Dua Korint
4 Kami bisi pengawa ti kudus tu, laban Petara kasihka kami. Nya alai, kami enda putus pengarap.* 2 Kami nulak pekara ke dilalai ti ngemaluka. Kami enda ngena pemula sereta enda nyarutka jaku Petara, tang kami ngasuh pemendar nyata dipeda. Enggau nya, ba mua Petara, kami nyadi teladan ti manah ke ati* tiap iku orang. 3 Enti Berita Manah ke dikerembaika kami nya ditutup, Berita Manah nya ditutup ba bala sida ke deka dipunaska. 4 Runding sida ke enda arap udah dibutaka petara dunya* tu. Nya alai, penampak Berita Manah ti bemulia, iya nya Berita Manah pasal Kristus ke ngambarka Petara, enda manchar ngagai sida. 5 Kami ukai nginjil pasal diri empu. Tang kami nginjil pasal Jesus Kristus nya Tuan kitai, sereta pasal kami ke nyadi ulun kita ketegal Jesus. 6 Petara Empu kala madahka: “Awakka penampak manchar ari pemetang,” lalu nengah mua Kristus, Petara ngasuh penemu ti bemulia pasal Iya manchar ngagai ati kami.
7 Taja pan kami semina baka periuk ke digaga ari tanah liat, tang reta nya disimpan ba dalam kami. Nya alai, kuasa ke ngelui ari pengering mensia ke diterima kami nya datai ari Petara, ukai ari kami empu. 8 Kami diansak ari semua endur, tang kami enda diempit nyentukka enda ulih engkebut; kami charut runding, tang enda nyentukka kami nadai jalai pansut;* 9 kami diperinsa, tang kami enda ditinggalka; kami dipalu ngambika kami rebah, tang kami enda mati. 10 Baka Jesus, kami seruran betan napi utai ke tau nabanka nyawa, ngambika pengidup Jesus nyata ba tubuh kami. 11 Kami idup, tang pemati seruran deka nabanka nyawa kami, ketegal kami nitihka Jesus, ngambika pengidup Jesus nyata ba tubuh kami. 12 Nya alai, taja pan kami seruran napi utai ke tau nabanka nyawa, tang nya meri kita pengidup.
13 Baka ke udah ditulis ba Bup Kudus: “Aku arapka Petara, nya alai aku bejaku”; kami mega arapka Petara, nya alai kami bejaku. 14 Kami nemu, Petara ke udah ngidupka Jesus baru mega deka ngidupka kami baru, ngambika begulai enggau Jesus, lalu mai kitai ngagai Jesus. 15 Semua nya nyadi ke penguntung kita. Laban enti majak mayuh orang beterima kasih ngagai Petara kena ngemuliaka Iya, majak mayuh orang ke deka nerima pemanah ati Iya ti besai.
16 Nya alai, kitai enda putus pengarap.* Taja pan tubuh kitai majak lemi, tang ninting hari, ati enggau runding kitai dikeringka baru. 17 Taja pan pemerinsa* ke ditapi kitai nya enda lama sereta enda kelalu balat, tang nya ngasuh kitai bulih mulia ti amat besai sereta meruan belama iya. 18 Kitai beratika utai ke enda ulih dipeda, ukai utai ke ulih dipeda. Laban utai ke ulih dipeda enda tan lama, tang utai ke enda ulih dipeda meruan belama iya.