Isaiah
5 Aku deka belagu ke Iya ti dikesayauka aku.
Lagu tu pasal Iya sereta kebun anggur Iya.
Iya ti dikesayauka aku bisi kebun anggur ba lereng bukit ti subur.
2 Iya nyangkul tanah sereta muai batu.
Iya nanam anggur mirah ke udah dipilih.
Nirika menara ba tengah kebun nya,
Lalu numbak endur alai nganchurka anggur.
Iya ngarapka kebun nya ngasilka anggur ti manah,
Tang kebun nya semina ngasilka anggur ti jai.
3 “Nya alai, bala rayat Jerusalem enggau Judah,
Akim meh sapa ke salah, Aku tauka kebun anggur Aku.
4 Nama agi utai ke patut digaga Aku ngagai kebun anggur Aku?
Nama agi utai ke bedau digaga Aku?
Aku ngarapka Diri bulih anggur ti manah,
Tang nama kebuah kebun Aku ngasilka anggur ti jai?
5 Diatu, Aku deka madah ngagai kita
Nama utai ke deka digaga Aku ngagai kebun anggur Aku:
Aku deka muai pagar iya,
Lalu nejuka iya ditunu.
Aku deka mechahka dinding batu iya,
Lalu nejuka iya diindik.
6 Aku deka nejuka iya pia aja;
Iya enda dijarau tauka dichangkul.
Babas ke beduri enggau lalang deka ngelamun iya,
Lalu Aku deka nagang remang* ngambika enda mai ujan kia.
7 Orang Israel nya kebun anggur Jehovah, ketuai soldadu serega;
Orang Judah nya utai tanam ke dikerinduka Iya.
Iya ngarapka sida adil,
Tang utai ti enda adil ke nyadi;
Iya ngarapka sida lurus,
Tang sabak orang ke merinsa ke didinga.”
8 Tulah meh orang ke ngerampas rumah kena nambahka rumah diri,
Sereta ngerampas tanah kena nambahka tanah diri,
Nyentukka orang bukai nyau enda ampit
Lalu kitai diau kediri-diri ba menua nya!
9 Aku bisi ninga Jehovah, ketuai soldadu serega, besumpah
Mayuh rumah ti besai sereta manah
Deka nyadi endur ti ngenakutka,
Lalu nadai orang diau ba dia.
10 Sepuluh ekar* kebun anggur semina deka ngasilka 22 liter* wain,
Lalu 10 bakul* benih semina deka ngasilka sebakul* gandum aja.
11 Tulah meh orang ke dani tumu pagi laban deka ngirup ai bisa.
Sida ngirup sampai malam nyentukka sida enda tetagangka ulah diri!
12 Sida bisi belikan* enggau perengka musik ke betali,
Tamborin, kesuling, enggau wain maya sida rami.
Tang sida enda berundingka utai ke digaga Jehovah,
Lalu sida enda beratika pengawa Iya.
13 Bala nembiak aku deka dibuai ngagai menua bukai
Ketegal sida kurang penemu.
Bala sida ke dipebasa deka lapar,
Lalu semua sida deka merinsa ketegal aus.
14 Kubur* nelengaka diri lalu nyadi majak besai,
Sereta merangapka nyawa enggau besai;
Bala orang Jerusalem ke tinggi pangkat, ke ragak, sereta ke rindu berami
Tentu deka ditelan iya magang.
15 Orang deka ngenduk,
Sida deka dikemaruhka.
Orang ke sumbung deka dikemaruhka.
16 Jehovah, ketuai soldadu serega, deka ditinggika laban Iya adil;*
Petara ti bendar, Petara ti kudus, deka nguduska Diri nengah pengelurus.
17 Bala anak bedus deka makai rumput baka ke makai ba padang rumput sida empu;
Orang asing deka makai ba endur ke nadai orang nguan, ke kala alai jelu ti gemu diau.
18 Tulah meh orang ke narit dosa enggau penyalah ngena pemula
Baka jelu ke narit kerita ngena tali.
19 Ku sida madah: “Awakka Iya ngereja utai enggau jampat;
Awakka pengawa Iya digaga enggau lengkas ngambika kami ulih meda Iya.
Awakka tuju* Petara Israel ti Kudus nyadi
Ngambika kami nemu.”
20 Tulah meh orang ke nyebut utai ti manah nya jai lalu utai ti jai nya manah,
Ke ngumbai pemetang nya terang lalu terang nya pemetang,
Sereta ke madahka pait nya manis lalu manis nya pait!
21 Tulah meh orang ke ngumbai diri pintar
Sereta ngumbai diri bepenemu-dalam!
22 Tulah meh orang ke jaguh ngirup wain
Sereta orang ke landik nyampur ai bisa,
23 Ke ngelepaska orang jai pengudah nerima rasuah,
Sereta ke enda adil ngagai orang ke lurus.
24 Nya alai, baka tangkai utai tanam ke diempa api
Sereta baka rumput rangkai ke ngeriut ditunu,
Urat sida deka buruk,
Lalu bungai sida deka dikebuka baka debu,
Ketegal sida nulak adat* Jehovah, ketuai soldadu serega,
Sereta enda bebasaka jaku Petara Israel ti Kudus.
25 Nya meh kebuah pengeringat Jehovah ngagai bala nembiak Iya mau baka api.
Iya deka ngunjurka jari Iya lalu ngukum sida.
Gunung-gunung deka begegar,
Lalu bangkai sida deka nyadi baka sampah ba jalai.
Nya meh kebuah pengeringat Iya bedau agi padam,
Lalu Iya agi ngunjurka jari Iya kena ngukum sida.
26 Iya meri tanda* ngagai bansa ke ba endur ti jauh.
Iya bersiul* ngambika sida datai ari ujung dunya.
Peda! Jampat amat sida datai.
27 Nadai siku ari bala sida ke lelak tauka labuh.
Nadai siku ke ngantuk tauka tinduk.
Tali pinggang sida enda gerah,
Lalu tali selipar sida enda putus.
28 Semua anak panah sida tajam magang,
Lalu semua panah sida sedia deka nimbak.
Tunjing kuda sida kering baka batu,
Lalu roda kerita kuda sida deras baka ribut.
29 Sida rauh-rauh baka singa ti negung;
Sida rauh-rauh baka anak singa.
Sida manjung lalu nerekam mansa sida
Sida nabanka mansa nya lalu nadai orang ulih nyelamatka iya.
30 Ba hari nya, sida deka manjung pengudah nangkap mansa.
Bunyi iya baka ai tasik ke begelumbang.
Sapa-sapa ke meda menua nya deka meda pemetang enggau penusah;
Indah langit deka nyadi petang ketegal remang.