Isaiah
11 Siti dan deka tumbuh ari tuga Jesi,
Lalu sumbuk ke pansut ari urat iya deka bebuah.
2 Iya deka penuh laban kuasa kudus* Jehovah;
Nya alai, iya deka nyadi bepenemu-dalam sereta ulih meretika utai enggau manah;
Iya bisi mayuh penemu sereta deka meri jaku lalau ti manah;
Iya deka nyadi kering sereta bisi basa ti besai ngagai Jehovah.
3 Iya rindu ati nangika Jehovah.
Iya enda ngakim nitihka utai ke dipeda iya,
Lalu enda ngerara semina nitihka utai ke didinga iya.
4 Iya adil lebuh ngakim orang ke nadai daya;
Ngena pengelurus, iya deka ngerara orang kena nyaga sida ke baruh ati* ba dunya.
Iya deka malu dunya ngena tungkat ke pansut ari mulut iya
Lalu munuh orang ke jai ngena kesuh nyawa iya.
5 Pengelurus deka nyadi tali pinggang iya,
Lalu ati ti setia deka ditanchang ba punggung iya.
6 Serigala deka begulai enggau anak bedus,
Lalu anak kambin deka gali enggau rimau bintang.
Anak sapi, singa, enggau jelu ti gemu deka begulai enggau pangan diri,*
Lalu siku anak mit deka ngiring sida.
7 Sapi enggau beruang deka makai begulai;
Anak sapi enggau anak beruang deka gali begulai.
Singa deka makai rumput baka sapi.
8 Anak ke agi nusu deka bemain semak enggau sarang ular tedung,
Lalu anak mit* deka ngengkahka jari iya ba lubang ular ti bisa.
9 Ba semua gunung ti kudus ke enggi Petara,
Nadai utai ke tau ngasuh pedis tauka ngasuh utai anchur,
Laban penemu pasal Jehovah tentu deka ngemenuhka dunya,
Baka ai ke ngemenuhka tasik.
10 Ba hari nya, siku orang ari peturun* Jesi deka angkat nyadi tanda* ke ulih dipeda orang.
Mayuh bansa deka datai minta iring* iya,
Lalu endur iya diau deka penuh laban mulia.
11 Ba hari nya, Jehovah deka nyuaka jari Iya baru kali kedua, ngambika ulih mai pulai bala nembiak Iya ke agi tinggal ba Asiria, Ejip, Patros, Kus, Elam, Shinar, Hamat, enggau ba pulau. 12 Iya deka meri tanda* ngagai mayuh bansa, lalu ngempuruka orang Israel ke udah ngachir ba mayuh endur, enggau orang Judah ke udah pambar ngagai empat sukut dunya.
13 Efraim deka badu agi berasai chemburu,
Lalu munsuh ke begedika Judah deka dipunaska.
Efraim enda agi chemburuka Judah,
Lalu Judah badu agi nyadi munsuh Efraim.
14 Sida deka jampat nurun bukit ngambika nyerang orang Pilistin ba barat;
Sida deka sama-sama ngerampas barang orang Timur.
Sida deka nguasa Edom enggau Moap,
Lalu orang Amon deka nunduk ngagai sida.
15 Jehovah deka melah* teluk tasik Ejip,
Lalu nunjukka jari Iya ngagai Sungai Eupratis.
Ngena kesuh nyawa ti angat, Iya deka ngerangkaika tujuh iti sungai mit ba dia,*
Lalu Iya deka ngasuh orang bejalai meraka ke seberai sungai.
16 Jalai besai ke pansut ari Asiria deka digaga ke bala nembiak Iya ke agi tinggal,
Sama baka maya orang Israel pansut ari Ejip.