Dua Timoti
2 Nya alai, anak aku, terus meh ngulihka pengering ari pemanah ati ti besai ke bisi ba Jesus Kristus. 2 Pasal utai ke udah didinga nuan ari aku, ke disukung mayuh saksi, serahka utai nya ngagai orang ke tetap ati, ngambika sida layak ngajar orang bukai. 3 Besedia meh napi pemerinsa nyadi soldadu Jesus Kristus ti manah. 4 Orang ke nyadi soldadu enda enggau orang bedagang,* ngambika iya ulih ngelantangka ati orang ke ngerejista iya nyadi soldadu. 5 Nambahka nya, orang ke bepekit enda diberi makota enti iya enda nitihka atur maya bepekit. 6 Orang ke betanam ke bagas gawa patut nyadi orang keterubah ke makai asil utai ke diketau iya. 7 Terus meh berundingka utai ke disebut aku tu. Tuan deka nulung nuan meretika semua utai.
8 Kingatka, Jesus Kristus udah diidupka baru ari mati, lalu iya siku ari peturun David. Nya sejalai enggau Berita Manah ke ditusui aku. 9 Aku merinsa sereta dijil baka orang ke ngereja penyalah ketegal Berita Manah nya. Taja pia, jaku Petara enda ulih dirantai. 10 Nya alai, aku terus betan napi semua utai ke penguntung sida ke dipilih Petara, ngambika sida pan ulih diselamatka nengah Jesus Kristus lalu bulih mulia ti meruan belama iya. 11 Jaku tu tau dikearapka. Enti kitai mati enggau iya, kitai mega deka idup enggau iya. 12 Enti kitai terus betan, kitai mega deka merintah nyadi raja enggau iya. Enti kitai enggai ngaku diri ngelala iya, iya mega enggai ngaku diri ngelala kitai. 13 Taja pan kitai enda tetap ati, Petara deka mengkang tetap ati laban Iya enda ulih ngelaban Diri Empu.
14 Terus meh ngingatka sida pasal utai tu, lalu ba mua Petara, beri meh jaku lalau* ngagai sida ngambika enda belaya pasal leka jaku, laban pengawa nya nadai guna lalu ulih ngemediska* orang ke ninga. 15 Bebendar meh ngayanka diri ngagai Petara nyadi orang ke diterima Iya, nyadi pekereja ke enda malu enggau pengawa diri, sereta nyadi orang ke ngena jaku Iya* enggau betul. 16 Tang, anang mendingka jaku ti nadai reti ke ngelaban utai ti kudus, laban nya deka ngasuh orang majak enda bebasaka Petara. 17 Jaku ke baka nya deka ngelekai baka penyakit gangren.* Entara sida ke nusui jaku ke baka nya, nyengkaum Himinius enggau Piletus. 18 Seduai iya udah limpang ari pemendar, lalu madahka pengangkat ari mati udah nyadi. Sekeda orang lenyau pengarap ketegal seduai iya. 19 Taja pia, pugu ti tegap ke diengkahka Petara deka mengkang bediri entap lalu ba dia bisi ditulis,* “Jehovah ngelala sida ke enggi Iya,” sereta, “Awakka tiap iku orang ke ngangauka nama Jehovah ngelengkaka utai ti enda lurus.”
20 Ba siti rumah ti besai, ukai aja bisi perengka* ke digaga ari emas enggau pirak, tang bisi mega perengka ke digaga ari kayu enggau tanah liat. Sekeda perengka dikena maya bisi pengawa besai, lalu sekeda perengka dikena besehari-sehari. 21 Nyadi, barang sapa ke ngenyauhka diri ari perengka ke dikena besehari-sehari deka nyadi perengka ke dikena maya bisi pengawa besai. Iya deka dikuduska nyadi perengka ti beguna ke tuan iya sereta besedia deka ngereja tiap iti pengawa ti manah. 22 Nya alai, rari ari pengingin ke dikembuan maya agi nembiak, tang bebendar meh ngulihka pengelurus, pengarap, pengerindu, sereta pengelantang,* begulai enggau sida ke ngangauka Tuan enggau ati ti tuchi.
23 Nambahka nya, seliahka kelikuh ti beli sereta nadai reti, laban nuan nemu, nya deka ngasuh orang belaya. 24 Nya ketegal ulun Petara enda ibuh belaya, tang iya patut manah ati enggau semua orang.* Iya patut layak ngajar, nemu nagang diri lebuh orang ngereja utai ti jai ngagai iya, 25 sereta nelap lebuh ngajar orang ke udu ngelaban. Engka Petara deka ngawakka sida nesal ati,* lalu bulih penemu ti betul pasal pemendar. 26 Enggau nya, sida engka nyau sedar lalu ngelepaska diri ari panjuk Sitan,* ke nangkap sida idup-idup kena ngereja peneka iya.