Rome

2 Nya alai, enda ngira sapa kita, kita enda ulih ngetanka diri enti kita ngakim orang bukai, laban kita empu mega ngereja utai ti sama. Lebuh kita ngakim sida, kebendar iya kita ngukum diri empu. 2 Tang kitai nemu, lebuh Petara ngakim sida ke ngereja utai ke bansa nya, Iya deka ngakim sejalai enggau utai ti bendar.

3 Kati kita ngumbai diri ulih rari ari diakim Petara, lebuh kita ngakim orang ke ngereja utai ke dikereja kita? 4 Kati kita enda nemu, Iya sabar, nagang diri, sereta ngayanka pemanah ati Iya ti besai ngagai kita? Kati kita enda sedar, Petara nya nelap laban nguji deka nulung kita nesal ati? 5 Tang ketegal kita enggai ninga jaku sereta enggai nesal ati, Petara tentu deka ngukum kita ba hari pengeringat Iya, lebuh Iya ngakim enggau lurus. 6 Iya deka malas tiap iku orang nitihka utai ke udah dikereja sida siku-siku. 7 Iya deka meri pengidup ti meruan belama iya ngagai sida ti ngereja utai ti manah. Orang ke baka nya ngiga mulia, basa, enggau tubuh ke enda nemu reput.* 8 Tang, Petara deka ngayanka pengeringat enggau pemedis ati Iya ngagai sida ke rindu belaya sereta enda ngasika pemendar. 9 Genap iku orang ke ngereja utai ti jai deka napi pemerinsa, enda ngira iya orang Judah tauka orang Gerika. 10 Tang semua orang ke ngereja utai ti manah deka bulih mulia, basa, sereta bebaik enggau Petara. Keterubah, orang Judah, udah nya, orang Gerika. 11 Laban Petara enda bepilih mata.

12 Enti orang ke enda di baruh adat ngereja dosa, iya deka mati, taja pan iya enda nemu adat nya. Tang enti orang ke ba baruh adat ngereja dosa, iya deka diakim nitihka adat nya. 13 Laban Petara enda ngumbai orang lurus enti orang nya semina ninga adat nya. Semina orang ke ngereja utai ke diasuh adat deka dikumbai lurus. 14 Orang bansa bukai nadai ngembuan adat. Tang lebuh sida ngereja utai ke dipadahka adat, sida nunjukka sida nemu utai ti betul enggau salah, taja pan sida nadai adat. 15 Sida nunjukka utai ke diajar adat bisi ditulis dalam ati sida. Ati* sida mega setuju, lalu runding sida nulung sida nemu sekalika sida betul tauka salah. 16 Baka nya meh gaya utai lebuh Petara ngena Jesus Kristus ngakim utai ke dirunding sereta dikereja mensia belalai. Semua tu sebagi ari Berita Manah ke ditusui aku.

17 Sekeda ari kita ngumbai diri orang Judah, lalu arapka adat. Kita mega temegahka kaul kita enggau Petara. 18 Kita nemu peneka Petara, lalu ulih nentuka utai ti ngena, laban kita udah diajar Adat. 19 Kita pechaya kita ulih ngiring orang ke buta, lalu meri penampak ngagai sida ke dalam pemetang. 20 Kita ngumbai diri ulih ngemetulka sida ke beli sereta ngajar anak mit, laban kita bisi batang penemu enggau pemendar ke bisi dalam Adat. 21 Tang nama kebuah kita ke ngajar orang bukai enda ngajar diri empu? Kita madah ngagai orang, “Anang enchuri,” tang nama kebuah kita empu ke enchuri? 22 Kita madahka, “Anang butang,”* tang nama kebuah kita butang? Kita madahka diri begedika engkeramba, tang nama kebuah kita ngerumpak rumah sembiang engkeramba? 23 Kita temegahka diri laban nemu adat Petara, tang nama kebuah kita ngelanggar Adat, lalu enda bebasaka Petara? 24 Baka ke ditulis ba Bup Kudus, “Ketegal kita, orang bansa bukai bejaku ngelaban nama Petara.”

25 Sunat* beguna enti kita nitihka adat. Tang lebuh kita enda nitihka adat, kita baka ke bedau besunat.* 26 Tang enti orang ke enda besunat nitihka pesan ti lurus dalam Adat, endaka Petara deka ngumbai iya udah besunat, taja pan iya enda besunat? 27 Kita udah diajar pasal sunat sereta pasal adat ke ditulis. Tang kita enda nitihka iya. Nya alai, enti orang ke enda besunat nitihka Adat, iya deka ngakim kita. 28 Ketegal orang madahka diri orang Judah, ukai reti nya iya amat-amat orang Judah. Orang engka madahka diri udah disunat,* tang nya ukai sunat ti bendar. 29 Tang utai ke ba dalam ati siku-siku orang ke deka nentuka iya orang Judah ti bendar. Sunat ti bendar ukai nitihka utai ke dipadahka adat, tang sunat nya, sunat ba ati ke diiring kuasa kudus Petara. Orang ke baka nya nerima puji ari Petara, ukai ari mensia.