1 Samuel
16 Pengujung iya, Jehovah bejaku ngagai Samuel: “Ni pengelama nuan agi tusah ati ke Saul? Aku enda agi nerima iya nyadi raja orang Israel. Isika minyak ke dalam tanduk lalu mupuk. Aku deka nganjung nuan ngagai Jesi, orang Betlehem, laban Aku udah milih siku ari anak lelaki iya nyadi raja.” 2 Tang Samuel nyaut: “Baka ni ku aku ulih ngereja nya? Enti Saul nemu pasal tu, iya tentu deka munuh aku.” Disaut Jehovah: “Bai siku anak sapi lalu padahka: ‘Aku datai laban deka nyerahka pemeri ngagai Jehovah.’ 3 Bai Jesi enggau nuan nyerahka pemeri nya. Udah nya, Aku deka madahka utai ke patut digaga nuan. Nuan patut nata orang ke dipandangka Aku ngagai nuan.”
4 Samuel ngereja utai ke diasuh Jehovah. Lebuh iya datai ba Betlehem, bala tuai ba kuta nya takut lebuh betemu enggau iya. Ku sida nanya: “Kati penatai nuan mai pengelantang?” 5 Disaut Samuel: “Au, aku datai deka nyerahka pemeri ngagai Jehovah. Tuchi diri empu lalu titihka aku.” Pengudah Jesi enggau bala anak lelaki iya nuchi diri, Samuel mai sida nyerahka pemeri. 6 Lebuh sida datai, Samuel meda Eliap lalu berunding: “Iya tentu orang ke ditata Jehovah.” 7 Tang Jehovah bejaku ngagai Samuel: “Anang beratika gamal enggau peninggi iya, laban ukai iya ke dipilih Aku. Chara Petara meda enda sama enggau chara mensia meda laban mensia meda gamal, tang Jehovah meda ati.” 8 Udah nya, Jesi ngangauka Abinadap lalu mai iya ngagai Samuel. Tang Samuel madah: “Iya mega enda dipilih Jehovah.” 9 Jesi mai Samah, tang ku Samuel: “Iya pan enda dipilih Jehovah.” 10 Baka nya meh Jesi mai tujuh iku anak lelaki iya ngagai Samuel. Tang ku Samuel madah ngagai Jesi: “Nadai siku pan ari sida nya dipilih Jehovah.”
11 Pengujung iya, Samuel nanya Jesi: “Semua tu aja anak lelaki nuan?” Disaut Jesi: “Bisi siku agi, ke bunsu. Iya benung ngibun bedus.” Ku Samuel: “Asuh iya datai. Kitai enda ulih makai seagi-agi iya bedau datai.” 12 Nya alai, Jesi ngasuh orang ngangauka anak bunsu iya. Anak iya nya agi biak, sigat gamal, lalu mata iya narit ati. Udah nya, Jehovah madahka: “Bediri lalu tata iya. Iya meh orang ke dipilih Aku.” 13 Nya alai, Samuel ngambi tanduk ke diisi enggau minyak lalu nata David ba depan bala menyadi iya. Kenyau ari sehari nya, Jehovah meri David kuasa kudus Iya. Udah nya, Samuel pulai ngagai Ramah.
14 Kuasa kudus Jehovah udah ninggalka Saul, lalu Jehovah nejuka runding Saul empu* ngasuh Saul merinsa. 15 Bala ulun Saul madah ngagai iya: “Petara udah nejuka runding nuan ngasuh nuan merinsa. 16 Enti nuan setuju, asuh kami ngiga siku orang ke landik nebah belikan.* Tiap kali Petara nejuka runding nuan ngasuh nuan merinsa, orang nya deka nebah belikan ngambika nuan berasai nyamai.” 17 Nya alai, Saul madah ngagai bala ulun iya: “Giga meh siku orang ke landik nebah belikan lalu bai iya ngagai aku.”
18 Siku ari ulun iya madahka: “Aku kala meda siku ari anak Jesi, orang Betlehem, landik nebah belikan. Iya siku pahlawan ti kuat sereta berani. Iya mega sigat, lanchar bejaku, lalu Jehovah bisi enggau iya.” 19 Nya alai, Saul nganjung orang ngagai Jesi lalu madahka: “Asuh anak nuan, David, ke ngibun bedus, datai ngagai aku.” 20 Nya alai, Jesi ngambi roti, kambut kulit ti diisi enggau wain, sereta anak kambin, lalu ngengkahka semua nya ba atas siku keledai. David mai semua nya ngagai Saul. 21 David pan datai ngagai Saul, lalu berengkah gawa ke iya. Saul majak rinduka David, lalu David nyadi orang ke mai senyata ke iya. 22 Saul nganjung pesan ngagai Jesi: “Awakka David mengkang gawa ke aku, laban aku rinduka iya.” 23 Tiap kali Petara nejuka runding Saul ngasuh iya merinsa, David ngambi belikan lalu nebah iya. Pengudah nya, Saul berasai nyamai sereta lantang ati, lalu runding iya pan tenang.