Bansa Israel ti Kedua
6 Maya nya, Solomon lalu madah: “Jehovah, Nuan madahka Nuan deka diau dalam remang* ti chelum nya. 2 Diatu aku udah ngaga siti Rumah ti bemulia ke Nuan, siti endur ti tetap alai Nuan diau belama iya.”
3 Udah nya, raja nguing lalu merekatka semua orang Israel ke benung bediri ba dia. 4 Ku iya bejaku: “Awakka Jehovah, Petara orang Israel, dipuji! Iya udah besemaya ngagai apai aku, David, ngena mulut Iya Empu, lalu udah ngamatka semaya Iya ngena jari Iya Empu. Iya kala madahka: 5 ‘Kenyau ari Aku mai bala nembiak Aku, Israel, pansut ari menua Ejip, Aku lalu bedau milih siti kuta ba serata kawasan raban bansa Israel nyadika endur alai ngaga siti Rumah, ngambika nama Aku mengkang ba dia. Aku mega bedau milih siku tuai ke bala nembiak Aku, Israel. 6 Tang, Aku udah milih Jerusalem ngambika nama Aku mengkang ba dia, lalu Aku udah milih David merintah bala nembiak Aku, Israel.’ 7 Apai aku, David, amat ingin deka ngaga siti Rumah kena ngemuliaka nama Jehovah, Petara orang Israel. 8 Tang, Jehovah madah ngagai apai aku, David: ‘Nuan amat ingin deka ngaga siti Rumah kena ngemuliaka nama Aku. Manah nya! Nuan bisi ati deka ngereja nya. 9 Taja pia, ukai nuan ke deka ngaga Rumah nya. Tang anak nuan empu, ke deka ada dudi hari, iya meh ke deka ngaga Rumah kena ngemuliaka nama Aku.’ 10 Jehovah udah ngamatka semaya Iya. Aku udah duduk ba kerusi diraja Israel lalu nganti apai aku nyadi raja, baka ke udah disemayaka Jehovah. Aku mega udah ngaga siti Rumah kena ngemuliaka nama Jehovah, Petara orang Israel. 11 Ba Rumah nya, aku udah ngengkahka peti lampang batu Adat. Dalam peti nya bisi sempekat ke digaga Jehovah enggau orang Israel.”
12 Udah nya, iya bediri ba depan alta Jehovah, ba depan semua raban gempuru Israel. Iya ngangkat kedua-dua jari iya. 13 (Solomon udah ngaga siti pentas temaga, lalu ngengkahka pentas nya ba tengah laman. Pemanjai pentas nya lima kiubit,* buka iya lima kiubit, lalu peninggi iya lima kiubit. Iya lalu bediri ba atas pentas nya.) Iya besugang ba depan semua raban gempuru Israel, iya ngangkat kedua-dua jari iya ke langit, 14 lalu besampi: “O Jehovah, Petara orang Israel, nadai Petara bukai ke baka Nuan, enda ngira ba serega tauka ba dunya. Nuan ngamatka sempekat Nuan, lalu ngayanka pengerindu ti setia ngagai bala nembiak Nuan ke nyembah Nuan enggau pengabis ati. 15 Nuan udah ngamatka semaya Nuan ngagai apai aku, David. Nuan udah besemaya ngena mulut Nuan Empu, lalu seharitu Nuan udah ngamatka semaya nya ngena jari Nuan Empu. 16 O Jehovah, Petara orang Israel, keamatka mega semaya tu, iya nya semaya ke udah disebut Nuan ngagai apai aku, David, lebuh Nuan madah: ‘Enti bala peturun nuan beratika pengidup diri empu lalu nitihka jalai Aku, baka ke digaga nuan, peturun nuan deka seruran duduk ba kerusi diraja Israel ba depan Aku.’ 17 Nya alai, O Jehovah, Petara orang Israel, awakka semaya Nuan ngagai nembiak Nuan, David, apai aku, dikeamatka.
18 “Tang, kati Petara amat deka diau enggau mensia ba dunya tu? Indah langit, au, serata langit pan enda chukup besai ke Nuan. Anang agi Rumah ke udah digaga aku tu! 19 O Jehovah, Petara aku, dingaka meh sampi aku sereta utai ke dipinta aku, nembiak Nuan tu. Dingaka aku lebuh aku besampi sereta minta tulung ba depan Nuan. 20 Awakka mata Nuan beratika Rumah tu siang enggau malam. Pasal endur tu, Nuan udah madah, nama Nuan deka bisi ba dia. Nya alai, pendingka meh nembiak Nuan lebuh iya besampi nunga endur tu. 21 Pendingka meh utai ke dipinta nembiak Nuan sereta bala nembiak Nuan, Israel, lebuh sida besampi nunga endur tu. Awakka Nuan ninga ari endur Nuan diau ba serega. Au, awakka Nuan ninga lalu ngampunka kami.
22 “Enti bisi orang dituduh ngereja utai ti salah lalu diasuh besumpah,* lalu udah nya iya mansang ngagai alta ba Rumah tu, 23 dingaka meh ari serega lalu akim meh nembiak Nuan nya. Awakka orang ke jai diukum nitihka penyalah ke udah dikereja iya. Awakka orang ke lurus dikumbai enda salah lalu diberi upah nitihka utai manah ke udah dikereja iya.
