Jaku-Dalam
7 O anak aku, pendingka jaku aku,
Lalu simpan pesan aku baka nyimpan reta ti berega.
2 Ngasika pesan aku ngambika nuan ulih idup lantang;
Titihka ajar aku enggau bejimat baka nuan ke bejimat nyaga mata* nuan.
3 Tanchangka nya ba jari nuan;
Tuliska nya ba ati nuan.
4 Padah ngagai penemu-dalam: “Nuan meh menyadi indu aku,”
Lalu kangauka runding ti dalam: “Nuan meh kaban belayan aku.”
6 Ari jenila rumah aku,
Aku nilik ke baruh.
7 Aku tepedaka bala nembiak ke nadai pengalaman;
Ari bala sida, aku beratika siku lelaki biak ke beli.
8 Iya mansa simpang jalai ke semak rumah indu nya,
Lalu iya bejalai nuju rumah indu nya.
9 Maya lemai hari, lebuh mata panas berengkah padam,
Lebuh hari nyau majak petang,
10 Aku meda siku indu mansang ngagai lelaki nya;
Indu ke pintar nipu nya begari baka pelacur.
11 Indu nya jegit sereta enda nemu malu;
Iya seruran nadai ba rumah.
12 Kekadang iya bisi ba luar rumah, kekadang iya bisi ba endur orang mayuh;
Iya rindu nganti ba tiap iti simpang jalai.
13 Indu nya merap lelaki ke biak nya lalu nyium iya;
Indu nya nadai berasai malu, lalu ku iya:
14 “Aku udah nyerahka pemeri bebaik.
Seharitu, aku udah ngamatka semaya aku.
15 Nya kebuah aku pansut deka betemu enggau nuan.
Aku ngiga nuan lalu tetemuka nuan.
16 Aku udah nganchau cadar ke mayuh macham warna ba peninduk aku;
Cadar kain linin ti lawa ari Ejip.
17 Aku udah naburka mur, garu, enggau kayu manis ba peninduk aku.
18 Aram tua ngemuaska pangan diri ngena pengerindu tua sampai pagi;
Aram tua ngelantangka diri ngena api pengerindu tua,
19 Laban laki aku nadai ba rumah.
Iya udah mupuk ngagai endur ti jauh.
20 Iya mai sekantung duit,
Lalu enda pulai sampai bulan purnama.”
21 Indu nya nipu lelaki nya ngena jaku pujuk.
Iya ngena jaku ti manis nguntik lelaki nya.
22 Lelaki nya pan tekala nya nitihka iya, baka sapi ke deka disayat;
Iya baka orang ke beli ke deka diukum ngena rantai.*
23 Anak panah deka ngebuska ati iya;
Iya baka burung ke terebai tama ke dalam panjuk, iya enda nemu nya tau nganu nyawa iya.
24 Nya alai, anak, pendingka aku;
Peratika utai ke disebut aku.
25 Anang ngasuh ati nuan nguing nitihka jalai indu nya.
Anang limpang ngagai jalai iya,
26 Laban iya udah ngasuh mayuh orang lenyau nyawa;
Penyampau orang ke dibunuh iya enda alah diitung.
27 Mansang ngagai rumah iya baka ke mansang ngagai Kubur;*
Mupuk kin baka ke mupuk nuju ngagai pemati.