Isaiah
49 O pulau, dingaka meh aku,
O bansa-bansa ke diau ba endur ti jauh, pendingka enggau manah.
Jehovah udah ngangauka aku sebedau aku ada.
Kenyau ari aku ba dalam kandung indai aku, Iya udah nyebut nama aku.
2 Iya ngaga mulut aku baka pedang ti tajam;
Iya ngelindung aku ngena jari Iya.
Iya ngaga aku baka anak panah ke udah diansah;
Iya ngelalaika aku ba dalam sarang anak panah Iya.
3 Ku Iya madah ngagai aku: “O Israel, nuan meh nembiak Aku,
Nengah nuan, Aku deka ngayanka mulia Aku.”
4 Tang aku madahka: “Utai ke dikereja aku nadai reti.
Lebu ngapa aku ngena pengering aku ke utai ti nadai guna.
Tang Jehovah meh ke deka ngakim aku,*
Lalu upah aku datai ari Petara aku.”
5 Jehovah meh ke nempa aku sereta ke ngaga aku nyadi nembiak Iya, kenyau ari maya aku dalam kandung.
Iya ke ngasuh aku mai Jakop pulai baru ngagai Iya,
Ngambika aku ngempuruka Israel lalu mai sida ngagai Iya.
Ba depan mata Jehovah, aku deka dimuliaka,
Lalu Petara aku deka nyadi pengering aku.
6 Iya madahka: “O nembiak Aku, nuan ukai aja
Deka ngangkatka baru raban bansa Jakop
Sereta mulaika baru orang Israel ke dilindung,
Tang nuan mega udah diserahka Aku nyadi penampak ke bansa bukai,
Ngambika pengelepas ari Aku ulih datai ngagai ujung dunya.”
7 Ku Jehovah, iya nya Penebus enggau Petara Israel ti Kudus, bejaku ngagai orang ke dikemaruhka, ke dipegedika bansa diri, sereta ke nyadi ulun bala pemerintah:
“Bala raja deka meda lalu angkat,
Bala tuai deka besugang
Laban Jehovah, Petara ti setia,
Petara Israel ti Kudus udah milih nuan.”
8 Tu meh utai ke dipadahka Jehovah:
“Ba timpuh Aku ngayanka pemanah ati, Aku nyaut nuan.
Ba hari pengelepas, Aku nulung nuan;
Aku seruran deka nyaga nuan ngambika nuan nyadi sempekat entara Aku enggau mensia,
Ngambika menua tu diaduka baru,
Ngambika pesaka ke udah ditinggalka sida diempu sida baru,
9 Ngambika bejaku ngagai orang ke dijil: ‘Pansut!’
Sereta madah ngagai orang ke ba dalam pemetang: ‘Ayanka diri!’
Sida deka makai ba sepemanjai jalai,
Lalu semua jalai ke ditengah sida* deka nyadi padang rumput sida.
10 Sida enda lapar tauka aus.
Mata panas tauka pengangat mata panas mega enda ngemediska sida.
Laban Aku, Petara ti pengasih, deka ngiring sida,
Lalu Aku deka ngiring sida ngagai pun penatai ai.
11 Aku deka ngaga semua gunung Aku nyadi jalai,
Lalu semua jalai besai Aku deka ditinggika.
12 Peda! Orang datai ari endur ti jauh;
Peda! Bisi ke datai ari utara, bisi ke datai ari barat,
Lalu bisi ke datai ari menua Sinim.”
13 O langit, manjung meh enggau ati ti gaga; O dunya, gaga ati meh.
O gunung, manjung meh enggau ati ti lantang.
Laban Jehovah udah ngelantangka bala nembiak Iya,
Lalu Iya kasihka bala nembiak Iya ti merinsa.
14 Tang Sion majak bejaku:
“Jehovah udah ninggalka aku, Jehovah udah enda ingatka aku.”
15 Kati ulih indai enda ingatka anak ke nusu ba iya?
Tauka enda kasihka anak dalam kandung iya?
Enti sema indai enda ingatka anak diri, Aku deka seruran ingatka nuan.
16 Peda! Aku udah ngukir nama nuan ba tapa jari Aku.
Dinding nuan seruran bisi ba depan Aku.
17 Bala anak nuan beguai pulai,
Lalu orang ke ngeruntuhka nuan sereta nganchurka nuan deka mupuk ari nuan.
18 Peda utai ke ngelingi nuan.
Semua sida benung begelumu,
Lalu sida datai ngagai nuan.
Ku Jehovah: “Aku besumpah atas nyawa Aku Empu,
Semua sida deka nyadi baka barang kemas ke dirasukka nuan,
Lalu dikena nuan baka barang kemas ke dikena pengantin indu.
19 Taja pan endur nuan udah dianchurka sereta ditinggalka, lalu menua nuan nyadi tembawai,
Tang diatu endur nuan deka nyadi kelalu sempit alai endur orang diau,
Lalu bala orang ke nelan nuan deka jauh ari nuan.
20 Lebuh nuan besebanaka anak ke bukai ke udah mati, anak nuan ke ada deka madah ngagai nuan:
‘Endur tu kelalu sempit.
Sediaka endur ngambika aku ulih diau ba ditu.’
21 Nuan deka bejaku dalam ati diri:
‘Sapa apai bala anak ke diberi ngagai aku tu?
Endaka anak aku udah mati, lalu aku indu ke mandul,
Dibuai menua lalu ditangkap orang?
Sapa ke ngemesaika sida?
Peda! Aku ditinggalka kediri-diri,
Nyadi, ari ni penatai bala anak tu?’”
22 Tu meh utai ke dipadahka Jehovah, Tuan ti Pemadu Tinggi:
“Peda! Aku deka ngangkatka jari Aku ngagai mayuh bansa,
Lalu Aku deka ngangkatka tanda Aku* ngambika dipeda orang.
Sida deka merap bala anak lelaki nuan,
Lalu manggaika bala anak indu nuan ba bau sida.
23 Bala raja deka nyadi orang ke nyaga nuan,
Lalu bala anak indu sida deka gawa ke nuan.*
Sida deka besugang ngagai nuan
Lalu nilat debu ba kaki nuan.
Nya baru nuan nemu Aku meh Jehovah;
Orang ke arapka Aku tentu enda dikemaluka.”
24 Ulih orang ke ditangkap dilepaska ari orang ti kering?
Tauka ulih orang ke ditabanka pemerintah ti kejam diselamatka?
25 Tang tu utai ke dipadahka Jehovah:
“Indah orang ke ditangkap orang ti kering deka dilepaska,
Lalu orang ke ditabanka pemerintah ti kejam deka diselamatka.
Aku deka ngelaban orang ke ngelaban nuan,
Lalu Aku deka nyelamatka bala anak nuan.
26 Aku deka ngasuh orang ke merinsaka nuan makai isi sida empu;
Sida deka mabuk ketegal ngirup darah diri empu, baka ke ngirup wain ti manis.
Nya baru semua orang deka nemu Aku meh Jehovah,
Penyelamat nuan enggau Penebus Nuan,
Petara Jakop ti Bekuasa.”