Satu John
5 Enti orang pechayaka Jesus nya Kristus, sida anak Petara. Barang sapa ke rinduka Apai mega rinduka bala anak Iya. 2 Kitai nemu kitai rinduka bala anak Petara, enti kitai rinduka Petara sereta ngereja utai ke dipesan Iya. 3 Enti kitai rinduka Petara, reti iya kitai ngasika pesan Iya lalu pesan Iya enda kelalu tusah dititihka. 4 Laban semua orang ke udah nyadi anak Petara, ulih ngalahka dunya. Pengarap kitai meh ke udah ngasuh kitai ngalahka dunya, lalu menang.
5 Sapa ke ulih ngalahka dunya? Endaka nya orang ke arapka Jesus nya Anak Petara? 6 Jesus Kristus udah datai nengah ai enggau darah. Iya datai ukai nengah ai aja, tang nengah ai enggau darah. Kuasa kudus meh ke besaksi pasal pekara tu, laban kuasa kudus meri saksi ti bendar. 7 Bisi tiga iti utai ke besaksi pasal pekara tu: 8 Kuasa kudus, ai, enggau darah, lalu ketiga iti utai nya meri saksi ti sama.
9 Enti kitai deka nerima saksi ke diberi mensia, tentu kitai deka agi nerima saksi ke diberi Petara, laban saksi nya besai agi. Nya ketegal Petara Empu ke udah meri saksi pasal Anak Iya. 10 Orang ke arapka Anak Petara, udah nerima saksi nya dalam ati iya. Tang orang ke enda arapka Petara udah ngasuh Petara nyadi Petara ti bula, laban orang nya enda arapka saksi ke diberi Petara pasal Anak Iya. 11 Tu meh saksi ke diberi Iya: Petara meri kitai pengidup ti meruan belama iya, lalu pengidup nya diterima kitai nengah Anak Iya. 12 Barang sapa ke nerima Anak nya, bulih pengidup ti meruan belama iya. Tang, barang sapa ke enda nerima Anak Petara, enda bulih pengidup nya.
13 Aku nulis semua utai tu ngagai kita ke arapka nama Anak Petara, ngambika kita nemu kita bisi pengidup ti meruan belama iya. 14 Tu meh utai ke dikeandalka* kitai ba Petara: Enti kitai minta nama-nama utai ti sejalai enggau peneka Iya, Iya ningaka kitai. 15 Enti kitai nemu Iya ningaka nama-nama utai ke dipinta kitai, kitai nemu kitai deka bulih utai ke dipinta kitai, laban kitai udah minta nya ari Iya.
16 Barang sapa ke meda menyadi diri ngereja dosa ke enda ngujungka pemati, patut besampika menyadi iya nya, lalu Petara deka meri pengidup ngagai menyadi iya. Au, Petara deka meri nya ngagai orang ke ngereja dosa ti enda ngujungka pemati. Taja pia, bisi dosa ke tau ngujungka pemati, lalu aku enda minta sapa-sapa besampika orang ke ngereja dosa ke baka nya. 17 Semua utai ti enda lurus nya dosa. Taja pia, bisi dosa ke enda ngujungka pemati.
18 Kitai nemu semua orang ke nyadi anak Petara enda terus ngereja dosa. Anak Petara* nyaga sida, lalu Sitan* enda ulih ngereja nama-nama utai ngagai sida.* 19 Kitai nemu kitai enggi Petara. Taja pia, serata dunya di baruh kuasa Sitan.* 20 Tang kitai nemu Anak Petara udah datai, lalu iya udah nulung kitai meretika utai,* ngambika kitai bulih penemu pasal Petara ti bendar. Kitai beserakup enggau Petara ti bendar nengah Anak Iya, Jesus Kristus. Tu meh Petara ti bendar, lalu tu meh pengidup ti meruan belama iya. 21 Bala anak, jauhka diri ari engkeramba.