Jaku-Dalam
6 Anak, enti nuan udah nyadi penjamin utang ke orang bukai,
Enti nuan udah besetuju* enggau orang ke enda dikelala nuan,
2 Enti nuan udah disintak semaya nuan empu,
Reti iya nuan udah dipanjuk jaku nuan empu.
3 Anak, lepaska meh diri empu ari orang nya;
Nuan udah labuh ngagai jari iya.
Nya alai, mupuk lalu kemaruhka diri empu, jejampat meh minta kasih ari iya.
4 Anang tinduk tauka ngasuh mata nuan pejam,
Seagi-agi nuan bedau ngereja nya.
5 Lepaska diri empu baka kijang ke ngelepaska diri ari orang ke ngasu,
Baka burung ke ngelepaska diri ari orang ke nangkap burung.
6 Kita ke buruk, peratika pengidup semut;
Belajar meh ari semut lalu nyadi orang ke bepenemu.
7 Taja pan semut nadai pemerintah, pegawai, tauka ketuai,
8 Tang sida nemu besimpanka pemakai maya musin panas,
Lalu nemu ngumpul pemakai maya musin ngetau.
9 Kita ke buruk, berapa lama kita deka majak gali?
Kemaya kita deka angkat?
10 Tinduk meh sekejap, pejamka mata kita enda lama,
Lipatka jari kita, berehat meh enda lama,
11 Lalu kita deka jampat nyadi miskin, baka perumpak ke ngenyit datai nyerang kita,
Baka orang ke besenyata ke datai ngambi semua utai ke enggi kita.
12 Orang ke jai sereta nadai guna kulu-kili nusui pemula;
13 Iya ngijapka mata, lalu ngaga tanda ngena kaki enggau tunjuk jari iya, lebuh iya nusui pemula.
14 Ati iya penuh enggau penyai,
Iya seruran ngaga pelan deka ngereja utai ti jai sereta ngasuh laya nyadi.
15 Ketegal nya, penusah deka ngenyit ninggang iya;
Dalam sekejap aja iya deka dianchurka lalu enda ulih ditulung agi.
16 Bisi enam iti utai ke dipegedika Jehovah;
Bisi tujuh iti utai ke ngasuh Iya berasai keji:
17 Mata ti merening orang enggau sumbung, dilah ti bula, jari ti munuh orang ke nadai penyalah,
18 Ati ti berundingka pelan ti jai, kaki ti berumban ngereja penyai,
19 Saksi pelesu ke seruran nyebut utai ti bula,
Sereta orang ke ngasuh laya nyadi entara pangan diri.
20 Anak, titihka pesan ke diberi apai nuan;
Anang enda ibuhka utai ke diajar indai nuan.
21 Tentuka semua nya seruran ditanam ba lubuk ati nuan;
Gantungka nya ba rekung nuan.
22 Iya deka nguluka nuan lebuh nuan bejalai;
Iya deka nyaga nuan lebuh nuan tinduk;
Lalu iya deka ngajar nuan lebuh nuan dani.
23 Laban pesan nya lampu kelita,
Adat nya penampak,
Lalu jaku rara enggau disiplin nya jalai ke nuju ngagai pengidup.
24 Semua nya deka nyaga nuan ari indu ti jai,
Ari jaku manis indu ke enda bemoral.*
25 Anang tekait ati ketegal pemajik iya,
Lalu anang alah dipanjuk jeling mata iya.
26 Lelaki ke ngiga pelacur semina ulih meli setuku roti aja;
Lalu bini ke curang deka ngasuh lelaki ke enggau iya gila lenyau nyawa.
27 Kati ulih kini orang ngengkahka api ba dada diri lalu gari iya enda angus?
28 Tauka ulih kini orang bejalai ngindik bara api lalu kaki iya enda betu?
29 Baka nya mega enggau orang ke tinduk* enggau bini orang bukai;
Barang sapa ke murus bini orang sigi deka diukum.
30 Orang enda ngemaruhka penchuri
Enti iya enchuri ketegal iya lapar.
31 Tang enti iya ditemu enchuri, iya patut mayar tujuh kali lipat;
Iya patut nyerahka semua utai ti berega ke bisi ba rumah iya.
32 Barang sapa ke ngereja ulah seks ti kamah enggau bini orang endang sigi enda nemu berunding;
Iya semina ngenusahka diri empu.
33 Iya deka bulih pemedis sereta enda dibasa orang,
Lalu iya deka seruran ngetatka pemalu.
34 Ati ti chemburu* ngasuh laki balat ringat;
Iya nadai penyinu lebuh iya malas dendam.
35 Iya enggai nerima ganti rugi;
Ka ngemayuh ni hadiah diberi, enda meh ulih ngasuh ati iya chelap.