Surat Kereja Rasul
19 Lebuh Apollos ba Korint, Paul mansang ngagai Epesus nengah jalai ke jauh ari tebing tasik. Ba din, iya betemu enggau sekeda murid, 2 lalu nanya sida: “Lebuh kita nyadi orang ke arap, kati kita bisi nerima kuasa kudus Petara?” Ku sida nyaut: “Nadai. Indah ninga pasal kuasa kudus Petara deh, kami enda kala.” 3 Nya alai iya nanya: “Enti pia, baka ni chara kita dibaptisa?” Ku sida nyaut: “Kami dibaptisa baka ke diajar John.” 4 Paul madahka: “Baptisa John nya tanda orang udah nesal ati, lalu John ngasuh sida arapka Jesus, iya nya orang ke datai pengudah iya.” 5 Pengudah ninga nya, sida iya pan dibaptisa dalam nama Tuan Jesus. 6 Lebuh Paul ngengkahka jari iya ba atas sida, sida nerima kuasa kudus Petara lalu belabuh bejaku ngena bansa jaku bukai sereta nusui pesan ari Petara. 7 Penyampau semua sida kira-kira 12 iku lelaki.
8 Pengelama tiga bulan, Paul tama ngagai balai gempuru lalu bejaku enggau berani. Iya meri cheramah sereta besilih penemu enggau orang ngambika sida andalka Perintah Petara. 9 Tang sekeda orang ari bala sida kieh* sereta enggai arap. Sida indah nyebut utai ti jai pasal Jalai Tuan ba mua orang mayuh. Nya alai, Paul ninggalka sida lalu mai bala murid enggau iya. Tiap hari, Paul meri cheramah ba diwan sekula Tiranus. 10 Paul ngereja nya pengelama dua taun nyentukka semua orang ba Asia, enda ngira orang Judah tauka orang Gerika, ninga jaku Petara.
11 Petara terus ngaga pengawa ajih ti ngalitka ati nengah Paul. 12 Indah bisi orang mai kain enggau perecha* Paul ngagai orang ke sakit lalu sida gerai. Melikat ti jai mega pansut ari sida. 13 Tang sekeda orang Judah ke bejalai ba serata endur, ke muru melikat ti jai, mega nguji ngena nama Tuan Jesus muru melikat ti jai. Sida bejaku ngagai orang ke dirasuk melikat ti jai: “Dalam nama Jesus ke dipadahka Paul, aku ngasuh nuan pansut.” 14 Pengawa nya dikereja tujuh iku anak lelaki tuai imam orang Judah ke benama Skeba. 15 Tang melikat ti jai madah ngagai sida: “Aku ngelala Jesus. Aku mega ngelala Paul. Tang kita tu, sapa deh?” 16 Lalu orang ke dirasuk melikat ti jai nya nerekam sida sereta ngalahka sida siku-siku, nyentukka sida ngerarika diri ari rumah nya nyau telanjai-lanjai sereta bakal. 17 Semua orang Judah enggau orang Gerika ke diau ba Epesus nyau nyadi takut pengudah sida nemu pasal utai ke nyadi nya. Lalu nama Tuan Jesus terus dikemesaika. 18 Mayuh orang ke udah arap datai lalu ngaku ba mua orang mayuh pasal pengawa ti jai ke udah dikereja sida. 19 Nambahka nya, mayuh orang ke nemu pengawa magik* ngumpul bup sida, lalu nunu bup nya ba mua orang mayuh. Pengudah diitung, sida nemu rega semua bup nya 50,000 singkap duit pirak. 20 Nya alai, enggau chara ti ngalitka ati, jaku Jehovah majak ngelekai sereta majak bekuasa.
21 Pengudah utai nya nyadi, Paul ngaga pemutus deka mansang ngagai Jerusalem pengudah iya ngagai Masedonia enggau Akaya. Ku iya bejaku: “Pengudah ngagai Jerusalem, aku mega patut ngagai Rome.” 22 Nya alai, Paul nganjung dua iku penulung iya, iya nya Timoti enggau Erastus, ngagai Masedonia. Tang iya empu diau lama mimit ba Asia.
