Surat Kereja Rasul
13 Maya nya, bisi beberapa iku nabi enggau pengajar ba raban gempuru ba Antiok. Sida nya Barnabas, Simeon ke dikumbai Niger,* Lusius ari Sairin, Saul, enggau Manain ke kala sama belajar enggau siku pemerintah menua ke benama Herod.* 2 Lebuh sida nyembah Jehovah sereta bepasa, kuasa kudus Petara bejaku: “Pilih Barnabas enggau Saul laban bisi pengawa udah ditetapka aku ke seduai iya.” 3 Pengudah sida bepasa sereta besampi, sida ngengkahka jari ba atas Barnabas enggau Saul, lalu ngasuh seduai iya mupuk.
4 Nengah iring kuasa kudus Petara, Barnabas, enggau Saul mupuk ngagai Seleusia, lalu ari nya, seduai iya belayar ngagai Pulau Saiprus. 5 Sepengudah datai ba Salamis, seduai iya berengkah nusui jaku Petara ba balai gempuru orang Judah. John mega enggau lalu nulung seduai iya.
6 Pengudah bejalai ba serata pulau nya, sida datai ba Papos. Ba dia, sida betemu enggau siku lelaki ke benama Bar-Jesus. Iya orang Judah. Iya siku dukun sereta nabi pelesu. 7 Iya bekereja ke Sergius Paulus, siku lelaki ke pintar, ke mega gabenor ba endur nya. Gabenor nya ngangauka Barnabas enggau Saul datai ngagai iya, laban iya keran deka ninga jaku Petara. 8 Tang Elimas,* dukun nya, belabuh ngelaban sida lalu nguji nagang gabenor nya ari arapka Tuan Jesus. Nama Elimas reti iya, dukun. 9 Saul, ke mega dikumbai Paul, penuh laban kuasa kudus Petara. Iya bendar amat merening ngagai dukun nya, 10 lalu bejaku: “Nuan, ke penuh laban semua macham pemula enggau penyai, nuan anak Sitan* sereta munsuh ke semua utai ti lurus. Nama kebuah nuan enda badu ngalihka jalai Jehovah ti bendar? 11 Peda nuan! Jari Jehovah deka ngukum nuan. Ba siti timpuh, nuan deka nyadi buta lalu enda ulih meda penampak mata panas.” Maya nya mega, utai ke dipeda iya nyadi kabur lalu petang. Iya bejalai gama-gama ngiga orang ngiring iya. 12 Pengudah gabenor ba endur nya meda utai ke nyadi, iya lalu arap laban iya balat alit ati enggau ajar ari Jehovah.
13 Udah nya, Paul enggau bala kaban iya belayar ari Papos lalu datai ba Perga, Pampilia. Tang John ninggalka sida lalu pulai baru ngagai Jerusalem. 14 Ari Perga, sida mupuk ngagai Antiok ba Pisidia. Maya Hari Sabat, sida tama ngagai balai gempuru lalu duduk ba dia. 15 Pengudah Adat enggau Ajar Sida Nabi dibacha ba mua orang mayuh, bala tuai balai gempuru nganjung orang bejaku ngagai sida: “Bala menyadi, enti kita bisi jaku ti meransang, padahka meh ngagai semua orang ba ditu.” 16 Nya alai, Paul bediri lalu meri tanda ngena jari. Ku iya bejaku:
“Dinga kita, orang Israel enggau kita ke nangika Petara. 17 Petara orang Israel udah milih aki ini kitai, lalu ngeninggika sida lebuh sida diau nyadi orang asing ba menua Ejip. Petara mai sida pansut ari Ejip ngena lengan Iya ti bekuasa. 18 Lalu pengelama kira-kira 40 taun, Iya sabar enggau sida ba menua puang. 19 Pengudah ngemunaska tujuh iti bansa ba menua Kanaan, Iya magi menua nya nyadika pesaka sida. 20 Semua tu nyadi pengelama kira-kira 450 taun.
“Udah nya, Iya meri sida bala hakim nyentuk ngagai jeman Nabi Samuel. 21 Tang udah nya, sida minta siku raja, lalu Petara meri sida Saul anak Kis, ari raban bansa Benjamin. Saul nyadi raja pengelama 40 taun. 22 Pengudah Petara muai Saul, Iya milih David nyadi raja. Petara meri saksi pasal David: ‘Aku udah tetemuka David anak Jesi. Iya siku lelaki ke ngagaka ati Aku. Iya deka ngereja semua peneka Aku.’ 23 Sejalai enggau semaya Petara, Petara udah meri orang Israel siku penyelamat ari peturun David, iya nya Jesus. 24 Sebedau Jesus datai, John udah madah ngagai semua orang Israel pasal sida ke patut dibaptisa kena nunjukka sida udah nesal ati. 25 Lebuh pengawa John nyauka tembu, iya suah madahka: ‘Ba runding kita, sapa aku tu? Aku ukai iya. Tang peda kita! Bisi siku orang deka datai pengudah aku, lalu aku enda layak muka tali kasut* iya.’
