Satu Timoti
3 Jaku tu tau dikearapka: Enti sesiku orang bebendar deka nyadi tuai gempuru, iya inginka pengawa ti manah. 2 Siku tuai gempuru patut bisi pendiau ti manah ngambika orang nadai kebuah deka nyalahka iya. Iya patut bisi siku bini, ngereja semua utai enggau pengumbas iya,* nemu berunding enggau manah, teratur, rindu ngelaluka orang, sereta layak ngajar. 3 Iya ukai orang ke pemabuk, kasar, enda masuk akal, ukai orang ke rindu belaya, sereta ukai orang ke rinduka duit. 4 Iya ngintu ruang bilik iya enggau manah, bisi anak ke ngasi sereta manah ulah 5 (laban enti orang enda nemu ngintu ruang bilik diri, baka ni ku iya deka ngintu raban gempuru* Petara?), 6 sereta ukai orang ke baru arap, enggaika iya nyadi sumbung lalu nerima ukum ti sama baka ke diterima Sitan.* 7 Nambahka nya, iya mega patut bisi nama ti manah ba bala orang ke ukai ari raban gempuru, enggaika iya enda dipebasa* orang lalu dipanjuk Sitan.
8 Pia mega, penulung gempuru patut berunding baka orang ke besai tuai. Iya enda bula,* enda udu ngirup wain, sereta enda amu ngulihka penguntung enggau chara ti enda lurus. 9 Iya enggau ati* ti beresi bepegai ba resia ti kudus, iya nya pengarap kitai.
10 Kelimpah ari nya, sida patut diuji dulu ngambika nemu sekalika sida layak tauka enda. Enti sida bibas ari jaku tuduh, nya baru sida ulih nyadi penulung gempuru.
11 Pia mega, bala sida ke indu patut berunding baka orang ke besai tuai, enda bejaika orang, ngereja semua utai enggau pengumbas iya,* sereta tetap ati ba semua pekara.
12 Awakka penulung gempuru bisi siku aja bini, lalu ngintu bala anak sereta ruang bilik iya enggau manah. 13 Sida ke lelaki ke ngereja utai enggau manah ba raban gempuru deka bulih nama ti manah, lalu sida mega ulih bejaku enggau berani* pasal pengarap ke bekaul enggau Jesus Kristus.
14 Aku ngarapka diri ulih datai ngagai nuan enda lama da agi. Tang, aku nulis semua utai tu dulu ngagai nuan 15 enggaika aku laun kia. Enggau nya, nuan nemu baka ni nuan patut idup nyadi siku ari ruang bilik Petara, iya nya raban gempuru Petara ti idup, ke nyadi tiang sereta ke ngetanka pemendar. 16 Sigi amat, resia ti kudus pasal sapa ke enda bebagi ati nyembah Petara amat besai reti: ‘Jesus nyadi mensia, iya dikumbai Petara lurus lebuh iya ngembuan tubuh serega,* iya ngayanka diri ngagai bala melikat, orang nusui pasal iya ngagai bansa bukai, dunya pechayaka iya, lalu iya diangkat ke serega enggau mulia.’