Isaiah
43 O Jakop, O Israel, tu meh utai ke dipadahka Jehovah,
Iya ke udah ngaga nuan enggau Iya ke udah nempa* nuan:
“Anang takut, laban Aku udah nebus nuan.
Aku udah ngangauka nuan ngena nama nuan.
Nuan enggi Aku.
2 Lebuh nuan nengah ai, Aku deka enggau nuan,
Lebuh nuan meraka sungai, nuan enda tengelam,
Lebuh nuan bejalai nengah api, nuan enda betu,
Api nya enda ngemediska nuan.
3 Aku meh Jehovah, Petara nuan,
Petara Israel ti Kudus, Penyelamat nuan.
Aku udah nyerahka Ejip kena nebus nuan,
Lalu udah nyerahka Etiopia enggau Seba kena nyelamatka nuan.
4 Laban nuan berega ba mata Aku,
Aku meri nuan basa lalu Aku sayauka nuan.
Nya alai, Aku deka nyerahka orang kena nyelamatka nuan,
Lalu nyerahka bansa bukai nyadika ganti nyawa nuan.
5 Anang takut, laban Aku bisi enggau nuan.
Aku deka mai peturun nuan ari timur;
Aku deka ngempuruka kita ari barat.
6 Aku deka madah ngagai utara: ‘Lepaska sida!’
Lalu madah ngagai selatan: ‘Anang ngetanka sida.
Bai bala anak lelaki Aku pulai ari endur ti jauh, lalu bai bala anak indu Aku pulai ari ujung dunya,
7 Iya nya semua sida ke dikangau ngena nama Aku
Ke udah ditempa* Aku,
Ke udah digaga Aku ke mulia Aku Empu.’
8 Bai sida pansut. Sida bisi mata, tang sida buta;
Sida bisi pending, tang sida bengal.
9 Awakka semua bansa begempuru ba siti endur,
Lalu awakka semua orang begelumu.
Sapa ari bala sida ulih madah pasal utai tu,
Tauka madah ngagai kitai nama utai ke dulu deka nyadi?
Awakka saksi sida nunjukka sida betul,
Tauka awakka orang bukai ninga lalu madah: ‘Amat nya!’”
10 “Kita meh saksi Aku,” ku Jehovah,
“Nembiak Aku ke udah dipilih Aku,
Ngambika kita nemu lalu arapka* Aku
Sereta ngambika kita meretika, Aku agi tetap sama.
Nadai petara bukai sebedau Aku,
Lalu pengudah Aku pan nadai.
11 Aku meh Jehovah, nadai penyelamat bukai kelimpah ari Aku.”
12 Ku Jehovah: “Aku meh ke madahka utai ke deka digaga Aku, ke nyelamatka kita, sereta ke ngasuh pekara tu ditemu orang.
Maya nya nadai petara bukai ba bala kita.
Nya alai kita meh saksi Aku, lalu Aku meh Petara.
13 Aku agi tetap sama;
Nadai orang ulih ngerampas utai ari jari Aku.
Lebuh Aku ngereja utai, sapa ke ulih nagang Aku?”
14 Tu meh utai ke dipadahka Jehovah, Penebus kita, Petara Israel ti Kudus:
“Aku deka nganjung orang ngagai Babilon lalu Aku deka ngeruntuhka semua palang pintu ke kita,
Lalu orang Kaldea ke ba kapal deka rauh-rauh nyabak tusah ati.
15 Aku meh Jehovah, Petara kita ti Kudus, ke nempa* Israel, lalu Aku meh Raja kita.”
16 Tu meh utai ke dipadahka Jehovah,
Petara ke ngaga jalai nengah tasik
Sereta ke nyediaka jalai nengah ai ti begelumbang,
17 Ke nguluka kerita kuda enggau kuda,
Sereta raban soldadu enggau pahlawan ti kering:
“Sida deka rebah lalu enda ulih angkat agi.
Sida deka dipunaska baka api kelita ke dipadamka.”
18 “Anang ingatka utai ke udah nyadi,
Lalu anang majak ngenang utai ke udah nyadi suba.
19 Peda! Aku benung ngaga utai ti baru;
Iya deka berengkah diatu.
Kati bisi kita meda?
Aku deka ngaga jalai nengah menua puang
Sereta sungai nengah padang pasir.
20 Jelu ti liar ke ba padang deka ngemuliaka Aku,
Pia mega enggau ukui ti siga sereta burung unta,
Laban Aku nyediaka ai ba menua puang,
Nyediaka sungai ba padang pasir
Nyadika ai irup ke bala nembiak Aku ke dipilih Aku,
21 Bansa ke ditempa Aku ke Aku Empu,
Ngambika sida nusui pengawa Aku ke patut dipuji.
22 Tang Jakop, nuan enda ngangauka Aku.
O Israel, nuan nyau lejuka Aku.
23 Nuan enda mai bedus nyadika pemeri tunu ke Aku
Tauka nyerahka korban kena ngemuliaka Aku.
Aku enda mejal nuan mai pemeri ke Aku,
Tauka ngenusahka nuan ngasuh nuan meri menyan putih.
24 Nuan enda ngena duit nuan empu meli ke Aku tebu ti bebau rengut.
Nuan enda ngemuaska ati Aku ngena lemak jelu ke diserahka nuan.
Tang nuan nating Aku ngena dosa nuan
Lalu ngenusahka Aku ngena penyalah nuan.
25 Ketegal nama Aku, Aku deka muai penyalah nuan*
Lalu Aku enggai ingatka dosa nuan.
26 Aram mai kes kitai ngambika dipechara; anang enda ngingatka Aku;
Bantaika pekara nuan kena nunjukka diri enda salah.
27 Aki ini nuan ti keterubah udah bedosa,
Lalu orang ke bejaku* ngarika nuan, udah ngelaban Aku.
28 Aku deka ngumbai bala tuai ba endur ti kudus enda tuchi.
Aku deka nyerahka Jakop ngambika dipunaska,
Lalu Aku deka nyerahka Israel ngambika dikelese.