26 “Bala menyadi ari peturun Abraham enggau semua kita ke nangika Petara, berita pasal chara Petara nyelamatka kitai udah ditusui ngagai kitai. 27 Orang ke diau ba Jerusalem enggau bala pemerintah ba dia enda nerima iya. Tang lebuh sida ngakim iya, sida ngamatka utai ke ditulis dalam Ajar Sida Nabi ke dibacha enggau nyawa ti inggar tiap kali Hari Sabat. 28 Taja pan sida nadai kebuah ke tau ngasuh iya diukum bunuh, tang sida minta ngagai Pilate ngasuh iya dibunuh. 29 Pengudah sida ngereja semua utai ke ditulis pasal iya, sida nurunka iya ari tiang,* lalu ngengkahka iya dalam kubur. 30 Tang Petara ngidupka iya baru ari mati. 31 Lalu ba siti timpuh, iya ngayanka diri ngagai sida ke kala enggau iya ari Galili ngagai Jerusalem. Diatu, sida nya meh ke meri saksi pasal iya ngagai orang mayuh.
32 “Nyadi, kami benung nusui ngagai kita Berita Manah pasal semaya ke diberi ngagai aki ini kitai. 33 Enggau ngidupka Jesus ari mati, Petara udah ngamatka semaya nya enggau pengabis iya ngagai kitai, iya nya, peturun sida. Pekara tu endang amat baka ke ditulis ba masmur ti kedua: ‘Nuan meh anak Aku; lalu seharitu Aku nyadi apai nuan.’ 34 Petara udah ngidupka iya ari mati, lalu iya enda agi ngembuan tubuh ke ulih reput.* Petara ngamatka pekara tu lebuh Iya bejaku: ‘Aku deka enggau tetap ati ngayanka pengerindu Aku ngagai kita, baka ke disemayaka Aku ngagai David lalu semaya nya tau dikearapka.’ 35 Siti agi masmur ke bukai mega madahka: ‘Nuan enda nejuka tubuh ulun Nuan ke taluk nyadi reput.’ 36 David ngereja peneka Petara sepemanjai idup iya. Pengudah David tinduk dalam pemati, iya dikuburka begulai enggau bala aki ini iya, lalu tubuh iya reput. 37 Tang Jesus udah diidupka Petara ari pemati lalu tubuh iya enda reput.
38 “Nya alai, bala menyadi, aku madah ngagai kita, Petara deka ngampunka dosa kita nengah lelaki tu. 39 Adat Moses enda ulih muai penyalah kita. Tang nengah lelaki tu, barang sapa ke arap, deka dikumbai enda besalah. 40 Nya alai, bejimat meh ngambika utai ke disebut ba Ajar Sida Nabi tu enda nyadi ba kita: 41 ‘Dinga kita, orang ke rindu ngelese. Kita deka iran ati lalu kita deka dibuai, laban taja pan bisi orang madah ngagai kita enggau silik pasal utai ke deka digaga Aku ba jeman kita, kita tentu enda arapka nya.’”
42 Lebuh Paul enggau Barnabas pansut ari endur nya, orang mayuh minta seduai iya bejaku pasal pekara nya baru ba Hari Sabat ti deka datai. 43 Nya alai, pengudah semua orang mupuk ari balai gempuru nya, mayuh orang Judah enggau orang ke megai pengarap Judah, ke nyembah Petara, nitihka Paul enggau Barnabas. Paul enggau Barnabas bejaku ngagai sida, lalu meransang sida ngambika nentuka diri mengkang layak nerima pemanah ati Petara ti besai.
44 Lebuh Hari Sabat nya datai, nyauka semua orang ba nengeri nya begelumu ninga jaku Jehovah. 45 Lebuh orang Judah meda mayuh amat orang datai, sida balat chemburu. Sida belabuh ngelaban jaku Paul, lalu enggau nya sida ngelaban Petara. 46 Tang Paul enggau Barnabas enggau berani bejaku ngagai sida: “Jaku Petara endang patut ditusui ngagai kita dulu. Tang ketegal kita enggai nerima jaku Petara, kita ngasuh diri empu enda layak nerima pengidup ti meruan belama iya. Nya alai, kami nguing ngagai bansa bukai. 47 Laban tu meh pesan ke diberi Jehovah ngagai kami: ‘Aku udah milih nuan nyadi penampak ke bansa bukai lalu nuan deka mai penyelamat nyentuk ngagai ujung dunya.’”
48 Lebuh orang bansa bukai ninga nya, sida gaga ati lalu muji jaku Jehovah. Semua orang ke bisi pengingin deka nengah jalai ke nuju ngagai pengidup ti meruan belama iya, lalu nyadi murid Jesus. 49 Jaku Jehovah ngelekai ngagai serata menua nya. 50 Tang orang Judah ngasut* bala pemerintah ba nengeri nya sereta bala indu ke tinggi pangkat ke nangika Petara. Nya alai, sida belabuh merinsaka Paul enggau Barnabas, lalu muai seduai iya ari nengeri nya. 51 Nya alai, Paul enggau Barnabas nesai debu ari kaki seduai iya nyadika tangkan ke sida, lalu udah nya, seduai iya mupuk ngagai Ikonium. 52 Bala murid Jesus majak penuh laban pengaga ati sereta kuasa kudus Petara.