Jaku-Dalam
5 Anak, peratika penemu-dalam aku.
Pendingka enggau manah runding aku ti dalam,
2 Enggau nya, nuan ulih nyaga runding nuan
Lalu seruran nyebut utai ti bendar.
3 Jaku indu ke kamah ulah* manis baka madu ke neritik,
Lalu mulut iya lichin agi ari minyak.
4 Tang kebendar iya, iya baka utai tumbuh ke pait
Lalu tajam baka pedang ke bemata dua.
5 Kaki iya bejalai nurun ngagai pemati;
Singkang iya nuju ngagai Kubur.*
6 Iya enda pedulika jalai ke mai pengidup.
Jalai iya nadai tuju, lalu iya empu enda nemu kini ke penunga iya.
7 Anak, pendingka aku;
Anang nguing ari utai ke disebut aku.
8 Jauhka diri empu ari iya;
Anang mansang semak ngagai pintu rumah iya,
9 Ngambika nama nuan dipebasa orang bukai,
Ngambika nuan enda idup merinsa dudi hari;
10 Ngambika orang asing enda beambi ulih ngena pengaya nuan,
Ngambika utai ke diulih ngena tulang nuan empu enda diempu orang bukai.
11 Enggau nya, nuan enda merinsa ba pengujung pengidup nuan,
Iya nya lebuh pengering nuan nadai agi lalu nuan majak enda bepengerai,
12 Nuan enda ibuh bejaku munyi tu: “Nama kebuah aku begedika disiplin suba?
Nama kebuah ati aku enda pedulika jaku rara?
13 Aku enda mendingka jaku bala pengajar aku;
Aku enda pedulika jaku orang ke ngajar aku.
14 Aku nyauka anchur da
Ba entara semua raban gempuru.”*
15 Irup meh ai ari telaga nuan empu,
Ai ti mengalir ari telaga nuan empu.
16 Patut nuan nejuka mata ai nuan melumpa ke luar?
Lalu nejuka sungai nuan mengalir ba tempat awam?
17 Awakka semua nya diempu nuan siku aja,
Ukai dikunsi enggau orang ke enda dikelala nuan.
18 Awakka mata ai nuan diberekat,
Awakka nuan lantang ati diau enggau bini ke enggau nuan jadi lebuh agi biak.
19 Iya baka rusa indu ti dikerinduka, baka kambin gunung ti manah gamal sereta ngerinduka ati.
Awakka dada* iya seruran ngemuaska nuan.
Awakka pengerindu iya seruran ngasuh nuan tekait ati.
20 Nya alai, anak, nama kebuah nuan rinduka indu ke kamah ulah?*
Nama kebuah nuan merap tubuh indu ke enda bemoral?*
21 Jehovah beratika semua jalai mensia;
Iya meresa semua singkang sida.
22 Orang ke jai dipanjuk penyai iya empu;
Iya deka dibelit dosa iya empu.
23 Iya deka mati ketegal enggai nerima disiplin;
Iya limpang ketegal kelalu beli.