Isaiah
33 Tulah meh nuan* ke nyerang, ke bedau diserang;
Tulah meh nuan ke nipu, ke bedau ditipu!
Pengudah nuan nyerang, nuan deka diserang.
Pengudah nuan nipu, nuan deka ditipu.
2 O Jehovah, kasih meh ke kami.
Nuan meh harapan kami.
Awakka Nuan nyadi pengering kami tiap pagi,
Lalu nyelamatka kami ba maya ti tusah.
3 Lebuh ninga munyi ti inggar, orang deka rari.
Lebuh nuan angkat, orang deka pambar.
4 Barang kita ke udah dirampas deka ditugungka, baka buntak ke tegar makai bekerumun;
Orang deka nyerebu barang kita, baka buntak ke datai beraban-raban.
5 Jehovah deka dimuliaka,
Laban Iya diau ba endur ti tinggi.
Iya deka ngasuh orang ba Sion ngereja utai ti adil sereta lurus.
6 Iya meh ke meri kita pengelikun;
Iya meh ke meri pengelepas ti besai, pemintar, penemu, enggau ati ti nangika Jehovah;
Nya meh reta iya.*
7 Peda! Bala pahlawan sida* rauh-rauh ba tengah jalai;
Orang ke mai pesan pengelikun nyau duie-duie nyabak.
8 Jalai besai puang;
Nadai orang ke nengah jalai nya.
9 Menua nya balat tusah ati* lalu nyadi puang.
Lebanon dikemaluka lalu nyadi reput.
Saron udah nyadi baka padang pasir,
Lalu daun ba Basan enggau Karmel ruruh magang.
10 “Diatu Aku deka angkat,” ku Jehovah,
“Diatu Aku deka ngemuliaka Diri;
Diatu Aku deka nunjukka kuasa Aku.
11 Kita ngandungka rumput rangkai, lalu ngadaka tangkai utai tanam.
Runding kita ti jai deka nganguska kita baka api.
12 Orang deka nyadi baka batu kapur ke udah ditunu.
Baka duri ke ditetak ke deka ditunu.
13 Kita ke ba endur ti jauh, pendingka utai ke deka dikereja Aku!
Kita ke ba endur ti semak, ngaku meh pemesai kuasa Aku!
14 Bala orang ke bedosa ba Sion berasai takut;
Orang ti limpang ke ngelaban Petara getar-getar takut:
‘Sapa ke ulih diau ba endur ke bisi api ti mau?
Sapa ke ulih diau ba tengah-tengah api ke enda ulih padam?’
15 Orang ke seruran bejalai dalam pengelurus,
Orang ke nyebut utai ti amat,
Orang ke nulak penguntung ke diulih enggau chara nipu sereta enda jujur,
Orang ke enda ngulurka jari lebuh diberi rasuah,
Orang ke nutup pending ngambika enda ninga pelan ke deka munuh orang,
Enggau orang ke mejamka mata ngambika enda meda utai ti jai,
16 Deka diau ba endur ti tinggi;
Iya deka belindung ba batu ti tegap;
Iya deka seruran bisi roti,
Lalu ai irup iya enda nemu abis.”
17 Bansa aku, kita deka meda raja ti bemulia;
Kita deka meda menua ti jauh.
18 Lebuh ati kita tekenangka* utai ti ngenakutka ke kala nyadi, kita deka nanya:
“Ni sekretari nya?
Ni orang ke nimbang chukai* nya?
Ni orang ke ngitung menara nya?”
19 Kita nadai agi meda orang ke sumbung,
Ke ngena jaku ti enda entu ditemu orang,
Iya nya jaku ke nyelai didinga sereta ke enda ulih dimeretika.
20 Peda meh Sion, kuta alai kitai ngintu pengerami!
Mata nuan deka meda Jerusalem nyadi endur diau ti bisi pengelantang,
Iya nya langkau kain ke enda dipindahka.
Paku langkau nya enda dichabut,
Lalu nadai siti pan tali langkau nya ke deka diputuska.
21 Ba endur nya, Jehovah, iya nya Iya ti Bemulia,
Deka ngelindung kitai baka sungai enggau saluran ai ti besai.
Nadai raban kapal perang ke deka kia,
Lalu nadai kapal ti besai ke deka mansa endur nya.
22 Laban Jehovah nya Hakim kitai,
Jehovah nya Petara ke meri kitai adat,
Jehovah nya Raja kitai;
Iya meh ke deka nyelamatka kitai.
23 Tali munsuh deka gerah;
Tiang kapal enda ulih didirika, lalu layar enda ulih dikerembaika.
Ba maya nya, mayuh barang ke dirampas deka dibagi;
Indah orang ke pinchat deka bulih mayuh utai.
24 Nadai orang ke diau ba menua nya deka madah: “Aku sakit.”
Penyalah orang ke diau ba menua nya deka diampunka.