Satu Korint

8 Tu pasal pemakai ke diberi ngagai engkeramba: Semua kitai bisi penemu pasal tu. Penemu ngasuh orang sumbung, tang pengerindu negapka orang. 2 Barang sapa ke ngumbai diri udah nemu pasal sekeda utai, kebendar nya, iya bedau nemu semua utai. 3 Tang barang sapa ke rinduka Petara, dikelala Petara.

4 Pasal makai pemakai ke diberi ngagai engkeramba, kitai nemu engkeramba nya endang nadai reti, lalu kitai mega nemu, Petara semina siku aja. 5 Orang madahka bisi mayuh petara sekalika ba serega tauka ba dunya. Nya alai, orang ngumbai bisi mayuh “petara” enggau mayuh “tuan.” 6 Tang ba kitai, semina bisi siku aja Petara, iya nya Apai kitai. Semua utai digaga Iya, lalu kitai enggi Iya. Pia mega, Tuan kitai semina siku aja, iya nya Jesus Kristus. Semua utai digaga nengah iya, lalu kitai ulih idup nengah iya.

7 Tang ukai semua orang ngembuan penemu tu. Sekeda orang kala nyembah engkeramba. Nya alai, sida ngumbai utai ke diempa sida nya pemakai ke diberi ngagai engkeramba. Ketegal nya, ati* sida ke lemi nyalahka sida.* 8 Kebendar iya, pemakai enda ulih mai kitai semak agi ngagai Petara. Enti kitai enda makai, kitai enda rugi, lalu enti kitai makai, kitai mega enda untung. 9 Kita sigi bisi hak ngaga pemutus, tang kita patut bejimat enggaika hak nya nyadi batu ke tau ngasuh orang ke lemi labuh. 10 Enti orang meda kita ke bepenemu nya makai ba rumah sembiang engkeramba, endaka nya deka ngachau ati* orang ke lemi nya, nyentukka iya mega berani makai pemakai ke diberi ngagai engkeramba? 11 Ketegal nya, penemu kita udah ngachau pengarap menyadi kita ke lemi nya. Endaka Kristus udah mati ke iya? 12 Lebuh kita bedosa ngagai bala menyadi kita baka nya, lalu ngasuh ati* sida ti lemi telih, kita bedosa ngagai Kristus. 13 Nya alai, enti pemakai ngasuh menyadi aku labuh ba pengarap, aku sigi enda makai dagin agi, ngambika aku enda ngasuh menyadi aku labuh ba pengarap.