1 Raja
3 Solomon jadi enggau anak indu Firaun.* Baka nya meh Solomon enggau Firaun bekerejasama enggau pangan diri. Solomon mai bini iya diau ba Kuta David nyentuk ngagai maya iya udah tembu ngaga istana iya, Rumah Jehovah, enggau dinding kuta ke ngelingi Jerusalem. 2 Tang orang Israel agi nyerahka pemeri ba endur ti kudus,* laban Rumah Sembiang kena ngemuliaka nama Jehovah bedau agi digaga. 3 Solomon mengkang rinduka Jehovah, lalu nitihka atur ke dipadahka apai iya, David. Tang Solomon agi nyerahka pemeri lalu nunu pemeri nya ba endur ti kudus.
4 Raja Solomon ngagai Gibeon nyerahka pemeri, laban Gibeon nya endur ti tinggi ke pemadu tebilang. Iya nyerahka 1,000 iku jelu nyadika pemeri tunu ba alta. 5 Ba Gibeon, maya malam hari, Jehovah ngayanka Diri ngagai Solomon dalam mimpi. Dalam mimpi nya, Petara madah: “Pinta meh sebarang utai ke dikedekaka nuan.” 6 Ku Solomon nyaut: “Nuan udah mandangka pengerindu ti setia ke belimpah ngagai apai aku, David, ulun Nuan, laban iya setia, ngereja utai ti betul, sereta ngereja utai ti lurus ba depan Nuan. Nuan enda ngetu mandangka pengerindu ti setia ke belimpah ngagai iya nyentuk ngagai seharitu lebuh Nuan meri kerusi diraja iya ngagai anak iya. 7 Lalu diatu Jehovah, Petara aku, Nuan udah ngasuh ulun Nuan tu nyadi raja nganti apai aku, David, taja pan aku agi biak sereta nadai pengalaman. 8 Ulun Nuan tu merintah nembiak ke udah dipilih Nuan, iya nya bansa ti mayuh ke enda alah diitung. 9 Sapa ulih ngakim nembiak Nuan ti mayuh nya? Nya alai, tulung meh ulun Nuan tu ngasika Nuan ari ati, ngambika aku ulih nyadi hakim ke ulih nentuka utai ti manah enggau utai ti jai ke nembiak Nuan.”
10 Jehovah gaga ati enggau utai ke dipinta Solomon. 11 Ku Petara bejaku enggau Solomon: “Nuan udah minta penemu-dalam kena ngakim nembiak Aku enggau manah, lalu ukai minta umur ti panjai, pengaya, tauka pemati bala munsuh nuan. Nya alai, 12 Aku deka meri utai ke dipinta nuan. Aku deka meri nuan penemu-dalam sereta penau ulih meretika utai, lalu nadai orang ke idup sebedau tauka pengudah nuan deka baka nuan. 13 Nambahka nya, taja pan nuan enda minta pengaya enggau mulia, Aku tetap deka meri nya ngagai nuan. Sepemanjai pengidup nuan, nadai raja bukai ke baka nuan. 14 Enti nuan ngasika atur enggau pesan Aku baka apai nuan, David, Aku mega deka meri nuan umur ti panjai.”
15 Lebuh Solomon tedani, nya baru iya nemu Petara udah bejaku enggau iya dalam mimpi. Udah nya, iya mansang ngagai Jerusalem. Iya bediri ba depan peti lampang batu Adat Jehovah, lalu nyerahka pemeri tunu enggau pemeri bebaik. Udah nya, iya ngatur siti pengerami makai besai ke semua bala pegawai iya.
16 Bisi sekali, dua iku pelacur datai betemu enggau raja lalu bediri ba depan iya. 17 Indu ti keterubah madah: “Tuan raja, aku enggau indu tu diau serumah. Lebuh aku ngadaka anak aku, iya bisi ba rumah enggau aku. 18 Tiga hari pengudah aku ngadaka anak lelaki, iya mega ngadaka anak lelaki. Semina kami duai aja ba rumah nya, lalu nadai orang bukai enggau kami duai. 19 Bisi sekali, maya malam hari, lebuh iya benung tinduk, anak iya kena tinggang iya lalu anak iya mati. 20 Maya tengah malam, iya dani lalu ngambi anak aku ke ba tisi aku lebuh aku benung tinduk. Udah nya, iya ngengkahka anak iya ke udah mati ba tisi aku, lalu iya ngalika anak aku ba tisi iya. 21 Pagi hari siti, lebuh aku dani deka nusuka anak aku, aku meda anak nya udah mati. Tang lebuh aku beratika iya, baru aku nemu iya ukai anak aku.” 22 Lalu ku indu ti kedua: “Ukai! Anak ke idup nya anak aku, lalu anak ke mati nya anak nuan.” Tang indu ti keterubah madah: “Ukai! Iya ke mati nya anak nuan, lalu iya ke idup nya anak aku.” Baka nya meh seduai iya bekelikuh ba depan raja.
23 Udah nya, raja lalu bejaku: “Siku madah: ‘Anak ke idup nya anak aku, lalu anak ke mati nya anak nuan.’ Tang siku da agi madah: ‘Ukai! Iya ke mati nya anak nuan, lalu iya ke idup nya anak aku.’” 24 Ku raja agi: “Bai pedang ngagai aku kitu.” Nya alai, orang mai pedang ngagai raja. 25 Udah nya, ku raja: “Belah dua anak ke agi idup nya, lalu beri setengah ngagai seduai iya siku-siku.” 26 Ketegal balat sayauka anak iya, nya alai indai ke bempu anak ke agi idup nya lalu bejaku enggau raja: “Tuan raja, anang munuh anak nya! Beri iya ngagai indu nya.” Tang indu ti kedua madah: “Belah aja anak nya! Awakka kami duai bela enda ngempu anak nya!” 27 Udah nya, Solomon lalu bejaku: “Anang munuh anak nya! Beri iya ngagai indu ti keterubah. Iya meh indai anak nya.”
28 Semua orang Israel ninga pasal pemutus ke digaga Raja Solomon. Sida bebasa amat ke iya, laban Petara udah meri iya penemu-dalam kena ngakim sida enggau manah.