Isaiah
55 Datai meh semua kita ke aus, datai meh ngambi ai!
Kita ke nadai duit, datai meh lalu ambi* utai diempa lalu makai!
Au, datai meh ngambi* wain enggau ai tusu ke enda ibuh dibayar.
2 Nama kebuah kita majak meli utai ke ukai pemakai ti amat?
Lalu nama kebuah kita majak mansutka belanja* ke utai ti enda ngasuh puas ati?
Dingaka aku enggau manah, lalu empa meh utai ti manah.
Nya baru kita deka balat rindu ati makai utai diempa ti pemadu manah.
3 Pendingka meh enggau manah, lalu datai ngagai Aku.
Dinga meh lalu kita deka mengkang idup.
Aku sedia deka ngaga sempekat ti meruan belama iya enggau kita,
Sejalai enggau pengerindu ti setia ke diayanka ngagai David, lalu nya tau dikearapka.
4 Peda! Aku ngasuh iya nyadi saksi ke mayuh bansa,
Nyadi kepala enggau pemerintah mayuh bansa.
5 Peda! Nuan deka ngangauka siti bansa ke enda dikelala nuan,
Lalu orang ari bansa ke enda ngelala nuan deka belanda ngagai nuan.
Sida ngereja nya ketegal Petara nuan, Jehovah, Petara Israel ti kudus,
Laban Iya deka ngemuliaka nuan.
6 Giga meh Jehovah kala Iya agi ulih ditemu.
Kangauka Iya kala Iya agi semak.
7 Awakka orang jai ninggalka jalai iya,
Awakka orang jai ninggalka runding iya,
Awakka iya pulai baru ngagai Jehovah ke deka kasihka iya,
Ngagai Petara kitai, laban Iya gerah jari ngampunka orang.
8 “Laban runding Aku enda baka runding kita,
Lalu jalai Aku lain ari jalai kita,” ku Jehovah.
9 “Jalai Aku tinggi agi ari jalai kita,
Lalu runding Aku tinggi agi ari runding kita,
Baka langit ke tinggi agi ari dunya.
10 Baka ujan enggau seleju ke nurun ari langit,
Lalu enda nikal nyentukka dunya basah lalu ngasilka utai tumbuh,
Sereta meri benih ke ditanam enggau pemakai ke diempa,
11 Baka nya mega enggau jaku ke pansut ari mulut Aku.
Jaku Aku enda nikal ngagai Aku enti nadai asil;
Jaku Aku tentu deka ngasuh utai nyadi baka ke dikerinduka Aku,*
Lalu deka mujur ngereja utai ke dikedekaka Aku.
12 Kita deka mupuk enggau ati ti gaga,
Lalu dibai pulai dalam pengelantang.
Lebuh kita datai, gunung enggau bukit deka manjung gaga ati,
Lalu semua pun kayu ba padang deka betempik jari.
13 Pun juniper deka tumbuh kena nganti babas ti beduri,
Lalu pun mirtel deka nganti utai tumbuh ti beduri.
Nya deka ngasuh Aku, Jehovah, nyadi tebilang,*
Lalu nya mega deka nyadi tanda ti meruan ke enda ulih padam.”