Pengulu

4 Tang, pengudah Ehut mati, orang Israel sekali agi ngereja utai ti jai ba mata Jehovah. 2 Nya alai, Jehovah nyerahka* sida ngagai Jabin, iya nya raja orang Kanaan, ke merintah ba Hasor. Ketuai soldadu iya benama Sisera, ke diau ba Haroset-ha-goim. 3 Raja Jabin bisi 900 iti kerita kuda kena beperang, lalu roda kerita kuda nya bisi dipasangka pedang besi. Iya balat amat merinsaka orang Israel pengelama 20 taun. Nya alai, orang Israel ngangauka Jehovah minta tulung.

4 Maya nya, siku nabi indu ke benama Deborah nyadi hakim orang Israel. Iya bini Lapidot. 5 Iya selalu duduk ba baruh pun kayu engkerema ke enggi iya, ke ba entara Ramah enggau Bethel, ba kawasan begunung ba Efraim. Orang Israel deka datai ngagai iya kia kena nemu saut ari Petara. 6 Iya ngasuh orang ngirumka pesan ngagai Barak anak Abinoam ke datai ari Kedes-naptali. Tu pesan iya ngagai Barak: “Jehovah, Petara orang Israel, udah meri nuan pesan tu: ‘Bai 10,000 iku orang ari raban bansa Naptali enggau raban bansa Sebulun, lalu mansang kita ngagai* Gunung Tabor. 7 Aku deka ngasuh ketuai soldadu Jabin, iya nya Sisera, kerita kuda iya, enggau soldadu iya ngagai Sungai* Kison, lalu Aku deka nyerahka sida ngagai nuan.’”

8 Ku Barak madah ngagai Deborah: “Aku deka mupuk enti nuan enggau aku. Tang, enti nuan enda, enda ga aku mupuk.” 9 Ku Deborah nyaut: “Aku tentu deka enggau nuan. Tang, perang tu enda meri mulia ngagai nuan, laban Jehovah deka nyerahka Sisera ngagai siku indu.” Deborah lalu mupuk enggau Barak ngagai Kedes. 10 Barak pan mai raban bansa Sebulun enggau raban bansa Naptali ngagai Kedes, lalu bisi 10,000 iku orang nitihka iya. Deborah mega mupuk enggau iya.

11 Maya nya, Heber udah nyeraraka diri ari orang Keni ke bukai, lalu nirika langkau kain iya ba Kedes, semak enggau pun kayu ti besai ba Sananim. Heber nya orang Keni ke datai ari peturun Hobap, iya nya entua Moses ke lelaki.

12 Sisera nerima berita pasal Barak anak Abinoam udah niki ngagai Gunung Tabor. 13 Sisera lalu terus ngempuruka semua bala soldadu iya enggau semua kerita kuda iya. Bisi 900 iti kerita kuda iya ke dipasangka pedang besi. Sida mupuk ari Haroset-ha-goim ngagai Sungai Kison. 14 Deborah lalu madah ngagai Barak: “Mansang nuan, laban seharitu Jehovah deka nyerahka Sisera ngagai nuan. Jehovah tentu bisi enggau nuan.” Barak enggau 10,000 iku orang ke enggau iya pan nurun ari Gunung Tabor. 15 Lebuh Barak nyerang, Jehovah ngasuh Sisera, semua kerita kuda iya, enggau semua soldadu iya charut. Pengujung iya, Sisera pan nurun ari kerita kuda iya, lalu ngerarika diri. 16 Barak begagaika kerita kuda enggau bala soldadu Sisera sampai ngagai Haroset-ha-goim. Nyadi, semua soldadu Sisera mati magang dibunuh ngena pedang. Nadai siku pan ditejuka idup.

17 Sisera ngerarika diri ngagai langkau kain Jael, iya nya bini siku orang Keni ke benama Heber, laban Jabin, iya nya raja Hasor, bisi kaul ti manah enggau ruang bilik Heber. 18 Udah nya, Jael pansut lalu betemu enggau Sisera. Ku iya madah ngagai Sisera: “Tama meh tuan. Anang takut.” Iya lalu tama ngagai langkau kain Jael, lalu Jael pan mungkur iya enggau pua. 19 Udah nya, Sisera madah ngagai Jael: “Aus mai aku tu. Beri meh aku ai irup mimit.” Nyadi, Jael pan muka kambut kulit ke udah diisi enggau ai tusu, lalu meri iya ngirup. Udah nya, Jael mungkur iya ngena pua baru. 20 Sisera madah ngagai Jael: “Bediri ba penama langkau kain, lalu enti bisi orang datai lalu nanya nuan: ‘Bisi orang ba ditu?’ padahka: ‘Nadai!’”

21 Tang udah nya, Jael, bini Heber nya, ngambi paku langkau kain enggau tukul. Lebuh Sisera jenak tinduk ketegal lelak, iya begadai-gadai datai semak ngagai Sisera, lalu mantang paku nya ba begian tisi pala iya sampai tembus ke tanah. Sisera pan mati.

22 Udah nya, Barak ke benung begigaka Sisera pan datai. Jael pan pansut lalu betemu enggau iya. Ku Jael bejaku enggau iya: “Kitu nuan. Aku deka nunjukka nuan lelaki ke digiga nuan.” Barak pan tama ngagai langkau kain enggau Jael, lalu iya tepedaka Sisera mati garing-garing, laban pala iya kebus ketegal paku langkau.

23 Ba hari nya, Petara nyerahka Jabin, iya nya raja orang Kanaan, ngagai orang Israel, ngambika orang Israel menang. 24 Orang Israel majak kuat-sekuat ngelaban Jabin, raja orang Kanaan nya, dataika iya nyau mati dibunuh sida.