Isaiah

Aku ngemuliaka Nuan lalu muji nama Nuan,

Laban Nuan udah ngereja utai ti ngalitka ati,

Utai ke udah ditentuka Nuan kenyau ari kelia menya.

 2 Nuan udah ngerubuhka kuta nyadi tugung batu,

Lalu kuta ti tegap diruntuhka.

Menara orang asing deka nadai agi,

Lalu enda sekali-kali didirika baru.

 3 Nya meh kebuah bansa ti kering deka ngemuliaka Nuan,

Lalu kuta bansa ti kejam deka takutka Nuan.

 4 Nuan nyadi kubu ti teguh ke orang ti nadai daya,

Nyadi kubu ti teguh ke orang ti miskin ke benung tusah,

Nyadi endur belindung ari kabut,

Sereta nyadi endur beteduh ari pengangat mata panas.

Lebuh pengeringat orang ti kejam datai baka kabut ke mangka dinding,

 5 Sereta baka pengangat mata panas ba tanah ti rangkai,

Nuan madamka panjung orang asing.

Baka pengangat mata panas ke alah laban ayuk remang,*

Baka nya meh lagu orang ti kejam deka badu agi bemunyi.

 6 Ba gunung tu, Jehovah, ketuai soldadu serega, deka ngatur ke semua orang

Pengerami ke bisi pemakai ti pemadu manah,

Pemakai ti pemadu manah ke penuh enggau dagin ti manah;*

Pengerami ke bisi wain ti manah,

Wain ti manah ke udah ditapis.

 7 Ba gunung tu, Iya deka muai* kain ke mungkur semua orang

Enggau kain ke malut semua bansa.

 8 Iya deka nelan* pemati belama iya;

Jehovah, Tuan ti Pemadu Tinggi, deka ngendas ai mata ari tiap iku orang,

Lalu muai pemalu ke diasaika bala nembiak Iya ba serata dunya,

Laban Jehovah Empu udah bejaku.

Iya meh harapan kitai,

Lalu Iya deka nyelamatka kitai.

10 Jari Jehovah deka nyaga* gunung tu,

Lalu Moap deka diindik ba endur iya empu,

Baka rumput rangkai ke diindik ba tugung tai ke dikena nyadi baja.

11 Iya deka ngunjurka jari Iya malu Moap,

Baka orang ke ngunjurka jari maya nyemerai.

Ngena jari Iya ti sikar,

Iya deka narit penyumbung Moap ke baruh.

12 Kuta Moap ti teguh ke bisi dinding ti tinggi

Deka diruntuhka Iya;

Semua nya deka dirubuhka Iya nyadi debu.