Pemungkal

1 Ba pun iya kelia, Petara ngaga langit* enggau dunya.

2 Maya nya, dunya agi kusung sereta nadai nama-nama utai. Ba dini-dini endur, semina bisi ai ti dalam* lalu semua endur nya petang, lalu kuasa* Petara mindah kin kia ba atas ai.

3 Udah nya Petara bejaku: “Awakka bisi penampak.” Lalu penampak pan bisi.

4 Lebuh Petara meda penampak nya manah, Iya berasai puas ati. Lalu Petara nyeraraka penampak ari pemetang. 5 Penampak nya dikumbai Petara, Siang. Lalu pemetang dikumbai Iya, Malam. Malam enggau pagi pan abis. Nya meh hari keterubah.

6 Udah nya Petara bejaku: “Awakka bisi ruang ti besai kena magi ai, lalu awakka ai nya dibagi nyadi dua.” 7 Nya alai, Petara ngaga ruang ti besai kena nyeraraka ai ba baruh ruang nya enggau ba atas ruang nya. Utai nya pan lalu nyadi. 8 Ruang nya dikumbai Petara, Langit. Malam enggau pagi pan abis. Nya meh hari kedua.

9 Lalu Petara bejaku: “Awakka ai ba baruh langit disimpan ba siti endur ngambika tanah ayan.” Utai nya pan lalu nyadi. 10 Tanah nya dikumbai Petara, Darat. Lalu ai dikumbai Iya, Tasik. Lebuh Petara meda nya manah, Iya berasai puas ati. 11 Udah nya Petara bejaku: “Awakka tanah mansutka rumput sereta mansutka semua macham utai tumbuh ke bisi leka enggau pun buah ke bisi buah ti beleka.” Utai nya pan lalu nyadi. 12 Lalu tanah pan mansutka rumput sereta semua macham utai tumbuh ke bisi leka enggau pun buah ke bisi buah ti beleka. Lebuh Petara meda semua nya manah, Iya berasai puas ati. 13 Malam enggau pagi pan abis. Nya meh hari ketiga.

14 Udah nya Petara bejaku: “Awakka utai ke meri penampak bisi ba langit kena nyeraraka siang ari malam sereta kena nunjukka hari, musin, enggau taun. 15 Utai nya deka manchar ari langit lalu meri penampak ngagai dunya.” Utai nya pan lalu nyadi. 16 Nya alai, Petara ngaga mata panas enggau bulan. Mata panas manchar* maya siang hari, lalu bulan manchar maya malam hari. Kelimpah ari nya, Petara mega ngaga bintang. 17 Petara ngengkahka semua utai nya ba langit ngambika manchar ngagai dunya. 18 Petara ngereja nya ngambika bisi penampak maya siang enggau malam hari, sereta nyeraraka penampak ari pemetang. Lebuh Petara meda nya manah, Iya berasai puas ati. 19 Malam enggau pagi pan abis. Nya meh hari keempat.

20 Udah nya Petara bejaku: “Awakka ai penuh enggau utai ti idup,* lalu awakka utai idup ke besayap terebai ba langit.” 21 Nya alai, Petara ngaga utai ti idup ke besai ba tasik. Iya mega ngaga mayuh macham utai idup ke bukai ba ai enggau utai idup ke besayap. Lebuh Petara meda semua nya manah, Iya berasai puas ati. 22 Petara lalu merekatka semua utai ti idup nya. Ku Iya: “Awakka semua utai nya beranak enggau mayuh lalu ngemenuhka tasik. Lalu awakka utai idup ti besayap majak mayuh ba dunya.” 23 Malam enggau pagi pan abis. Nya meh hari kelima.

24 Udah nya Petara bejaku: “Awakka bisi semua macham jelu ba dunya: Jelu tupi, jelu ti ngerayap,* enggau jelu liar.” Utai nya pan lalu nyadi. 25 Nya alai, Petara lalu ngaga semua macham jelu liar, jelu tupi, enggau jelu ti ngerayap. Lebuh Petara meda semua nya manah, Iya berasai puas ati.

26 Udah nya Petara bejaku: “Aram tua* ngaga mensia sama baka tua.* Awakka sida bekuasa atas serata dunya, iya nya bekuasa atas ikan ba tasik, utai idup ti besayap,* jelu tupi, enggau semua macham jelu ti ngerayap.” 27 Nya alai, Petara lalu ngaga mensia sama baka Iya. Iya ngaga lelaki enggau indu. 28 Petara lalu merekatka seduai iya. Ku Iya bejaku ngagai seduai iya: “Beranak betelesak, lalu ngemenuhka dunya. Bekuasa meh ba serata dunya. Nyadi meh tuan atas bala ikan, utai idup ti besayap, enggau semua macham jelu.”

29 Udah nya Petara bejaku: “Aku meri semua macham utai tumbuh* ba serata dunya, enggau semua macham pun buah* nyadika pemakai seduai. 30 Aku mega meri semua macham utai tumbuh ba dunya nyadika pemakai semua jelu liar, semua utai idup ti besayap, enggau semua macham jelu ke bukai.” Utai nya pan lalu nyadi.

31 Udah nya, Petara meda semua utai ke digaga Iya nya manah magang, lalu Iya berasai puas ati. Malam enggau pagi pan abis. Nya meh hari keenam.