Jaku-Dalam
29 Taja pan dirara bekali-kali tang orang nya agi ga degil
Iya deka ngenyit dianchurka lalu enda ulih ditulung agi.
2 Enti orang ke lurus majak mayuh, orang deka gaga ati,
Tang enti orang ke jai merintah, orang deka bedemuh.
3 Anak ke rinduka penemu-dalam ngagaka ati apai iya,
Tang anak ke rindu begulai enggau pelacur ngayahka pengaya iya empu.
4 Perintah sesiku raja deka tegap enti iya merintah enggau adil,
Tang orang ke nerima rasuah deka nganchurka perintah iya empu.
5 Barang sapa ke bepura-pura ngapa bejaku manis enggau orang bukai
Iya benung ngetanka panjuk kena manjuk orang nya.
6 Orang ke jai dipanjuk dosa iya empu,
Tang orang ke lurus manjung gaga ati.
7 Orang ke lurus ibuhka hak orang ke miskin,
Tang orang ke jai enda ibuhka nya.
8 Orang ke bejaku begah ngasuh pengeringat ba serata kuta mau baka api,
Tang orang ke bepenemu-dalam ngasuh ati orang ke ringat chelap.
9 Lebuh orang ke bepenemu-dalam bekelikuh enggau orang ke beli ba mahkamah,
Nya semina ngujungka penyarut enggau kelese, lalu nadai asil.
10 Pemunuh begedika orang ke nadai bepenyalah,
Lalu sida bebendar deka munuh orang ke lurus.
11 Orang ke beli ngayanka pengeringat diri,
Tang orang ke bepenemu-dalam mengkang tenang lalu ulih ngawal asai ati diri.
12 Lebuh orang ke merintah mendingka jaku ti bula,
Semua orang ke di baruh iya deka nyadi orang ke jai.
13 Bisi siti utai ti sama entara orang ke miskin enggau orang ke nekan sida:
Jehovah meh ke meri sida pengidup.
14 Lebuh raja adil ngakim orang ke miskin adil,
Penuduk diraja iya deka mengkang tegap.
15 Rutan*enggau jaku rara ngasuh orang bepenemu-dalam,
Tang anak ke ditejuka ngereja utai sepeneka ati ngemaluka indai iya.
16 Lebuh orang jai majak mayuh, penyai pan betambah,
Tang orang ke lurus deka meda orang ke jai rebah.
17 Disiplin meh anak nuan lalu iya deka ngasuh pengidup nuan lantang;
Iya deka ngasuh nuan balat gaga ati.
18 Enti nadai iring ari Petara, mensia deka ngereja utai sepeneka ati sida,
Tang orang ke ngasika adat deka lantang ati.
19 Bisi ulun ke enggai dirara ngena jaku,
Laban taja pan iya meretika jaku rara nya, tang iya enggai ngasi.
20 Kala nuan meda orang ke enda berunding dulu sebedau bejaku?
Senang agi nulung orang ke beli ari ke nulung iya.
21 Ulun ke dimanja kenyau ari biak,
Dudi hari deka nyadi orang ke enda nemu beterima kasih.
22 Orang ke jampat ringat ngasuh laya nyadi;
Orang ke jampat pedis ati deka ngereja mayuh penyalah.
23 Orang ke sumbung deka dikemaruhka,
Tang orang ke baruh ati deka dipebasa.
24 Orang ke bekerejasama enggau penchuri begedika diri empu.
Lebuh iya dikangau meri saksi, iya enda ulih madahka nama-nama utai.
25 Asai takutka mensia deka ngujungka diri dipanjuk,
Tang orang ke arapka Jehovah deka dilindung.
26 Mayuh orang deka betemu enggau* pemerintah,
Tang Jehovah meh ke ulih meri atur ti adil.
27 Orang ke lurus begedika orang ti enda adil;
Orang ke jai begedika orang ke ba jalai ti bendar.