Isaiah
41 “O pulau, anang bemunyi lalu pendingka meh Aku;
Awakka semua bansa bulih pengering sida baru.
Awakka sida mansang; awakka sida bejaku.
Aram meh kitai betunga mua lalu Aku deka ngakim kita.
2 Sapa ke udah meri kuasa ngagai orang ari timur,
Ke ngangauka orang nya ngagai Iya ngambika ngereja utai ti adil,
Lalu nyerahka bemacham bansa ngagai iya
Sereta ngena iya ngalahka bala raja?
Sapa ke ngaga sida nyadi debu ketegal pedang iya,
Ke ngaga sida baka ampa ke dikebuka angin ketegal panah iya?
3 Iya begagaika sida ba jalai ke nadai kala ditujah iya;
Nadai utai nanggul iya lebuh iya mansang.
4 Sapa ke udah ngereja tu lalu ngasuh utai tu nyadi?
Sapa ke ngangauka semua generasi* kenyau ari kelia menya?
Aku, Jehovah, Aku meh Ti Keterubah;
Aku tetap sama sampai generasi ti pemadu dudi.
5 Pulau udah meda nya lalu nyadi takut.
Ujung dunya nyau getar-getar takut.
Sida datai lalu mansang semak.
6 Sida nulung pangan diri
Lalu madahka: “Nuan mesti kering.”
7 Orang ke betukang ngeringka tukang besi;
Orang ke ngerataka besi ngena tukul
Ngeringka orang ke malu besi ngena tukul.
Ku iya madah: “Besi udah dijantilka* enggau manah.”
Udah nya, patung nya dipantang ngena paku ngambika iya enda labuh.
8 Tang nuan, O Israel, nuan meh nembiak Aku,
O Jakop, nuan meh ke dipilih Aku,
Iya nya peturun kaban Aku, Abraham,
9 Nuan ke diambi Aku ari ujung dunya,
Nuan ke dikangau Aku ari endur ti pemadu jauh.
Aku madah ngagai nuan: ‘Nuan meh nembiak Aku;
Aku udah milih nuan; Aku enda nulak nuan.
10 Anang takut, laban Aku bisi enggau nuan.
Anang irau, laban Aku meh Petara nuan.
Aku deka ngasuh nuan teguh, au, Aku deka nulung nuan.
Aku deka megai nuan enggau rat ngena jari kanan Aku, iya nya jari pengelurus Aku.’
11 Peda! Semua orang ke ringat ngagai nuan deka dikemaluka sereta dikemaruhka.
Sida ke ngelaban nuan deka dipunaska lalu nadai agi.
12 Nuan deka ngiga orang ke belaban enggau nuan, tang nuan enda ulih tetemuka sida;
Orang ke beperang enggau nuan deka nadai agi, baka utai ke enda kala bisi.
13 Laban Aku, Petara nuan, Jehovah, megai jari kanan nuan,
Lalu Aku madah ngagai nuan: ‘Anang takut. Aku deka nulung nuan.’
14 O Jakop ke baka ulat,* anang meh nuan takut,
O orang Israel, Aku deka nulung kita,” ku Jehovah, Penebus kita, Petara Israel ti Kudus.
15 “Peda! Aku udah ngaga nuan nyadi papan kena ngindik utai ke diketau,
Perengka ti baru sereta tajam kena ngindik utai ke diketau.
Nuan deka ngindik lalu nganchurka gunung
Lalu ngaga bukit nyadi baka ampa.
16 Nuan deka nampi sida,
Lalu angin deka ngebuka sida;
Sida deka ngachir ketegal ribut.
Nuan deka gaga ati ketegal Jehovah,
Lalu nuan deka berasai temegah ketegal Petara Israel ti Kudus.
17 Orang ke miskin enggau orang ke merinsa ngiga ai, tang sida nadai tetemuka ai.
Dilah sida rangkai ketegal aus.
Aku, Jehovah, deka nyaut sida.
Aku, Petara orang Israel, enda ninggalka sida.
18 Aku deka ngasuh sungai mengalir ba bukit ke nadai utai,
Lalu mata ai deka mengalir ba lebak ti rata.
Aku deka ngasuh menua puang nyadi kolam,*
Lalu menua ke nadai ai nyadi mata ai.
19 Ba padang pasir, Aku deka nanam pun sidar,
Pun akasia, pun mirtel, enggau pun pain;
Ba padang pasir, Aku deka nanam pun juniper,
Pun ash, enggau pun saipris,
20 Ngambika semua orang meda lalu nemu,
Ngambika sida beratika lalu meretika
Jari Jehovah meh ke udah ngereja nya,
Lalu Petara Israel ti Kudus meh ke udah ngasuh utai nya nyadi.”
21 “Bantaika pekara kita,” ku Jehovah.
“Padahka bukti kita,” ku Raja ke dipetuaika Jakop.
22 “Tunjukka meh bukti lalu padah ngagai kami utai ke deka nyadi.
Padah ngagai kami pasal utai ke nyadi suba,
Ngambika kami ulih berundingka utai nya, lalu nemu nama penyadi utai nya.
Tauka tusui ngagai kami utai ti deka nyadi dudi hari.
23 Padahka ngagai kami nama utai ke deka nyadi jemah ila,
Ngambika kami nemu semua kita petara magang.
Kereja meh nama-nama utai, enda ngira manah tauka jai,
Ngambika kami alit ati meda nya.
24 Peda! Semua kita nadai guna
Lalu pengawa kita nadai reti.
Sapa-sapa ke milih kita nya orang ke dipegedika.
25 Aku udah meri kuasa ngagai siku orang ari utara, lalu iya deka datai,
Siku orang ari timur ke deka ngangauka nama Aku.
Iya deka ngindik bala pemerintah baka ke ngindik tanah liat;
Baka tukang periuk tanah ke ngindik tanah liat ti basah.
26 Sapa ke madah pasal nya kenyau ari pun ngambika kami nemu?
Tauka nusui pasal nya kenyau ari suba ngambika kami madah: ‘Betul utai ku iya’?
Sigi nadai orang nusui pasal nya!
Nadai orang madah pasal nya!
Nadai orang ninga nama-nama utai ari kita!”
27 Aku meh ti keterubah madah ngagai Sion: “Peda nama utai ke deka nyadi!”
Aku deka ngasuh siku seruan* mansang nusui berita manah ngagai Jerusalem.
28 Aku majak beratika, tang Aku nadai meda orang;
Nadai siku ari bala sida ke meri jaku lalau,
Lalu Aku majak ngasuh sida nyaut.
29 Peda! Semua sida nadai guna.
Pengawa sida nadai reti.
Patung besi sida baka angin lalu nadai mai penguntung.