Luke

11 Bisi sekali, Jesus benung besampi ba siti endur. Pengudah iya besampi, siku ari murid iya madahka: “Tuan, ajar kami chara besampi, baka John ke ngajar bala murid iya besampi.”

2 Ku Jesus madah ngagai sida: “Lebuh kita besampi, sebut: ‘Apai, kudus meh nama Nuan. Datai meh Perintah Nuan. 3 Beri kami pemakai* ke diguna kami ninting hari. 4 Ampunka dosa kami, laban kami mega ngampunka orang ke bedosa* ngagai kami; lalu anang nejuka kami alah laban penguji.’”

5 Pengudah nya, iya madah ngagai sida: “Enti sema siku ari kita bisi siku kaban, lalu kita ngagai rumah iya ba urung tengah malam lalu bejaku ngagai iya, ‘Unggal, beri aku tiga iti tuku roti, 6 laban siku ari kaban aku baru datai ngagai rumah aku ari endur ti jauh. Lalu aku nadai utai ke ulih disediaka aku ke iya.’ 7 Tang kaban kita nya nyaut ari dalam: ‘Anang ngachau aku. Pintu udah dikunchi, lalu bala anak aku benung tinduk enggau aku ditu. Aku enda ulih angkat meri nuan utai.’ 8 Aku madah ngagai kita: Iya enggai angkat meri kita utai taja pan kita kaban iya. Tang ketegal kita enda ngetu minta, iya tentu angkat lalu meri kita nama-nama utai ke diguna kita. 9 Nya alai aku madah ngagai kita: Anang badu minta, lalu kita deka nerima; anang badu ngiga, lalu kita deka tetemuka iya; anang badu nekung, lalu pintu deka dibuka ke kita. 10 Laban genap iku orang ke minta, deka nerima; lalu genap iku orang ke ngiga, deka tetemuka iya; lalu genap iku orang ke nekung, pintu deka dibuka ke sida. 11 Ni bagi kita ke apai meri anak kita ular enti iya minta ikan? 12 Tauka meri iya kala enti iya minta telu? 13 Nya alai, enti kita orang ke bedosa nemu meri utai ti manah ngagai anak kita, Apai ti ba serega tentu deka meri kuasa kudus ngagai orang ke minta ari Iya!”

14 Udah nya, iya muru melikat ti jai ke ngasuh siku lelaki nyadi bisu. Pengudah melikat ti jai nya pansut, lelaki ti bisu nya ulih bejaku, lalu orang mayuh berasai alit ati. 15 Tang sekeda ari sida madahka: “Iya muru melikat ti jai ngena kuasa Belsebup,* ketuai melikat ti jai.” 16 Sida ke bukai deka nguji iya, lalu minta iya ngayanka tanda ari serega. 17 Jesus nemu utai ti dirunding sida, lalu ku iya: “Genap bengkah perintah ti bepechah-belah lalu ngelaban diri empu, deka rusak. Genap bengkah ruang bilik ti bepechah-belah lalu ngelaban diri empu, deka rusak. 18 Pia mega, enti Sitan bepechah-belah lalu ngelaban diri empu, baka ni ku perintah iya ulih tan? Kita madah aku muru melikat ti jai ngena kuasa Belsebup. 19 Enti aku muru melikat ti jai ngena kuasa Belsebup, kuasa sapa ke dikena bala nembiak kita muru melikat ti jai? Nya alai, nembiak kita empu deka nunjukka kita nya salah. 20 Tang enti aku muru melikat ti jai ngena kuasa kudus* Petara, reti nya Perintah Petara udah bisi ba ditu, tang kita enda nemu* pasal nya. 21 Enti siku lelaki ti kering ke bisi chukup senyata nyaga rumah iya empu, nadai orang ulih ngenchuri reta tengkira iya. 22 Tang lebuh bisi orang ke kering agi ari iya datai nyerang lalu ngalahka iya, orang nya deka ngambi semua senyata ti dikearapka iya. Reta tengkira ke dirampas orang nya ari iya deka diberi ngagai orang bukai. 23 Barang sapa ke enda setanah enggau aku, ngelaban aku. Lalu barang sapa ke enda enggau aku ngempuruka orang ngagai aku, iya muru orang ari aku.

24 “Lebuh melikat ti jai pansut ari orang, iya bejalai nengah menua ti rangkai ngiga endur alai belelak, tang iya nadai tetemuka endur nya. Udah nya iya bejaku: ‘Aku deka pulai baru ngagai rumah ti udah ditinggalka aku.’ 25 Lebuh iya datai ba rumah nya, iya nemu rumah nya udah disapu sereta diias enggau manah. 26 Iya pan mupuk, lalu mai tujuh iku melikat ti jai agi ari iya empu. Sida tama lalu diau dalam orang nya. Nya alai, pendiau orang nya nyadi jai agi ari ti keterubah.”

27 Lebuh Jesus benung bejaku, siku indu ari bala mayuh bejaku enggau nyawa ti inggar ngagai Jesus: “Gaga ati meh indai ke udah ngandungka nuan sereta udah nusuka nuan!” 28 Tang ku iya madahka: “Ukai. Iya ke gaga ati nya orang ke ninga sereta ngasika jaku Petara!”

