Isaiah
66 Tu utai ke dipadahka Jehovah:
“Serega nya kerusi diraja Aku, lalu dunya nya pelasar kaki Aku.
Ni rumah ke deka digaga kita ke Aku?
Ba dini endur Aku berehat?”
2 “Jari Aku Empu udah ngaga semua utai nya.
Nya meh kebuah semua utai nya bisi,” ku Jehovah.
“Aku deka malik ngagai siku tu,
Aku deka malik ngagai orang ke baruh ati sereta ke anchur ati, ke nangika jaku Aku.
3 Orang ke nyayat sapi baka orang ke munuh orang.
Orang ke nyerahka bedus nyadika pemeri baka orang ke matahka rekung ukui.
Orang ke nyerahka pemeri baka orang ke meri darah babi nyadika pemeri.
Orang ke nunu menyan putih baka orang ke madahka berekat ngena jaku puchau.*
Sida milih jalai sida empu,
Lalu sida rinduka utai ti keji.
4 Lebuh Aku ngangau, nadai orang nyaut;
Lebuh Aku bejaku, nadai orang mending.
Sida majak ngereja utai ti jai ba mata Aku,
Lalu sida milih ngereja utai ti enda ngelantangka ati Aku.
Nya alai, Aku deka ngiga chara kena ngukum sida,
Lalu Aku deka ngasuh utai ke diketakutka sida ninggang sida.”
5 Kita ke nangika jaku Jehovah, dingaka jaku Iya:
“Bala menyadi kita ke begedika kita sereta ke enggai nerima kita ketegal nama Aku madahka: ‘Awakka Jehovah dimuliaka!’
Aku deka ngayanka Diri lalu mai pengaga ati ngagai kita,
Tang sida deka dikemaluka.”
6 Bisi bunyi orang begau ari kuta, bisi bunyi ari Rumah Sembiang!
Nya bunyi Jehovah malas bala munsuh Iya setipak enggau pengawa sida.
7 Sebedau indu nya berasai pedis, iya udah dulu beranak.
Sebedau iya ngasaika pemedis beranak, iya udah ngadaka siku anak lelaki.
8 Sapa kala ninga utai ke baka nya?
Sapa kala meda utai ke baka nya?
Ulih siti menua diadaka dalam sehari?
Tauka ulih siti bansa diadaka semua sekali?
Taja pia, lebuh Sion berasai pedis, iya lalu terus ngadaka bala anak lelaki.
9 “Kati Aku deka ngasuh anak ke nyau deka ada, enda nyadi ada?” ku Jehovah.
“Tauka kati Aku deka ngasuh siku indu beranak, lalu udah nya nutup sarang anak iya?” ku Petara nuan.
10 Semua kita ke rinduka Jerusalem, gaga ati meh sereta lantang ati meh enggau iya.
Semua kita ke tusah ati ke iya, awakka kita balat gaga ati enggau iya.
11 Laban Jerusalem deka ngibun kita baka siku indai ke nusuka anak iya sampai anak iya kenyang.
Kita deka berasai puas ati sereta amat gaga ati laban iya udah dimuliaka.
12 Tu meh utai ke dipadahka Jehovah:
“Aku deka meri iya pengelantang baka sungai,
Sereta meri iya mulia ari mayuh bansa baka ai ti deras.
Kita deka nusu lalu diberap,
Lalu kita deka dipangku.
13 Aku deka seruran merindang kita,
Baka siku indai ke merindang anak iya;
Kita deka rindang ati ketegal Jerusalem.
14 Lebuh kita meda utai nya, kita deka berasai gaga ati.
Tulang kita deka mansang baka rumput ti baru tumbuh.
Kuasa Aku, Jehovah, deka ditemu bala nembiak Aku,
Lalu Aku deka ngayanka pengeringat Aku ngagai bala munsuh Aku.”
15 “Aku, Jehovah, deka datai baka api,
Lalu kerita kuda Aku baka kabut,
Aku deka malas ngena pengeringat ti balat.
Aku deka ngukum ngena api ti mau.
16 Ngena api enggau pedang,
Aku, Jehovah, deka ngukum semua orang;
Aku, Jehovah, deka munuh mayuh orang.
17 “Orang ke nguduska diri sereta nuchi diri ngambika ulih tama ngagai taman ti kudus,* ke makai dagin babi, tikus, enggau pemakai ti keji deka dipunaska magang,” ku Jehovah. 18 “Ketegal Aku nemu pasal pengawa sida enggau runding sida, Aku deka ngempuruka orang ari semua bansa enggau bansa jaku. Sida deka datai lalu meda mulia Aku.”
19 “Aku deka meri siti tanda ngagai sida. Aku deka nganjung sekeda orang ke udah selamat ngagai mayuh bansa, iya nya ngagai Tarsis, Pul, enggau Lut. Orang ke diau ba dia landik ngena panah. Aku mega deka nganjung sida ngagai Tubal, Jaban, enggau pulau-pulau ti jauh. Orang ke diau ba endur nya nadai kala ninga pasal Aku tauka meda mulia Aku. Orang ke dianjung Aku deka madahka mulia Aku ngagai mayuh bansa. 20 Sida deka mai semua menyadi kita pansut ari semua bansa nyadika pemeri ke Aku, Jehovah. Sida deka nepan kuda, baghal,* unta, kerita kuda, enggau kerita sapi ngagai gunung Aku ti kudus, iya nya Jerusalem. Sida deka ngereja nya baka orang Israel ke mai pemeri dalam pekekas ti beresi ngagai rumah Aku, Jehovah,” ku Jehovah.
21 “Aku mega deka ngambi sekeda ari sida nyadi imam enggau orang Lewi,” ku Jehovah.
22 “Baka langit baru enggau dunya baru ke digaga Aku deka meruan bisi ba depan Aku, baka nya meh bala peturun kita enggau nama kita deka meruan,” ku Jehovah.
23 “Ari bulan siti ngagai bulan siti lalu ari minggu siti ngagai minggu siti,
Semua orang deka datai lalu besugang nyembah Aku,” ku Jehovah.
24 “Sida deka pansut lalu meda bangkai orang ke udah ngelaban Aku.
Ulat ba bangkai nya enda mati,
Api ke nunu bangkai nya enda padam,
Lalu bangkai nya deka nyadi utai ke dikejika semua orang.”