Bansa Israel ti Kedua
22 Bala orang ke diau ba Jerusalem udah ngelantik Ahasiah nyadi raja nganti apai iya taja pan iya anak ti pemadu biak. Nya ketegal bala perumpak ke datai enggau orang Arab udah nyerang kem orang Judah, lalu munuh semua bala menyadi Ahasiah ke tuai agi ari iya. Baka nya meh Ahasiah anak Jehoram nyadi raja Judah. 2 Ahasiah beumur 22 taun lebuh iya nyadi raja, lalu iya merintah ba Jerusalem pengelama setaun. Indai iya benama Ataliah. Indai iya uchu* Omri.
3 Ahasiah mega nunda pengawa ruang bilik Ahap, laban indai iya ke nyadi penasihat* iya ngasuh iya ngereja utai ti jai. 4 Iya majak ngereja utai ti jai ba mata Jehovah baka sida, laban sida nyadi penasihat iya pengudah apai iya mati, lalu nya ngujungka iya dipunaska. 5 Iya mendingka jaku sida lalu mansang enggau Jehoram anak Ahap ngagai Ramot-gilead, laban deka beperang ngelaban Raja Hasael ari Siria. Ba din, Jehoram bakal laban soldadu ke nimbakka anak panah. 6 Abi bakal nya diulih iya lebuh iya belaban enggau Raja Hasael ari Siria ba Ramah.* Nya alai, iya pulai ngagai Jesril ngambika ulih ngenatka diri nganti abi bakal iya gerai.
Nyadi, Ahasiah* anak Raja Jehoram ari Judah datai ngagai Jesril, laban deka ngabas Jehoram anak Ahap ke udah bakal.* 7 Petara nentuka Ahasiah deka dibunuh lebuh iya ngabas Jehoram. Lebuh Ahasiah datai din, iya enggau Jehoram mupuk betemu enggau Jehu, uchu Nimsi, ke udah dipilih Jehovah kena ngemunaska ruang bilik Ahap. 8 Lebuh Jehu berengkah ngukum ruang bilik Ahap, iya betemu enggau bala tuai orang Judah enggau bala anak menyadi Ahasiah ke gawa ke Ahasiah. Jehu pan lalu munuh sida. 9 Udah nya, iya ngasuh orang ngiga Ahasiah. Sida tetemuka Ahasiah benung belalai ba Samaria. Sida nangkap iya lalu mai iya ngagai Jehu, lalu munuh iya. Udah nya, sida nguburka iya laban sida madah: “Iya uchu Jehosapat, ke udah nyembah Jehovah enggau pengabis ati.” Nadai siku pan ari ruang bilik Ahasiah ke ulih nganti iya nyadi raja.
10 Lebuh Ataliah, iya nya indai Ahasiah, nemu anak lelaki iya udah mati, iya lalu deka munuh semua peturun diraja ruang bilik Judah. 11 Tang, lebuh orang ke diasuh Ataliah deka munuh Jehoas anak Ahasiah enggau bala anak raja ke bukai, Jehoshabet belalai nabanka Jehoas. Jehoshabet ngelalaika Jehoas enggau orang ke ngibun iya ba siti bilik tinduk. Jehoshabet anak Raja Jehoram mujur ngelalaika Jehoas ari Ataliah. Nya kebuah Jehoas enda dibunuh Ataliah. (Jehoshabet nya bini Imam Jehoyada sereta kakak Ahasiah.) 12 Jehoas begulai enggau orang ke ngibun iya, lalu dilalaika ba Rumah Petara ti bendar pengelama enam taun. Maya nya, Ataliah merintah serata menua.