Pemandang
17 Siku ari tujuh iku melikat ke bisi tujuh iti mangkuk nya datai lalu bejaku ngagai aku: “Kitu nuan, aku deka nunjukka ngagai nuan ukum ke deka ninggang indu sundal ti bekuasa ke duduk ba atas mayuh ai. 2 Bala raja ba dunya ngereja ulah seks ti kamah* enggau iya, lalu orang ba dunya nyadi mabuk ketegal wain ulah seks iya ti kamah.”*
3 Nengah kuasa kudus, melikat nya mai aku ngagai menua puang. Udah nya, aku meda siku indu duduk ba atas jelu ti siga ke bewarna mirah gelap. Jelu nya bisi tujuh igi pala enggau sepuluh iti tanduk, lalu iya penuh enggau nama ti bejaku ngelaban Petara. 4 Indu nya ngena gari ke bewarna ungu enggau mirah gelap sereta ngena perengka emas, batu ti berega, enggau mutiara. Jari iya megai mangkuk emas ke penuh enggau utai ti keji enggau utai ti kamah ari ulah seks iya ti kamah.* 5 Ba kening iya bisi ditulis siti nama, lalu nama nya siti misteri: “Babilon ti Besai nya, indai ke semua indu sundal sereta utai ti keji ba dunya.” 6 Aku meda indu nya mabuk, ngirup darah bala nembiak Petara ti kudus enggau darah bala saksi Jesus.
Aku balat iran lebuh meda indu nya. 7 Nya alai, melikat nya bejaku ngagai aku: “Nama kebuah nuan iran? Aku deka madah ngagai nuan misteri pasal indu nya sereta misteri pasal jelu ti siga ke ditepan iya, iya nya jelu ke bisi tujuh igi pala enggau sepuluh iti tanduk: 8 Pasal jelu ti siga ke dipeda nuan nya, suba iya bisi tang diatu iya nadai. Taja pia, enda lama agi iya deka pansut ari lubang ti amat dalam,* lalu udah nya iya dipunaska. Orang ba dunya deka berasai iran lebuh sida meda baka ni jelu nya tau bisi suba tang diatu nadai agi, lalu taja pia, iya deka bisi baru. Bala orang nya meh sida ke enda ditulis nama ba gulung surat pengidup kenyau ari penumbuh dunya.*
9 “Orang begunaka runding ti bepenemu-dalam kena meretika pekara tu: Tujuh igi pala, reti iya tujuh iti bukit alai indu nya duduk. 10 Bisi tujuh iku raja: Lima iku udah labuh, siku agi bisi, lalu siku da agi bedau datai. Tang lebuh iya datai, iya deka bisi enda lama aja. 11 Jelu ti siga ke bisi suba tang diatu nadai, nya meh raja ti kelapan. Iya datai ari tujuh iku raja nya lalu deka dipunaska.
12 “Sepuluh iti tanduk ke dipeda nuan nya, reti iya sepuluh iku raja ke bedau agi merintah. Tang sida deka nerima kuasa merintah nyadi raja begulai enggau jelu ti siga nya pengelama sejam. 13 Sida bisi runding ti sama. Nya alai sida nyerahka kuasa sida enggau hak sida merintah ngagai jelu ti siga nya. 14 Sida deka beperang ngelaban Anak Bedus, tang sida deka dialahka laban Anak Bedus nya Tuan atas semua tuan sereta Raja atas semua raja. Sida mega deka dialahka orang ke enggau Anak Bedus, iya nya orang ke dikangau enggau ke dipilih Petara sereta ke setia ngagai Iya.”
15 Melikat nya madah ngagai aku: “Ai ke dipeda nuan nya alai indu sundal nya duduk, reti iya orang mayuh sereta orang ke datai ari bemacham bansa, menua, enggau jaku. 16 Sepuluh iti tanduk ke dipeda nuan enggau jelu ti siga nya deka begedika indu sundal nya. Sida deka ngemunaska iya, nelanjaika iya, makai isi iya, sereta nganguska iya abis lengis ngena api. 17 Nya ketegal Petara Empu udah nyimpan runding Iya dalam ati sida, ngambika sida ngereja utai ti dikedekaka Iya. Petara deka sida ngereja utai ti sama ke diperundingka sida, iya nya nyerahka perintah sida ngagai jelu ti siga nya nyentukka jaku Petara dikeamatka. 18 Indu ke dipeda nuan nya, reti iya nengeri ti besai ke bisi siti perintah ti bekuasa atas bala raja ba dunya.”