Rome
4 Enti pia, nama utai ke ulih disebut kitai pasal aki kitai Abraham? 2 Enti Abraham dikumbai lurus ketegal utai ke digaga iya, iya tentu bisi kebuah deka temegahka diri. Tang iya enda ulih temegahka diri ba mua Petara. 3 Nama utai ke dipadah Bup Kudus? “Abraham arapka Jehovah,* lalu iya dikumbai lurus.” 4 Lebuh orang gawa, gaji ke diterima iya ukai ketegal pemanah ati tuke iya, tang ketegal iya endang patut nerima gaji nya. 5 Tang enti orang ke enda gawa arapka Petara, iya deka dikumbai lurus, taja pan iya bedosa. 6 Nya meh reti ku David lebuh iya bejaku pasal pengaga ati orang ke dikumbai Petara lurus, taja pan utai ke digaga iya enda entu sejalai enggau adat: 7 “Gaga ati meh orang ke ketegal penyalah sida udah diampunka* Petara, lalu dosa sida udah enda dikingatka agi. 8 Gaga ati meh orang ketegal dosa iya enda diperatika Jehovah agi.”
9 Kati semina orang ke disunat* aja ke ulih gaga ati baka nya? Tauka sida ke enda disunat mega ulih gaga ati baka nya? Baka ke udah disebut tadi: “Abraham dikumbai lurus ketegal iya arapka Petara.” 10 Kemaya Abraham dikumbai lurus? Sebedau iya disunat, tauka pengudah iya disunat? Iya dikumbai Petara lurus sebedau iya disunat. 11 Petara ngasuh iya besunat* nyadika tanda kena nunjukka* iya lurus, ketegal iya arap taja pan bedau disunat. Enggau nya, iya nyadi apai ngagai semua orang ke arap, ti bedau disunat, ngambika sida dikumbai Petara lurus. 12 Iya mega nyadi apai ngagai orang ke udah disunat, sereta ngagai orang ke arap, ke neladan apai kitai Abraham, sebedau iya disunat.
13 Semaya madahka, Abraham tauka bala peturun iya deka bempu dunya. Iya bulih semaya tu ukai ketegal iya ngasika adat, tang ketegal iya arapka Petara sereta dikumbai Petara lurus. 14 Enti orang ke bulih semaya nya orang ke ngasika adat, pengarap sida lebu ngapa lalu semaya nya nadai reti. 15 Kebendar iya, enti Adat dilanggar, nya ngasuh Petara ringat. Tang enti nadai adat, tentu nadai adat dilanggar.
16 Nya alai, kitai bulih semaya nya nengah pengarap, laban nya pemeri Petara ti pechuma ngagai kitai. Semua peturun Abraham mega nerima semaya nya, ukai semina sida ke ngasika Adat, tang mega sida ke arap baka apai semua kitai, Abraham. 17 (Tu endang amat, baka ke ditulis ba Bup Kudus: “Aku udah milih nuan nyadi apai ke mayuh bansa.”) Abraham arapka Petara, ke ngidupka orang mati. Petara meh ke nyebut pasal utai ke bedau nyadi. Lalu lebuh Iya bejaku pasal nya, utai nya baka ke udah nyadi. 18 Abraham andal sereta arap deka nyadi apai ke mayuh bansa, taja pan nya baka ke enda ulih nyadi ba iya. Iya arapka jaku Petara ti madahka: “Baka nya meh pemayuh peturun nuan.” 19 Maya nya, Abraham beumur kira-kira 100 taun, lalu Sarah nyau kelalu tuai deka ngadaka anak. Abraham ngumbai diri enda ulih agi bulih peturun. Taja pia, pengarap iya enda lemi. 20 Tang ketegal semaya ke diberi Petara ngagai iya, iya enda sekali-kali kakang tauka lemi pengarap. Pengarap iya ngasuh iya nyadi tegap, lalu iya ngemuliaka Petara. 21 Iya chukup andal, Petara ulih ngereja utai ke udah disemayaka Iya. 22 Nya alai, “ketegal pengarap iya, iya dikumbai Petara lurus.”
23 Taja pia, jaku “iya dikumbai Petara lurus” ukai semina ditulis ke iya aja, 24 tang mega ke kitai. Kitai mega deka dikumbai Petara lurus, laban kitai arapka Iya, ke udah ngidupka baru Tuan kitai, Jesus, ari mati. 25 Jesus dibunuh kena nebus dosa kitai, lalu iya diidupka baru ngambika kitai ulih dikumbai Petara lurus.