24 “Enti bala nembiak Nuan, Israel, alah laban munsuh ketegal sida majak bedosa ngagai Nuan, lalu udah nya sida pulai baru ngagai Nuan, ngemuliaka nama Nuan, lalu besampi sereta bebendar minta kasih ba depan Nuan ba Rumah tu, 25 dingaka meh ari serega lalu ampunka meh dosa bala nembiak Nuan, Israel. Bai meh sida pulai ngagai menua ke udah diberi Nuan ngagai sida sereta ngagai aki ini sida.
26 “Lebuh langit ditutup lalu hari enda ujan ketegal sida majak bedosa ngagai Nuan, lalu udah nya sida besampi nunga endur tu, ngemuliaka nama Nuan, sereta nesal ati ke dosa sida ketegal Nuan udah ngasuh sida baruh ati,* 27 dingaka meh ari serega lalu ampunka meh dosa bala penyembah Nuan, iya nya bala nembiak Nuan, Israel. Ajar meh sida jalai ti manah ke patut ditengah sida, lalu asuh meh ujan nurun ba menua ke udah diberi Nuan ngagai sida nyadika pesaka.
28 “Enti menua tu ditinggang lapar pungkang tauka penyakit berampit, enti utai ditanam diserang penyakit,* diserang seraban buntak ke kuat makai tauka kena angin ti angat, enti kuta bala nembiak Nuan dikelulung munsuh, enti bala nembiak Nuan ditinggang penulah tauka penyakit, 29 lalu udah nya enti siku tauka semua nembiak Nuan, Israel, ngangkat jari nunga Rumah tu deka besampi tauka minta kasih (ketegal tiap iku orang nemu penusah sereta pemedis diri empu), 30 dingaka meh ari endur Nuan diau ba serega. Ampunka sida lalu beri upah ngagai tiap iku sida sejalai enggau semua utai ke udah dikereja sida, laban Nuan nemu ati sida. Semina Nuan siku aja ke amat-amat nemu utai ke bisi dalam ati mensia. 31 Nya deka ngasuh sida nangika Nuan, lalu nitihka jalai Nuan sepemanjai sida idup ba menua ke diberi Nuan ngagai aki ini kami.
32 “Perundingka mega orang asing ke ukai sebagi ari nembiak Nuan, Israel, ke udah datai kitu ari menua ti jauh ketegal nama Nuan ti mulia enggau jari Nuan ti kering sereta bekuasa, lalu iya datai sereta besampi nunga Rumah tu, 33 dingaka meh ari endur Nuan diau ba serega. Keamatka meh semua utai ke dipinta orang asing nya ngambika semua orang ba dunya nemu nama Nuan sereta nangika Nuan, baka nembiak Nuan, Israel. Sida mega deka nemu nama Nuan bisi ba Rumah ke udah digaga aku tu.
34 “Enti Nuan nganjung nembiak Nuan beperang ngelaban munsuh sida, enda ngira dini alai sida, lalu sida besampi ngagai Nuan nunga kuta ke udah dipilih Nuan tu sereta nunga Rumah ke udah digaga aku, 35 dingaka meh sampi sereta utai ke dipinta sida lalu tulung sida.
36 “Enti sida bedosa ngagai Nuan (laban nadai siku mensia ke enda bedosa), lalu Nuan ringat ngagai sida, nejuka sida alah sereta ditabanka munsuh, lalu sida dibai ngagai menua ti jauh tauka semak, 37 tang lebuh sida ditangkap ba menua munsuh, enti sida nyau sedar lalu nguing ngagai Nuan, sereta minta kasih ngagai Nuan lalu madah: ‘Kami udah bedosa sereta ngereja utai ti salah. Kami udah ngereja utai ti jai,’ 38 lalu enti sida nguing ngagai Nuan enggau pengabis ati sereta enggau pengabis pengidup lebuh sida ba menua munsuh ke nabanka sida, sereta besampi nunga menua ke udah diberi Nuan ngagai aki ini sida, kuta ke udah dipilih Nuan sereta Rumah ke udah digaga aku ke nama Nuan, 39 dingaka meh ari endur Nuan diau ba serega, sampi sida sereta utai ke dipinta sida, lalu tentuka sida dilayan enggau adil. Ampunka meh nembiak Nuan ke udah bedosa ngagai Nuan.
40 “O Petara aku, awakka nuan mendingka semua sampi ke disebut ari* endur tu. 41 O Petara Jehovah, awakka Nuan enggau peti ke ngambarka pengering Nuan belelak ba endur tu. O Petara Jehovah, awakka bala imam Nuan nunjukka Nuan ulih nyelamatka orang.* Awakka bala nembiak Nuan ti setia gaga ati ketegal pemanah Nuan. 42 O Petara Jehovah, anang nulak orang ke udah ditata Nuan. Awakka Nuan ingatka pengerindu Nuan ti setia ngagai nembiak Nuan, David.”