Jaku-Dalam
8 Endaka penemu-dalam majak ngangau?
Endaka pemereti ati benung manjung?
2 Iya bisi ba endur ti tinggi;
Iya bisi ba tisi jalai sereta ba simpang jalai.
3 Ba pintu kuta,
Ba pintu penama,
Iya majak manjung enggau nyawa ti inggar:
4 “Aku ngangauka bala kita;
Aku bejaku enggau semua orang ngena nyawa ti inggar.
5 Kita ke nadai pengalaman, belajar meh berunding enggau dalam;
Kita ke beli, uji meh ngulihka ati ti nemu meretika utai.
6 Dingaka aku, laban utai ke disebut aku tu penting.
Aku nyebut utai ti betul,
7 Laban mulut aku nyebut utai ti bendar,
Lalu aku begedika utai ti jai.
8 Semua utai ke pansut ari mulut aku, amat magang.
Nadai seleka pan jaku aku nipu tauka beputar belit.
9 Semua utai ke disebut aku nyentuk ba orang ke bisi runding ti dalam,
Lalu ba orang ke bepenemu, jaku aku nya betul magang.
10 Terima meh disiplin aku, ukai pirak;
Terima meh penemu, ukai emas ti tulin,
11 Laban penemu-dalam berega agi ari batu ti berega;*
Nadai utai ke dikinginka nuan ulih dibandingka enggau nya.
12 Aku tu meh penemu-dalam; aku bisi runding ti dalam.
Aku bisi penemu sereta nemu berunding enggau manah.
13 Reti nangika Jehovah nya begedika penyai.
Aku begedika penyumbung, ulah ti temegahka diri, ulah ti jai, enggau jaku ti bula.
14 Aku bisi penemu-dalam enggau jaku ajar ti manah;
Aku bisi kuasa enggau penau ulih meretika utai.
15 Aku nulung bala raja merintah;
Aku nulung bala pegawai tinggi meri atur ti adil.
16 Aku nulung bala pemerintah mengkang merintah;
Aku mega nulung bala orang ke tinggi pangkat ngakim enggau adil.
17 Aku rinduka orang ke rinduka aku;
Barang sapa ke begigaka aku deka tetemuka aku.
18 Aku bisi pengaya enggau mulia;
Aku bisi pesaka enggau pengelurus ti meruan belama iya.
19 Utai ke diberi aku manah agi ari emas, indah ari emas ti tulin;
Utai ke diterima nuan ari aku manah agi ari pirak ti tulin.
20 Aku bejalai nengah pengelurus,
Ba tengah-tengah jalai ti adil;
21 Aku meri pesaka ti berega ngagai sida ke rinduka aku,
Lalu aku deka ngemenuhka setor sida.
22 Aku tu ti pemadu dulu digaga Jehovah;
Keterubah pengawa ke dikereja Iya dulu kelia.
23 Ari kelia menya aku udah digaga;
Kenyau ari pun, sebedau dunya digaga.
24 Aku diadaka sebedau tasik bisi,
Sebedau ai melumpa ari mata ai.
25 Sebedau gunung digaga,
Sebedau bukit bisi, aku endang udah diadaka;
26 Sebedau Petara ngaga dunya enggau padang iya,
Tauka sebedau gumpal tanah ti keterubah digaga.
27 Aku endang udah bisi ba dia lebuh Iya mintarka langit,
Lebuh Iya ngaga garis entara langit enggau tasik,
28 Lebuh Iya ngengkahka remang* ba langit,
Lebuh Iya ngaga mata ai ba dalam tasik,
29 Lebuh Iya ngaga atur ke tasik,
Ngambika ai tasik enda ngelui batas ke udah ditetapka Iya;
Lebuh Iya ngaga asas dunya,
30 Aku bisi ba sepiak Iya; aku nyadi tukang ti landik.
Aku meh pengaga ati Iya ninting hari;
Aku seruran gaga ati ba depan Iya;
31 Aku gaga ati lebuh meda dunya ulih alai diau,
Lalu ke pemadu dikerinduka aku, iya nya mensia.
32 Nya alai, anak, pendingka aku;
Orang ke nitihka jalai aku deka gaga ati.
33 Pendingka disiplin aku lalu nyadi orang ke bepenemu;
Anang nulak disiplin aku.
34 Gaga ati meh orang ke mendingka aku,
Ke datai tumu ngagai pintu aku ninting hari,
Ke nganti semak pintu penama rumah aku,
35 Laban orang ke tetemuka aku deka bulih pengidup,
Lalu Jehovah deka lantang ati ke iya.
36 Tang orang ke enda pedulika aku ngemediska diri empu,
Lalu orang ke begedika aku rinduka pemati.”