29 Lebuh orang mayuh begelumu, Jesus bejaku: “Rebak tu rebak ti jai. Sida minta tanda, tang nadai tanda deka diberi ngagai sida, kelimpah ari tanda Jonah. 30 Baka Jonah ke nyadi tanda ke orang Nineweh, baka nya mega Anak Mensia deka nyadi tanda ke rebak tu. 31 Maya hari pechara, kuin ari selatan deka sama angkat enggau orang ke ari rebak tu. Kuin nya deka nunjukka penyalah orang ke ari rebak tu, laban iya datai ari menua ti jauh deka mendingka penalam penemu Solomon. Tang kebendar iya, ba ditu bisi orang ke besai agi ari Solomon. 32 Maya Hari Pechara, orang Nineweh deka angkat sama enggau orang ke ari rebak tu. Orang Nineweh deka nunjukka penyalah orang ke ari rebak tu, laban orang Nineweh udah nesal ati ke dosa sida, pengudah ninga pesan Jonah. Tang kebendar iya, ba ditu bisi orang ke besai agi ari Jonah. 33 Pengudah nungkun lampu kelita, orang enda ngelalaika kelita nya tauka nangkup iya ngena bakul,* tang ngengkahka kelita nya ba penuduk iya, ngambika orang ke tama ulih meda penampak iya. 34 Mata kita baka lampu ke tubuh kita. Enti mata kita betatika siti pekara aja, semua tubuh kita deka tampak. Tang enti mata kita amu,* tubuh kita deka petang. 35 Nya alai, bejimat meh kita ngambika penampak ti dalam kita nya ukai pemetang. 36 Nyadi enti semua tubuh kita tampak lalu nadai begian ti petang, semua tubuh kita deka manchar terang baka kelita ke meri kita penampak.”

37 Pengudah Jesus nyebut nya, siku orang Parisi mai Jesus makai enggau iya. Nya alai, Jesus tama ngagai rumah iya lalu duduk makai ba mija. 38 Tang orang Parisi nya tekenyit lebuh meda Jesus enda masu jari* sebedau makai. 39 Tang Tuan Jesus madah ngagai iya: “Kita orang Parisi nuchi mangkuk enggau chapak kita ari luar, tang ba dalam kita penuh laban pengamu enggau penyai. 40 Kita tu enda nemu berunding! Endaka Petara ke ngaga tubuh mega ngaga ati? 41 Nya alai, lebuh kita ngereja utai ti manah ngagai orang ke seranta, kereja nya ari ati. Enggau nya, kita tentu deka tuchi ba semua pekara. 42 Tang tulah meh kita orang Parisi, laban kita meri pudina, rue,* enggau semua sayur ke bukai nyadika pemeri.* Tang kita enda beberatka pengelurus enggau pengerindu ke Petara! Pemeri endang beguna, tang pekara ke bukai mega patut dikemeratka. 43 Tulah meh kita orang Parisi, laban kita rindu duduk ba endur ti pemadu mua* ba balai gempuru sereta rindu dipebasa orang ba sebelah pasar! 44 Tulah meh kita, laban kita baka kubur ke enda ulih dipeda. Orang ke bejalai pan enda nemu sida bejalai ba atas kubur nya!”

45 Udah nya, siku ari sida ke landik pasal Adat madahka: “Pengajar, lebuh nuan nyebut munyi nya, nuan mega ngeleseka kami.” 46 Ku Jesus madahka: “Tulah mega kita ke landik pasal Adat, laban kita meri ma ti berat ngagai orang bukai, tang kita empu, indah ngena siti tunjuk jari pan enggai negu ma nya!

47 “Tulah meh kita, laban kita begagaka pendam ke bala nabi, tang bala aki ini kita udah munuh sida! 48 Kita ukai aja nemu utai ke digaga bala aki ini kita, tang kita mega setuju enggau pengawa sida. Sida munuh bala nabi, lalu kita ngaga pendam ke bala nabi. 49 Nya alai, Petara ke bepenemu-dalam madahka: ‘Aku deka ngirumka bala nabi enggau bala rasul ngagai sida, lalu sida deka munuh enggau merinsaka sekeda ari bala nabi enggau bala rasul. 50 Enggau nya, rebak tu deka dikumbai besalah ketegal darah semua sida nabi ke udah dibunuh kenyau ari penumbuh dunya,* 51 berengkah ari darah Abel nyentuk ngagai darah Sekariah, ke udah dibunuh ba entara Rumah Sembiang enggau alta.’ Au, aku madah ngagai kita: Rebak tu deka diukum ketegal nya.

52 “Tulah meh kita ke landik pasal Adat, laban kita ngambi kunchi kena muka pintu penemu pasal Petara. Kita empu enda tama, tang kita mega nagang orang bukai tama!”

53 Lebuh Jesus angkat ari endur nya, sida penulis Adat enggau orang Parisi balat amat deka ngelaban iya. Sida nanya iya mayuh macham utai, 54 lalu nganti iya nyebut utai ke tau dikena sida nyalahka iya.