Surat Kereja Rasul
23 Paul merening ngagai Raban Kunsil Orang Judah lalu bejaku: “Bala menyadi, nyentuk ngagai seharitu, aku ngereja semua utai enggau ati* ti beresi ba mua Petara.” 2 Nya alai, Imam Besai Ananias ngasuh orang ke bediri semak Paul nampar mulut Paul. 3 Paul bejaku ngagai Ananias: “Petara deka ngukum nuan, nuan ke pura-pura ngapa!* Kati nuan duduk deka ngakim aku nitihka Adat, tang ba maya ti sama, nuan ngasuh orang malu aku lalu ngelanggar Adat nya?” 4 Sida ke bediri semak Paul lalu bejaku: “Berani amat nuan nyebut utai ti jai ngagai imam besai Petara!” 5 Paul lalu bejaku: “Bala menyadi, aku enda nemu iya imam besai. Endang udah ditulis, ‘Anang bejaku jai pasal pemerintah bansa kita.’”
6 Paul nemu, ba Raban Kunsil Orang Judah nya bisi orang Saduki enggau orang Parisi. Nya alai, iya bejaku ngagai sida enggau nyawa ti inggar: “Bala menyadi, aku tu orang Parisi, lalu aki ini aku mega orang Parisi. Aku dipechara laban aku pechaya orang mati deka diidupka baru.” 7 Laban iya bejaku munyi nya, orang Parisi enggau orang Saduki lalu bekelikuh enggau pangan diri, lalu sida bepechah. 8 Nya ketegal orang Saduki enda pechaya orang mati deka diidupka baru. Sida mega enda pechayaka melikat tauka utai ti idup ke enda ulih dipeda. Tang orang Parisi pechayaka semua utai nya. 9 Nya alai, sida balat amat charut ba dia. Sekeda bala penulis Adat ke ari raban orang Parisi angkat lalu balat mantah. Ku sida bejaku: “Kami nadai tetemuka nama-nama penyalah ba orang tu. Tang enti bisi utai ti idup ke enda ulih dipeda tauka melikat bejaku enggau iya—.” 10 Ketegal penyarut ke nyadi nya majak balat-sebalat, ketuai soldadu nya irau enggaika sida munuh Paul. Nya alai, iya ngasuh bala soldadu iya mansang lalu narit Paul ari bala orang nya, lalu mai iya ngagai endur soldadu diau.
11 Malam nya, Tuan bediri ngimbai Paul lalu bejaku: “Anang takut! Nuan patut meri saksi pasal aku ba Rome, baka nuan ke udah meri saksi enggau silik pasal aku ba Jerusalem.”
12 Lebuh hari udah siang, orang Judah ngaga pelan kena munuh Paul. Sida mega besumpah enda makai tauka ngirup nyentukka sida udah munuh iya. 13 Bisi lebih ari 40 iku orang ke udah ngaga sumpah nya. 14 Sida mansang ngagai bala tuai imam enggau ngagai bala tuai bansa orang Judah lalu bejaku: “Kami udah besumpah enda makai nama-nama utai nyentukka kami udah munuh Paul. 15 Nya alai, diatu, kita enggau Raban Kunsil Orang Judah patut ngasuh ketuai soldadu nya mai Paul ngagai kita. Kita ngaga diri baka ke deka mansik kes iya enggau silik agi. Tang sebedau iya datai ba ditu, kami udah besedia deka munuh iya.”
16 Tang anak menyadi indu Paul bisi ninga pasal sida ke deka ngenyit nyerang Paul. Nya alai, iya tama ngagai endur soldadu diau lalu madahka pasal utai nya ngagai Paul. 17 Udah nya, Paul ngangauka siku pegawai soldadu lalu madah ngagai iya: “Bai nembiak lelaki tu ngagai ketuai soldadu laban iya bisi utai ti deka dipadahka iya.” 18 Nya alai, pegawai soldadu nya mai iya ngagai ketuai soldadu lalu madahka: “Orang ke ditangkap kitai, ke benama Paul ngangauka aku lalu ngasuh aku mai iya tu ngagai nuan laban iya bisi utai ti deka dipadahka iya.” 19 Ketuai soldadu nya megai jari iya lalu mai iya ke tisi. Ku ketuai soldadu nya nanya: “Nama utai ti deka dipadahka nuan ngagai aku?” 20 Ku iya madahka: “Orang Judah udah besetuju deka minta nuan mai Paul ngagai Raban Kunsil Orang Judah pagila. Sida ngaga diri baka ke deka mansik kes iya enggau silik agi. 21 Tang anang nitihka utai ke dipinta sida, laban lebih ari 40 iku orang deka ngenyit nyerang Paul. Sida udah besumpah enggai makai tauka ngirup seagi-agi sida bedau munuh Paul. Diatu sida udah besedia, lalu benung nganti pemutus nuan.” 22 Ku ketuai soldadu nya madahka: “Anang madah ngagai sapa-sapa pasal nuan ke udah madahka pekara nya ngagai aku.” Udah nya, ketuai soldadu nya ngasuh iya mupuk.
23 Ketuai soldadu nya pan ngangauka dua iku pegawai soldadu lalu madahka: “Sediaka 200 iku soldadu lalu bai sida mansang ngagai Kaisaria. Bai mega 70 iku soldadu ke nepan kuda enggau 200 iku soldadu ke mai sangkuh. Asuh sida mupuk ngagai Kaisaria urung pukul semilan* malam tu. 24 Pia mega, sediaka beberapa iku kuda ke dikena Paul ngambika iya ulih selamat datai ngagai Gabenor Feliks.” 25 Lalu udah nya, iya nulis surat ti munyi tu:
26 “Aku Klaudius Lisias, nulis surat tu ngagai nuan Gabenor Feliks, Tuan ti Dipebasa. Aku meri tabi basa ngagai nuan. 27 Lelaki tu udah ditangkap orang Judah lalu nyauka dibunuh sida. Tang aku enggau bala soldadu aku nyelamatka iya enggau lengkas laban aku nemu iya peranak* Rome. 28 Aku deka nemu kebuah sida nuduh iya, nya alai aku mai iya ngagai Raban Kunsil Orang Judah. 29 Aku beratika, jaku tuduh sida bekaul enggau Adat sida, tang ukai utai ke patut ngasuh iya diukum mati tauka dijil. 30 Tang ketegal bisi orang madah ngagai aku pasal pelan sida ke deka munuh iya, aku lalu berumban nganjung iya ngagai nuan. Aku mega ngasuh bala sida ke deka nuduh iya mantaika jaku tuduh sida ngagai nuan.”
31 Nya alai, bala soldadu mai Paul ngagai Antipatris malam nya, sejalai enggau pesan ti diterima sida. 32 Hari siti, semua soldadu ke nepan kuda neruska pejalai sida enggau Paul. Tang bala soldadu ke bukai pulai ngagai endur sida diau. 33 Lebuh semua soldadu ke nepan kuda nya datai ba Kaisaria, sida nyuaka surat nya ngagai gabenor sereta nyerahka Paul ngagai iya. 34 Nya alai, gabenor nya macha surat nya lalu nanya ari ni penatai Paul. Iya pan nemu Paul datai ari Kilikia. 35 Ku iya bejaku: “Pengudah sida ke nuduh nuan datai, aku deka mansik kes nuan enggau silik.” Iya lalu ngasuh Paul ditan ba istana Herod.