Isaiah
1 Tu meh utai ke dipandangka Petara dalam runding Isaiah* anak Amoz, pasal Judah enggau Jerusalem maya bala raja Judah, iya nya Usiah, Jotam, Ahas, enggau Hesekiah merintah:
2 O langit, dingaka meh. O dunya, pendingka enggau manah,
Laban Jehovah udah madahka:
“Bala anak ke diibun Aku nyentukka sida besai
Udah angkat ngelaban Aku.
3 Sapi ngelala orang ke meli iya,
Lalu keledai nemu dulang* ke diberi tuan iya;
Tang orang Israel enda ngelala Aku.*
Nembiak Aku Empu enda meretika utai enggau dalam.”
4 Tulah meh kita, bansa ti bedosa!
Naka pemayuh penyalah ke udah dikereja kita!
Kita peturun ti jai, anak ti enda menyana!
Kita udah ninggalka Jehovah;
Kita enda bebasaka Petara Israel ti Kudus;
Kita melakangka Iya.
5 Kita tu majak ngelaban. Ba dini agi begian tubuh kita ke deka dipalu?
Pala kita nyau abis bakal,
Lalu ati kita nyau abis kena penyakit.
6 Ari tapa kaki sampai punjung pala, semua nya sakit magang.
Tubuh kita abis bakal, lebam, enggau bekuris;
Semua nya enda diubat, enda dibalut, tauka diunsut ngena minyak.
7 Menua kita puang;
Kuta kita abis diempa api.
Ba depan kita, orang asing makai asil ari menua kita.
Menua kita nyau nadai utai agi, baka ke dialahka orang asing.
8 Anak indu Sion ditinggalka baka langkau ba kebun anggur,
Baka langkau ba kebun entimun,
Baka kuta ke dikepung.
9 Enti Jehovah, ketuai soldadu serega, enda nejuka sekeda ari kitai idup,
Kitai tentu udah nyadi baka Sodom,
Enggau nyadi baka Gomorah.
10 Bala pemerintah Sodom, pendingka jaku Jehovah.
Orang Gomorah, peratika enggau manah adat* Petara kitai.
11 Ku Jehovah: “Nama guna kita nyerahka mayuh amat pemeri ngagai Aku?
Aku nyau udah leju enggau bedus lelaki ke diserahka kita nyadi pemeri tunu sereta lemak jelu kita ti pemadu manah.
Aku enda rinduka darah anak sapi lelaki, anak bedus, enggau kambin.
12 Lebuh kita datai ngagai Aku,
Kita ngindik laman Rumah Aku.
Sapa ke ngasuh kita ngereja nya?
13 Badu agi mai pemeri bijirin ke nadai guna.
Aku begedika menyan kita.
Kita ngintu pengerami bulan baru, enggau Hari Sabat, sereta ngatur gempuru besai.
Tang Aku enda tan meda kita ngena ilmu sihir* maya gempuru ti kudus.
14 Aku nyau begedika pengerami bulan baru enggau pengerami kita ke bukai.
Semua nya udah nyadi utai ti berat ba Aku;
Lelak amat Aku ngema nya.
15 Lebuh kita ngangkatka jari deka besampi,
Aku nutup mata Aku.
Taja pan kita besampi mayuh kali,
Aku enggai mending;
Jari kita penuh laban darah.
16 Tuchi diri empu; beresika diri empu.
Buai pengawa kita ti jai, laban Aku enggai meda pengawa nya agi;
Badu agi ngereja penyai.
17 Belajar ngereja utai ti manah sereta utai ti adil.
Rara orang ke merinsaka orang bukai,
Tulung anak ke nadai apai* ngetanka hak sida,
Lalu bejaku ngarika indu balu.”
18 Ku Jehovah: “Aram kitai mutarka penanggul entara kitai.
Taja pan dosa kita mirah pekat,
Dosa nya deka nyadi burak baka seleju;
Taja pan dosa kita mirah baka darah,
Dosa nya deka nyadi burak baka bulu bedus.
19 Enti kita deka ngasi,
Asil ti manah ari menua kita empu deka diempa kita.
20 Tang enti kita enggai ngasi sereta ngelaban,
Kita deka diempa pedang,
Laban Aku, Jehovah, udah bejaku.”
21 Kuta ti setia udah nyadi pelacur!
Suba, iya adil amat;
Pengelurus kala diau ba dia.
Tang diatu, bala pemunuh ke diau ba dia.
22 Pirak kita udah nyadi sepur logam,
Lalu beer kita udah nyadi enda pekat laban ai.
23 Bala tuai kita degil lalu bepakat enggau bala penchuri.
Tiap iku sida rindu makai suap sereta bebendar ngulihka rasuah.
Sida enda adil ngagai anak ke nadai apai,*
Lalu sida enggai kiruhka kes indu balu.
24 Nya alai, Jehovah, Tuan ti bendar, ketuai soldadu serega,
Petara Israel ti Amat Bekuasa, madahka:
“Umbas nya! Aku deka ngemunaska orang ke ngelaban Aku,
Lalu Aku deka malas bala munsuh Aku.
25 Aku deka ngukum kita;
Aku deka nganchurka sepur logam kita;*
Aku deka muai semua utai ti kamah ari kita.
26 Aku deka ngelantik bala hakim ke kita baka dulu suba,
Lalu meri kita bala penasihat* baka kelia menya.
Udah nya, kita deka dikumbai Kuta Pengelurus, Kuta ti Setia.
27 Aku deka nebus Sion laban Aku adil,
Lalu rayat iya ke pulai baru deka ditebus ngena pengelurus.
28 Orang ke ngelaban enggau orang ke bedosa deka sama anchur,
Lalu orang ke ninggalka Aku, Jehovah, deka dipunaska.
29 Sida deka malu ketegal pun kayu ti besai ke dikerinduka kita,
Kita deka malu ketegal taman* ke dipilih kita.
30 Kita deka baka pun kayu ti besai ke layu daun,
Sereta baka taman ke nadai ai.
31 Orang ti kering deka nyadi baka rumput rangkai,
Lalu pengawa iya deka nyadi baka perechik api;
Kedua-dua nya deka sama angus,
Lalu nadai orang ulih madamka api nya.”