Pengulu
5 Ba hari nya, Deborah enggau Barak anak Abinoam belagu. Tu meh lagu seduai iya:
2 “Puji meh Jehovah!
Laban buk pahlawan Israel enda ditanchang,
Laban sida sanggup beperang.
3 Bala raja, dinga kita! Bala pemerintah, pendingka tu!
Aku deka belagu ke Jehovah.
Aku deka nyadaka lagu puji* ke Jehovah, Petara Israel.
4 O Jehovah, lebuh Nuan mupuk ari Seir,
Lebuh Nuan angkat ari kawasan Edom,
Dunya begegar lalu ujan labuh ari langit,
Lalu remang* mansutka ai.
5 Gunung-gunung luluh* ba depan Jehovah,
Indah Gunung Sinai pan luluh ba depan Jehovah, Petara orang Israel.
6 Maya jeman Samgar anak Anat,
Maya jeman Jael, jalai besai puang;
Orang bejalai nengah jalai bukai.
7 Nadai agi orang kampung ba Israel,
Nyentukka aku, Deborah, dipilih;
Dipilih nyadi indai ba Israel.
8 Sida milih petara-petara bukai,
Lalu perang nyadi ba pintu penama kuta.
Terabai enggau sangkuh enda dipeda
Ba 40,000 iku orang Israel.
9 Aku nyukung bala ketuai soldadu Israel,
Ke sanggup sama enggau orang Israel belaban.
Puji meh Jehovah!
Kita ke duduk ba karpet ti berega,
Lalu kita ke bejalai nengah jalai raya,
Perundingka tu!
11 Ba telaga, nyawa orang ke nyauk ai bisi didinga;
Sida becherita pasal pengawa Jehovah ti lurus;
Pasal pengawa ti lurus ke digaga orang kampung Iya ke diau ba Israel.
Udah nya, nembiak Jehovah nurun ngagai pintu penama kuta.
12 Dani, dani, O Deborah!
Angkat, lalu belagu meh!
Angkat meh, O Barak anak Abinoam! Bai orang ke ditangkap nuan.
13 Sida ke tinggal, datai ngagai bala tuai;
Nembiak Jehovah datai ngagai aku deka ngelaban munsuh ti kering.
14 Sida ke diau ba lebak datai ari raban bansa Efraim;
Sida nitihka kita, O raban bansa Benjamin, sida bisi enggau kita.
Ari peturun Makir, bala ketuai soldadu nurun;
Ari raban bansa Sebulun, bisi bala pegawai ke ngerejista bala soldadu.*
15 Bala tuai raban bansa Isakar bisi enggau Deborah;
Baka raban bansa Isakar, Barak mega bisi enggau iya.
Barak diasuh bejalai ngagai lebak ti rata.
Tang ati raban bansa Reuben agi bebelah bagi.
16 Nama kebuah nuan duduk bebaika dua iti ma* ba belakang nuan,
Sambil ninga bala pengibun bedus nyepu kesuling ke bala bedus sida?
Ati raban bansa Reuben agi bebelah bagi.
17 Orang Gilead mengkang diau ba seberai Sungai Jordan;
Nama kebuah raban bansa Dan agi diau ba kapal?
Raban bansa Aser duduk dugau-dugau ba tebing tasik;
Sida enda mindah ari penyangkai kapal sida.
18 Raban bansa Sebulun berambunka nyawa sida lalu sanggup mati;
Raban bansa Naptali mega berambunka nyawa sida ba kawasan bebukit.
19 Ba Taanak semak sungai ba Megido,
Bala raja datai lalu beperang;
Bala raja Kanaan beperang;
Tang nadai pirak ke ulih dirampas sida.
20 Ari langit, bintang beperang;
Ari orbit, bintang nya beperang ngelaban Sisera.
21 Ai Sungai Kison ti deras nabanka bala munsuh;
Sungai Kison endang udah bisi kenyau ari kelia menya.
Aku deka ngindik bala munsuh aku ti kering.
22 Kuda redup-redup ngentakka kaki;
Kuda iya ti lelaki belanda enggau jampat.
23 ‘Tulah meh Meros,’ ku melikat Jehovah bejaku,
‘Tulah meh orang ke diau ba dia,
Laban sida enda datai nulung Jehovah.
Sida enda nulung Jehovah sama enggau bala pahlawan ti kering.’
24 Beberekat meh Jael,
Bini orang Keni ke benama Heber;
Iya diberekat lebih agi ari semua indu ke diau ba langkau kain.
25 Sisera minta ai, tang iya meri ai tusu;
Iya meri ai tusu ti pekat* ngena mangkuk ti lawa.
26 Jari kiba iya megai paku langkau;
Jari kanan iya megai tukul;
Iya mantang Sisera lalu nganchurka pala iya;
Iya ngeredak lalu ngebuska begian tisi pala Sisera.
27 Ba entara kaki iya, Sisera labuh lalu enda ulih engkebut agi;
Ba entara kaki iya, Sisera rebah telentang;
Ba endur Sisera rebah, ba dia meh Sisera mati garing-garing.
28 Indai Sisera nyenguk ari jenila;
Ari jenila, indai iya nilik lalu nanya:
‘Nama kebuah kerita kuda iya lalu bedau ga datai?
Nama kebuah bunyi kerita kuda iya lalu bedau didinga?’
29 Indu ke tinggi pangkat ke pemadu pintar deka nyaut iya,
Lalu iya deka nandu jaku tu:
30 ‘Sida tentu benung bebagika utai ke udah dirampas sida;
Siku indu tauka dua iku indu ke tiap iku soldadu;
Kain ti bewarna, kain ti bewarna ke Sisera;
Siti gari ti disulam, kain ti bewarna, dua iti gari ti disulam
Deka dipasuk ba rekung bala orang ke ngerampas utai nya.’
31 O Jehovah, awakka semua munsuh Nuan dipunaska abis lengis.
Tang awakka orang ke rinduka Nuan baka mata panas ke niki lalu manchar enggau terang.”
Lalu orang ke diau ba menua nya idup lantang pengelama 40 taun.