya,
Lalu ukui ti siga deka meraung ba istana iya ti lawa.
Maya iya diukum nyau semak, lalu timpuh pengidup iya enda dipanjaika agi.”