23 Maya nya, penyarut ti besai nyadi ke bekaul enggau Jalai Tuan. 24 Ba dia, bisi siku tukang ke benama Demetrius, ke nemu ngaga utai ari pirak. Iya ngaga rumah sembiang ti mit ari pirak ke petara Artemis, lalu nya mai penguntung ti besai ngagai orang ke sama enggau iya gawa. 25 Iya ngempuruka sida sereta bala tukang ke bukai ke mega ngaga utai ari pirak. Ku iya madah ngagai sida: “Bala kaban, kita nemu pengaya kitai datai ari pengawa dagang tu. 26 Kita empu udah ninga sereta meda nama utai ke udah digaga orang ke benama Paul, ukai aja ba Epesus, tang mega ba nyauka semua endur ba Asia. Iya mujur narit ati mayuh orang sereta nguingka sida ngambika arapka jaku iya ti madahka petara ke digaga mensia nya ukai petara ti bendar. 27 Nambahka nya, tu deka mai penanggul ti besai laban orang deka nyebut utai ti jai pasal pengawa dagang kitai. Orang deka ngumbai rumah sembiang petara Artemis ti bemulia nya nadai guna, lalu petara Artemis ke disembah semua orang ba Asia sereta ba serata dunya enda dimuliaka agi.” 28 Pengudah ninga nya, sida balat ringat lalu manjung: “Muliaka meh Artemis, petara orang Epesus!”
29 Nya alai, penyarut nyadi ba nengeri nya. Semua sida beguai tama ke dalam stadium. Sida mega ngirit Gaius enggau Aristarkus enggau sida. Seduai iya orang Masedonia ke sama bejalai enggau Paul. 30 Kebendar iya, Paul empu deka tama betemu enggau orang mayuh nya. Tang bala murid nagang iya. 31 Indah sekeda kaban Paul, ke ngatur pengerami sereta ngatur orang bepekit, ngirumka pesan ngagai iya, enda ngasuh iya tama ngagai stadium nya laban nya tau ngemediska iya. 32 Semua orang ke begelumu ba dia balat charut sereta bekerauh begau. Sekeda nyebut tu, lalu sekeda nyebut nya. Mayuh ari bala sida enda nemu nama kebuah sida begelumu ba dia. 33 Nya alai, sida ngasuh Aleksander bejaku, laban orang Judah udah ngeju iya ke mua. Iya lalu meri tanda ngena jari iya laban iya deka nerangka utai ke nyadi. 34 Tang pengudah sida nemu iya orang Judah, semua sida bela manjung pengelama kira-kira dua jam: “Muliaka meh Artemis, petara orang Epesus!”
35 Pengujung iya, datuk bandar ba nengeri nya mujur ngasuh orang badu agi begau. Ku iya bejaku: “Orang Epesus, sapa ke enda nemu Epesus nya nengeri ke nyaga rumah sembiang Artemis ti bemulia sereta ke nyaga engkeramba iya ke labuh ari langit? 36 Ketegal utai tu enda ulih dibantah, kita enda patut begau sereta enda patut beguai-guai ngereja utai. 37 Kita udah mai dua iku orang tu kitu, taja pan seduai iya enda ngerumpak rumah sembiang tauka ngeleseka petara kitai. 38 Enti Demetrius enggau bala tukang ke bukai deka bedawaka orang, sida ulih mai orang tu ngagai bala gabenor maya hari pechara. Maya nya, awakka sida bedawaka pangan diri. 39 Tang enti kita deka ngereja utai lebih agi ari nya, kita patut nerangka iya ba kunsil nitihka undang-undang. 40 Utai ke nyadi seharitu tau mai penanggul ti besai ngagai kitai, laban orang ulih bedawaka kitai mai penyarut. Kitai nadai utai ke ulih dipadahka kena nerangka kebuah orang tu begau.” 41 Pengudah nyebut nya, iya ngasuh sida pulai.